Fokotuʻu Muʻomuʻa ʻa e Ngaahi Meʻa Mahuʻinga Angé

¹ Ko e hā ʻa e ngaahi meʻa mahuʻinga ʻoku fiemaʻu ki heʻetau moʻui lelei fakalaumālié? ʻOku pau ʻe fakakau ki he ngaahi meʻá ni ʻa e ako fakafoʻituitui, maʻu ʻa e ngaahi fakatahá, lotu tōtōivi, feohi lelei, pea mo e ngāue fakafaifekau faka-Kalisitiané. ʻE ʻikai malava ke tau tauhi maʻu ʻa e moʻui lelei fakalaumālié ʻo ka ʻikai ke tauhi ke tuʻu-ki-muʻa ʻa e ngaahi meʻa mahuʻingá ʻi heʻetau moʻuí.

² Kae kehe, ko kitautolu kotoa pē ʻoku tau faitau fakafepaki ki he ngaahi holi fakakakanó pea ʻoku fiemaʻu kiate kitautolu ha akonaki. (Kal. 5:17) ʻOku totonu ke ʻoua ʻaupito te tau ongoʻi ʻe lahi ange ʻa e meʻa te tau maʻú ʻaki haʻatau tulimui ki he ngaahi meʻa mahuʻinga siokitá. (Sel. 17:9) Ko ia ai, ke tau maluʻi hotau lotó pea fakaʻehiʻehi mei hano takihalaʻi, ʻoku mahuʻinga ʻa e sivisiviʻi maʻu pē kitá.​—Pal. 4:23; 2 Kol. 13:5.

³ Sivisiviʻi Ho Loto Pē ʻOʻoú: ʻE lava ke ke fai ʻeni ʻaki hoʻo ʻeke fakahangatonu hifo kiate koe ha ngaahi fehuʻi: ʻOku ou holi mālohi ke lau ʻa e Folofola ʻa e ʻOtuá? (1 Pita 2:2) ʻOku ou houngaʻia ʻi he mahuʻinga ʻo hono maʻu ʻa e kotoa ʻo e ngaahi fakataha ʻa e fakatahaʻangá? (Hep. 10:​24, 25) ʻOku ou fai tōtōivi ʻeku lotú? (Loma 12:12) ʻOku ou kumi ke feohi mo e kakai ʻoku fakakaukau fakalaumālié? (Loma 1:​11, 12) ʻOku ou ongoʻi ʻoku ʻi ai hoku fatongia fakafoʻituitui ke talaki atu ʻa e ongoongo leleí? (1 Kol. 9:16) Ko ha ngaahi tali fakafiemālie ʻe fakahā ai ʻokú ke holi ke ʻuluaki fakamuʻomuʻa ʻa e ngaahi meʻa mahuʻinga angé.

⁴ Sivisiviʻi Hoʻo Taimi-Tēpile Fakaʻahó: ʻOku fiemaʻu ke ke ngāue ki he sivisiviʻi ʻa e ngaahi holi ʻo ho lotó ʻaki hono fokotuʻu ke ngāueʻaki ʻa e taimí ki he ngaahi meʻa ʻoku fakamuʻomuʻá. ʻOku fakakau heni hono fakataimi-tēpileʻi ʻa e taimi ki hono lau maʻu pē ʻo e Tohitapú pea mo e tatau kotoa pē ʻo e Taua Leʻo mo e Awake!, pea pehē foki ʻa e teuteu ki he ngaahi fakatahá. Kuo pau foki ke vaheʻi ha taimi fakatouʻosi ki he ako fakafāmilí mo e lotu fakataha. Fokotuʻu ha fakangatangata ki he lahi ʻo e taimi ʻoku fakamoleki ki he mamata TV pe fakafiefia kehé. Fakapapauʻi ke maʻu kotoa ʻa e ngaahi fakataha ʻa e fakatahaʻangá, pea fokotuʻutuʻu leva ʻa e ngaahi meʻa kehe kotoa pē ʻo tānaki mai ki ai. Palani ki he fāmilí kotoa ke kau ʻi he ngāue fakamalangá ʻi he uike taki taha.

⁵ ʻOku ʻikai ha veiveiua, ko hono fokotuʻu muʻomuʻa ʻa e ngaahi meʻa mahuʻinga angé ʻi heʻetau moʻuí ʻe fakamoʻoniʻi ai te ne ʻomai ʻa e fiefia.