Falala kia Sihova ke Ne Fakatupu ʻa e Ngaahi Meʻá
1 “Naʻá ku hokosia ʻi he ʻuluaki taimí ʻa e fiefia taʻehano tatau ʻo hono tokoniʻi ke fokotuʻu ha fakatahaʻanga foʻou. Ko e ngāue tōtōivi ko ʻení naʻe feʻunga mo e taʻu ʻe ua pe lahi ange, lotu tuʻumaʻu pea falala kia Sihova te ne ‘fakatupu ʻa e ngaahi meʻá.’” Ko e tohi ia naʻe fai ʻe ha tāimuʻa loto-tōnunga ʻa ia naʻá ne ako ʻa e fiemaʻu ke falala kia Sihová ki ha tupu. (1 Kol. 3:5-9) ʻI heʻetau fekumi ko ia ki he kakai ʻoku hehema fakalaumālié, ʻoku fiemaʻu kiate kitautolu ke kole ki he ʻOtuá kapau ko ʻetau ngāue fakafaifekaú ke ʻi ai ha tupu.—Pal. 3:5, 6.
2 Ko e Tupú ʻOku Fiemaʻu ʻa e Ngoueʻi: Ko e tenga ʻo e moʻoní ʻoku fiemaʻu ke ngoueʻi kapau ko e ʻaí ke tupu. Ko e toe ʻaʻahi ʻi ha ʻaho ʻe taha pe ua hili ʻa e ʻuluaki ʻaʻahí ʻoku faʻa maʻu ai ʻa e ola lelei. ʻAi ke loto-māfana pea anga-fakakaumeʻa. ʻAi ʻa e kakai kehé ke fiemālie. ʻOua te ke fai kotoa ʻa e talanoá. ʻAi ia ke ne ʻiloʻi koe, pea fakahā ange ʻokú ke mahuʻingaʻia ʻiate ia ko ha tokotaha.
3 ʻI he lolotonga ʻo Siulaí pea hoko atu ki ʻAokosí, te tau tokangataha ai ki hono tuʻuaki ha ngaahi polosiua kehekehe ki he kakai ʻoku tau fetaulakí. Kae kehe, ʻoku toe fiemaʻu kiate kitautolu ke tau toe foki ki he mahuʻingaʻia naʻe maʻú pea ki he ngaahi tohi naʻe tukú. Te tau fai ʻeni ʻaki hono fai ha ngaahi toe ʻaʻahi pea tuʻuaki ha ngaahi ako Tohitapu. (Mt. 28:19, 20) Ki he taumuʻa ko ʻení, ʻe ngāueʻaki nai ʻa e polosiua Fiemaʻu ke kamata ha ngaahi ako. Te ke ʻilo nai ʻoku ʻaonga ʻa e ngaahi fokotuʻu ʻe fā ʻoku hoko haké.
4 Kapau naʻá ke talanoa mo ha taha naʻá ne hohaʻa fekauʻaki mo e founga ʻoku huʻu ki ai ʻa e māmaní, te ke fakafoʻou nai ʻa e fetalanoaʻakí ʻaki hoʻo pehē:
◼ “ʻOku ou tui ʻokú ke loto-moʻua hangē pē ko aú ʻo fekauʻaki mo e tō lalo ʻa e ʻulungaanga ʻi he sōsaieti ʻo e faʻahinga ʻo e tangatá. ʻOku tau fanongo ki he ngaahi līpooti fakamamahi ʻo e fakamālohi ʻi he fāmilí, ʻoku iku ai ki he pāʻusiʻi ʻo e fānaú, ngaahi mātuʻá, pea mo e ngaahi hoa malí. Pea ʻoku hangē pē ha meʻa noá ia ki he kakaí ke loi, pe kaihaʻa ke fakafiemālieʻiʻaki ʻenau ngaahi holi ʻanautolú. ʻOkú ke fakakaukau ʻoku mahuʻinga ki he ʻOtuá ʻa e founga moʻui ʻoku moʻuiʻaki ʻe he kakaí? [Tuku ke ne tali.] Kuo fokotuʻu ʻe he ʻOtuá ʻa e ngaahi tuʻunga pau ki he tangatá ke ne moʻui ʻaki, pea ʻoku ʻikai ke fakamafasia ia kiate kitautolu.” Lau ʻa e 1 Sione 5:3. Tuʻuaki leva ʻa e polosiua Fiemaʻu, pea fakaava ia ki he lēsoni 10. Lau ʻa e palakalafi ʻuluakí. Lave ki he ngaahi foʻi lea mo e kupuʻi lea fakaʻītali ʻi he kamataʻanga ʻo e palakalafi 2-6, pea ʻeke ange ki he tokotaha-ʻapí pe ko fē ʻa e tōʻonga ʻokú ne pehē ʻoku kovi ange ki he sōsaietí. Lau ʻa e palakalafi ʻoku kau ki aí pea sio ki ha ngaahi konga Tohitapu ʻe taha pe ua kapau ʻoku faingamālie. Fakaʻosi ʻaki ʻa hono lau ʻa e palakalafi 7, pea fai leva ha ngaahi fokotuʻutuʻu ke toe foki atu ke fai ha fetalanoaʻaki lahi ange.
5 Ki he faʻahinga naʻá ke fetaulaki mo ia ʻoku nau tokanga fekauʻaki mo e fāmilí, ʻe lava ke ke leaʻaki ha meʻa hangē ko ʻení:
◼ “ʻOkú ke fakakaukau ʻoku ʻuhinga lelei ke ʻamanekina ʻe ʻomai ʻe he Tokotaha-Fakatupú kiate kitautolu ha ngaahi meʻangāue ʻoku fiemaʻu kiate kitautolu ke langa hake ʻaki ha moʻui fakafāmili lavameʻa?” Tuku ke ne tali. Fakaʻaliʻali ʻa e polosiua Fiemaʻu, huke ki he lēsoni 8, pea fakamatalaʻi ʻoku ʻi ai ʻa e ngaahi tefitoʻi moʻoni mei he Tohitapú ki he mēmipa kotoa pē ʻo e fāmilí. Tuʻuaki ange ʻa e founga hono ngāueʻaki ʻa e polosiuá fakataha mo e Tohitapú ke maʻu ha ʻaonga lahi ange mei ai. Muimui ʻi he ngaahi fakahinohino ʻoku maʻu ʻi he peesi 2 ʻo e polosiuá. Fai ha ngaahi fokotuʻutuʻu ke toe foki ki ai ke hoko atu hono ako ʻa e lēsoní, pe kapau kuó ke fakaʻosi ia, ke ako ha lēsoni ʻe taha ʻa ia ʻoku fili ʻe he tokotaha-ʻapí ʻi he polosiuá.
6 Ko ha lea hangatonu ʻeni te ke ngāueʻaki nai ke tuʻuaki ʻetau polokalama ako Tohitapú. Fakahā ange ʻa e polosiua “Fiemaʻu,” pea ke pehē:
◼ “ʻOku ʻi he polosiua ko ʻeni ʻa e founga ako fakalūkufua ʻokú ne kāpui ʻa e ngaahi tefitoʻi akonaki ʻa e Tohitapú. ʻI he peesi taki taha, te ke maʻu ai ʻa e ngaahi tali ki he ngaahi fehuʻi kuo faingataʻaʻia ai ʻa e kakaí ʻi he ngaahi laui senituli. Ko e fakatātaá, Ko e hā ʻa e taumuʻa ʻa e ʻOtuá ki he foʻi māmaní?” Huke ki he lēsoni 5, pea lau ʻa e ngaahi fehuʻi ʻi he kamataʻanga ʻo e lēsoní. ʻEke ange ki he tokotaha-ʻapí pe ko fē ha taha ʻokú ne mahuʻingaʻia lahi taha aí, pea lau leva ha palakalafi ʻoku fehoanaki mo iá, ʻo sio ki he ngaahi konga Tohitapu ʻoku feʻungamālié. Fakamatalaʻi ko e ngaahi tali fakafiemālie ki he ngaahi fehuʻi kehé ʻe lava ke faingofua hono maʻu iá ʻo hangē pē ko e taha ko ʻení. Fokotuʻu atu te ke toe foki ange ke mo fetalanoaʻaki ki ha fehuʻi mo e tali ʻe taha.
7 Pe ko hoʻo saiʻia nai ke ʻahiʻahi ha lea faingofua ki hono kamata ha ako Tohitapu ʻaki hoʻo pehē:
◼ “Naʻá ke ʻilo ko hono fai ha talanoa ʻi ha ngaahi miniti siʻi peé, te ke lava ai ke maʻu ha tali ki ha fehuʻi mahuʻinga faka-Tohitapu? Ko e fakatātaá, . . . ” Lave leva ki ha fehuʻi ʻoku hā ʻi he kamataʻanga ʻo ha taha ʻo e ngaahi lēsoni ʻi he polosiuá, ha taha ko ē ʻoku ke fakakaukau ʻe lava ke fakamānako ki he tokotaha ko iá. Ki ha ngaahi fakakaukau ʻe niʻihi ki he ngaahi fehuʻi te ke ngāueʻakí, sio ki he palakalafi 15 mo e 16 ʻo e fakalahi ʻi he ʻEtau Ngāue Fakafaifekau ʻo e Puleʻanga ʻo Maʻasi 1997, ʻoku fakakaveinga ai: “Fai Mālohi ʻi Hono Fai ʻa e Ngaahi Toe ʻAʻahí.”
8 Ko hono tali fiefia ʻa e pole ki hono fai ʻa e ngaahi toe ʻaʻahí pea mo hono fai ʻa e ngaahi ako Tohitapú, ko e konga ia ʻo ʻetau hoko ko e kau “kaungāngaue” mo e ʻOtuá. (1 Kol. 3:9) ʻI heʻetau ngāue mālohi ke fakatupulekina ha mahuʻingaʻia ʻoku tau maʻú pea falala foki kia Sihova ke ne fakatupu ʻa e ngaahi meʻá, te tau hokosia ai ʻa e fiemālie moʻoni ʻa ia ʻoku ʻikai ha toe ngāue kehe te ne lava ke ʻomai.