Ngaahi Hokosia mei he 2012 Yearbook
NOAUE
Peesi 125, palakalafi 1 ki he peesi 126 palakalafi 3
Ngāue Fakapulipuli
Naʻe tokolahi ʻa e kau malanga naʻa nau fūfuuʻi ʻa e ʻū tohi ʻi he ngaahi feituʻu taʻeʻamanekina. Ko e foʻi lea “fakapulipuli” naʻá ne ʻomai ha ʻuhinga foʻou ʻi he taimi naʻe tanu ai ʻe he fanga tokouá ʻa e tohí ʻi he kelekelé pea toki keli hake ʻi hano fiemaʻu. Ko Tokoua Skau, ʻa ia ko ha tangata ngāue ʻuhila, naʻá ne fūfuuʻi ha katuni tohi ʻi ha tulenisifōma ʻi hono feituʻu ngāué. Ko Tokoua Øiseth naʻá ne fūfuuʻi ʻe ia ʻa e tohí ʻi ha fale tukuʻanga hone pea ko Tokoua Kvinge naʻá ne fufū ia ʻi ha tānakiʻanga pateta.
ʻI heʻene hohaʻa naʻa ʻiloʻi ʻa e tukuʻanga tohi ʻi Harstad, naʻe ʻalu ʻa Lotte Holm ke fakafoki mai ʻa e kotoa ʻo e ngaahi katuni tohí. Naʻá ne heka ki ha vaka, pea fakatoka fakalelei ʻa e ngaahi katuní ki he funga vaká pea tangutu ʻi he ʻū katuní. ʻI he mavahe ʻa e vaká, naʻe ilifia ʻa Lotte ʻi he sio ki he tokolahi ʻo e kau sōtia Siamane naʻe ʻi he vaká peá ne hohaʻa tuʻu pe ʻe fēfē haʻane fakahifo ʻa e utá ʻo ʻikai fakatokangaʻi. Kae kehe, naʻe ʻikai fiemaʻu ke ne hohaʻa. ʻI he taimi naʻe tau ai ʻa e vaká, naʻe ongoʻi fakaʻofaʻia ʻa e kau sōtiá ʻi he fefine taʻumotuʻa ko eni mo ʻene uta lahi mo mamafa ke ne fakahifó, ko ia naʻa nau tokoni ki ai ke fetuku ki ʻuta ʻa e ngaahi katuní kotoa pea aʻu ʻo ʻave ia ki hono ʻapí. Naʻe ʻikai ʻiloʻi ʻe he kau sōtia anga-fakaʻapaʻapa ko iá ko ʻenau anga-ʻofá naʻe ʻaonga lahi ia ki he Kau Fakamoʻoni ʻi he taimi ko iá.
Neongo ʻa e fakataputapuí, naʻe hokohoko atu ʻa e fanga tokouá hono fetuku fakafufū ʻa e ngaahi tatau fakamuimui taha ʻo e Taua Leʻo ki Noaue mei Suēteni mo Tenimaʻake. Naʻa nau liliu ʻa e ngaahi kupu akó ki he faka-Noaue pea tufaki ki he fonuá ʻa e ngaahi tatau ʻosi taipeʻi. Ko ha ngaahi founga kehekehe ʻo e ngāue fāitaha ki hono fetuku ʻo e ngaahi meʻakai fakalaumālié ʻi he lēlue, pasikala pe vaka ke aʻu taimi tonu ki he kau lotu moʻoni ʻi he fonuá.
Naʻa Nau Hokohoko Atu ʻi he Malangá
Lolotonga ʻa e taú, naʻe malanga hake ha tuʻunga ʻa ia naʻe fakamoʻoniʻi ko ha ʻahiʻahi ki he fanga tokoua mo e fanga tuofāfine ʻi Noaué. ʻI he taimi naʻe tapui ai ʻemau ngāué ʻi Siulai 1941, naʻe fakatokanga ki he fanga tokouá ke nau tokanga koeʻuhi naʻa nau fakaʻitaʻi ʻa e kau maʻu mafai Nasí. Ko ia ai, ko e tokolahi naʻa nau malanga ʻikai ʻi he founga anga-maheni ki he ngaahi kaumeʻá mo e ngaahi kāingá pe ngaahi toe ʻaʻahi naʻa nau lea ki ai ki muʻá. Neongo ia, ko e fanga tokoua ʻe niʻihi naʻa nau ongoʻi ko e fakaofiofi ko ení ʻoku ʻikai ke fuʻu longomoʻui ia pea naʻe ʻikai hano maumau ʻa e malanga mei fale ki he falé ʻo ngāueʻaki pē ʻa e Tohi Tapú. Neongo naʻe ʻi ai ha taʻefelotoi ʻe niʻihi fekauʻaki mo e founga ʻoku totonu ke fakahoko ai ʻa e ngāue fakamalangá, ko e ongo kulupú fakatouʻosi naʻá na maʻu ha holi mālohi ke tauhi faitōnunga kia Sihova ʻi he fehangahangai mo e fakafepakí.
Ko e hā ʻe fai ʻe he fanga tokouá? Naʻe ʻai ʻe he taú ʻa e fetuʻutaki mo e ʻuluʻi ʻapitanga ʻi Niu ʻIoké ke faingataʻa, ko ia naʻe ʻikai hā ngali ʻe vave hano fakaleleiʻi ʻa e meʻá. ʻE fakaʻatā ʻe he fanga tokouá ʻenau faikehekehé ke fakavaivaiʻi ʻenau tuí? Pe te nau hokohoko atu ʻa e malanga ʻi he lelei taha ʻo ʻenau malavá pea tatali kia Sihova mo ʻene kautahá ke fakaleleiʻi ʻa e meʻá?
ʻOku hā mahino naʻe tāpuakiʻi ʻe Sihova ʻenau ngāue faitōnungá, he ko e kautahá naʻa nau fiefia ʻi he tupu tatau lolotonga ʻa e taú ʻo hangē ko ia he taʻu ʻe nima ki muʻa he taú. Neongo ʻa e taú, ko e fakataputapuí mo e ngaahi founga ʻo hono fakahoko ʻo e malangá, ko e tumutumu ʻo e kau malangá naʻe tupu ia mei he 462 ʻi he 1940 ki he 689 ʻi he 1945—ʻo ʻoange ai ʻa e ʻuhinga ki he fanga tokouá ke nau fiefia moʻoni!
LUANITĀ
Peesi 181, palakalafi 1
Neongo naʻe fakahū ʻa e faʻahinga, ko e kakai loto-totonú naʻe ʻikai ke nau loto-siʻi pea ko e fakatangá naʻe faʻa hoko ai ha ngaahi ola lelei. Ko Odette Mukandekezi, ko ha tuofefine faivelenga mo fakafeohi naʻe kau ʻi he faʻahinga tokolahi naʻe fakahū ʻi he taimi ko iá. Naʻá ne pehē: “Lolotonga ʻa e taimi ʻo e fakatangá, naʻe fakahū ʻa e fanga tokouá pea tā. ʻI he ʻaho ʻe taha naʻa mau fakalaka atu ʻi ha kiʻi taʻahine ko hono hingoá ko Josephine naʻá ne tokangaʻi ʻa e fanga pulu. Naʻe ʻi ai haʻane Tohi Tapu pea naʻá ne lau ai ki he ʻuluaki kau Kalisitiané naʻe lauʻikoviʻi, fakatangaʻi, kauʻimaeaʻi mo tuku pilīsone. Koeʻuhi naʻá ne ʻilo hono fakatangaʻi ʻa e Kau Fakamoʻoní, naʻá ne fakamulitukuʻaki kuo pau pē ʻoku nau maʻu ʻa e lotu moʻoní pea naʻá ne kole ha ako Tohi Tapu. Ko ha tuofefine ʻosi papitaiso ia he taimí ni.”