ʻOkú Ke Ngāueʻaki ʻa e Polosiua Fiemaʻu ke Kamata ha Ngaahi Ako?
1 Naʻá ke ʻilo kapau ʻokú ke fai ha fetalanoaʻaki faka-Tohitapu ʻi ha founga tuʻumaʻu, neongo ʻoku nounou, mo ha tokotaha mahuʻingaʻia pea kāpui ai ha fakamatala ʻi he taha ʻo e ngaahi tohi ʻoku fokotuʻu atú, ʻokú ke fakahoko ha ako Tohitapu? ʻIo, ʻoku moʻoni ʻeni neongo ai pē kapau ko e akó ʻoku fai ʻi he matapaá pe fakafou ʻi he telefoní. Ko e hā ʻoku ʻikai ai ke fai ha feinga makehe he lolotonga ʻo Mē mo Suné ke kamata ha ako pehē ʻo ngāueʻaki ʻa e polosiua Fiemaʻu?
2 Teuteu Koeʻuhi kae Lavameʻa: ʻI hono tuʻuaki ʻa e polosiua Fiemaʻu, ʻai ke maʻalaʻala ʻi ho ʻatamaí ʻa e meʻa ʻokú ke loto ke lāulea ki aí. Kapau ʻokú ke fai ha toe ʻaʻahi, fakakaukau fekauʻaki mo e fetalanoaʻaki naʻá ke fai ʻi he ʻuluaki ʻaʻahí. ʻEke hifo kiate koe: ‘Ko fē ha ngaahi palakalafi ʻi he polosiuá ʻe lava ke u fakahanga ki ai ʻa e tokangá ke fakatupulekina ai ʻa e fetalanoaʻakí pea iku ai ki ha ako Tohitapú?’ Kapau ʻokú ke ʻaʻahi fale-ki-he-fale, fakakaukau pe ko e hā ha ngaahi kaveinga ʻe fakamānako ki ha taʻu hongofulu tupu, ki ha tokotaha taʻumotuʻa ange, ki ha tangata, pe ki ha fefine. Fakamanatu ʻa e ngaahi tuʻunga-lea ʻo e polosiuá, pea fili ha kaveinga ʻoku mahuʻingá. Hili ha fakakaukau ki ha fakaofiofi, ʻahiʻahiʻi ia ʻi ha ngaahi taimi. Ko e taha ia ʻo e kī ki he lavameʻá.
3 ʻOku ʻomai ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Sanuali 2002 ha “Ngaahi Fokotuʻu [ʻe valu] ki Hono Tuʻuaki ʻo e Polosiua Fiemaʻu.” Ko e kiʻi puha “Ko e Fakaofiofi Fakahangatonú” ʻoku fakahaaʻi mai ai ʻa e founga ke ngāueʻaki ai ʻa e polosiuá ke kamata ha ngaahi ako. Te ke liliu nai ʻa e ʻuluaki fokotuʻu hoko haké:
◼ “Naʻá ke ʻiloʻi ʻi ha ngaahi miniti siʻi pē, te ke lava ai ke maʻu ha tali ki ha fehuʻi faka-Tohitapu mahuʻinga? Ko e fakatātaá, ko e hā ʻa e ʻuhinga ʻoku lahi pehē fau ai ʻa e ngaahi lotu ʻoku nau taku ko e Kalisitiané? Kuó ke fifili fekauʻaki mo ia?” Hili ʻa e tali ʻa e tokotahá, huke ki he lēsoni 13 pea fetalanoaʻaki ʻi he ʻuluaki ongo palakalafi ʻe uá. Fakatatau ki he taimí, lau pea fetalanoaʻaki ʻi ha konga Tohitapu ʻe taha pe ua. Pea lau leva ʻa e fehuʻi fakaʻosi ʻi ʻolunga ʻi he pēsí, peá ke pehē: “ʻOku fakamamafaʻi ʻe he toenga ʻo e lēsoní ʻa e ngaahi fakaʻilonga ʻe nima ʻo e lotu moʻoní. Te u fiefia ke toe foki mai ke ta lāulea mo koe ki he meʻá ni.”
4 Kīvoi: Ngāueʻaongaʻaki ʻa e faingamālie kotoa pē ke fakahāhā ha ako Tohitapu ʻi he polosiua Fiemaʻu. Kole ʻa e tāpuaki ʻa Sihová. (Mt. 21:22) Ko hoʻo kīvoi ʻi hoʻo ngaahi feingá, te ke hokosia nai ai ʻa e fiefia ʻi hano tokoniʻi ha taha ke ne tali ʻa e ongoongo leleí!