Founga ke Ngāueʻaki ʻa e Ko Hai ʻOkú Ne Fai ʻa e Finangalo ʻo Sihová ʻi he ʻAho Ní?
Ko e Polosiua Foʻoú Kuo Fakataumuʻa ke Tataki ʻa e Kau Ako Tohi Tapú ki he Kautahá
1. Ko e hā ʻa e taumuʻa ʻe tolu ʻo e polosiua Finangalo ʻo Sihová?
1 Kuó ke kamata ngāueʻaki ʻa e polosiua foʻou Ko Hai ʻOkú Ne Fai ʻa e Finangalo ʻo Sihová ʻi he ʻAho Ní? Ko hono taumuʻá ko e (1) ke alāanga ʻa e kau ako Tohi Tapú mo kitautolu Kau Fakamoʻoni ʻa Sihová, (2) ke tokoniʻi kinautolu ke ako fekauʻaki mo ʻetau ngāué mo e (3) ke fakahaaʻi kiate kinautolu ʻa e ngāue ʻetau kautahá. Ko e polosiua Finangalo ʻo Sihová ʻoku ʻi ai ʻa e ngaahi lēsoni peesi ʻe taha ʻa ia ʻoku faingofua ke ʻosiki ʻi he miniti ʻe nima ki he hongofulu ʻi he ʻosi ʻa e ako taki taha.
2. Fakamatalaʻi hono fokotuʻutuʻu mo e mahuʻinga ʻo e polosiua ko ení.
2 Founga Hono Fokotuʻutuʻu Iá: Ko e polosiuá ʻoku vahevahe ia ki he konga ʻe tolu, ko e konga taki taha ʻoku fakamatala ki he tafaʻaki kehekehe ʻo e kautaha ʻa Sihová hangē ko ia ʻoku lave ki ai ʻi ʻolungá. Ko e kaveinga ʻo e lēsoni taki taha ʻe 28 ʻoku hiki ia ko ha fehuʻi pea ko e ngaahi kaveinga tokoni mataʻāʻaá ko e tali ia ʻo e fehuʻí. Ko e ngaahi tā mei he fonua laka hake he 50 ʻoku ʻi aí ke fakahaaʻi ʻa e tuʻunga fakavahaʻapuleʻanga ʻo ʻetau ngāué. ʻOku lahi ʻa e ngaahi lēsoni ʻoku ʻi ai ʻa e puha “ʻIlo Lahi Ange” ʻa ia ʻoku maʻu ai ʻa e ngaahi fokotuʻu ʻe lava ke ke fakalototoʻaʻi hoʻo tokotaha akó ke muimui ai.
3. ʻE lava fēfē ke tau ngāueʻaki ʻa e polosiua Finangalo ʻo Sihová?
3 Founga ʻE Lava Ke Ke Ngāueʻaki Iá: Kamataʻaki haʻo fakahanga ʻa e tokangá ki he fehuʻi ʻa ia ko e kaveinga ia ʻo e lēsoní. ʻI hoʻomo lau fakataha leva ʻa e lēsoní, fakamamafaʻi ʻa e ngaahi kaveinga tokoni mataʻāʻaá. Fakaʻosí lāulea ki he fehuʻi fakamanatu ʻi lalo ʻi he pēsí. ʻE lava ke ke lau kotoa ʻa e lēsoní pe lau mo lāulea fakakongokonga. Ngāueʻaki hoʻo fakafuofua leleí ʻi hono fili pe ko fē konga Tohi Tapu ke laú. ʻOua naʻa ngalo ke lāulea ki he ngaahi fakatātā mo e ngaahi puha “ʻIlo Lahi Ange.” ʻI he tuʻunga lahi tahá, ko e ngaahi lēsoní ʻoku totonu ke lāulea ʻi hono hokohoko leleí. Kae kehe, ongoʻi tauʻatāina ke hiki leva ki ha lēsoni ʻoku fekauʻaki mo ha meʻa ʻoku mahuʻingaʻia aí. Ko e fakatātaá, kapau ko ha ʻasemipilī pe ko ha fakataha-lahi ʻoku ofi mai, ʻe lava ke ke hiki ki he lēsoni 11.
4. Ko e hā ʻokú ke fiefia ai ʻi hono maʻu ʻa e polosiua foʻou ko ení?
4 ʻI he taimi ʻoku tau ako ai ʻa e Tohi Tapú mo ha taha, ʻoku tau tokoniʻi ia ke hoko ʻo maheni mo ʻetau Tamai fakahēvaní. Kae kehe, ʻoku toe fiemaʻu ke tau akoʻi ia fekauʻaki mo e kautaha ʻa Sihová. (Pal. 6:20) He fiefia ē ko kitautolu ke maʻu ʻa e polosiua foʻou ko ení ʻo ʻai ai ke faingofua hono fai iá!