Ngaahi Ako Tohitapu ʻOku Maʻu Ai ʻa e Kau Ākongá
1 “ʻOku ai ha meʻa ʻoku taʻofi ki haku papitaiso?” ko e fehuʻi ia ʻa e ʻiunoke ʻItiopeá ʻi he hili ʻa “ʻene [Filipe] malangaʻaki ʻa Sisu kiate ia.” (Ng. 8:27-39) ʻI he tafaʻaki ʻa e ʻiunoké, naʻá ne ʻosi maʻu ha ʻofa ki he ngaahi tohi kuo fakamānavaʻi ʻe he ʻOtuá, pea ʻi he hili ʻa hono maʻu ʻa e tokoni fakalaumālie meia Filipé, naʻá ne mateuteu ke hoko ko ha ākonga. Ka ʻoku ʻikai tui ʻa e kakai kotoa pē ʻoku fiemaʻu ke nau sivisiviʻi ʻa e ngaahi Konga Tohitapú ʻiate kinautolu.
2 Ko e meʻa ke fakamālōʻiá, kuo tokonaki mai ʻe he kautaha ʻa Sihová ʻa e ngaahi tohi lahi ke fakalototoʻaʻi ʻa e kakaí ke nau sivisiviʻi ʻa e pōpoaki ʻa e Tohitapú ki hotau ʻahó ni. Ko e ngaahi meʻangāue lelei ko ʻení kuo faʻu ia ke ne ueʻi ʻa e kakaí ke nau vakai ki he Tohitapú.
3 ʻI hono kamata ha ako Tohitapu, ʻe hoko ʻo tokoni ke fakamanatu ʻa e ngaahi fokotuʻu lelei ʻoku pulusi ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Sune 1996 ki he founga ʻe lava ai ke fai ha ako ola lelei ʻi he tohi ʻIlo. ʻI he lolotonga hono fai ʻa e akó, fakatokangaʻi ʻa e laka ki muʻa ʻoku fai ʻe he tokotaha akó koeʻuhi ke ke lava ʻo ʻilo ai pe ko fē ʻa e ngaahi tafaʻaki ʻe fiemaʻu ki ai ha tokanga lahi angé. Fakalototoʻaʻi ʻa e tokotaha akó ke ne teuteu ki muʻa ʻene lēsoní, mo vakaiʻi ʻa e ngaahi konga Tohitapú. Ko e ngaahi tali ʻoku fai ʻaki pē ʻene ngaahi lea pē ʻaʻaná ʻe tapua nai mei ai ʻene houngaʻia loloto ki he moʻoní. ʻOku faʻa fai ʻa e fakalakalaka vave ʻe he faʻahinga ʻoku nau toe fai ha lau tohi ʻi he ngaahi tohi ʻa e Sōsaietí pea maʻu maʻu pē ʻa e ngaahi fakataha ʻa e fakatahaʻangá. Fakalototoʻaʻi ia ke ne lea ʻi ha founga ʻikai anga-maheni ki he niʻihi kehé ʻo fekauʻaki mo e meʻa ʻokú ne akó. Fakahā anga-ʻofa ange kiate ia ʻa e meʻa ʻoku fiemaʻu ke ne fai ke ʻai ai ia ke ne fakalakalaka fakalaumālié. ʻOku ʻikai totonu ke tau fai ha ngaahi ako ʻo fuʻu fuoloa mo e faʻahinga taʻetaʻepaú. ʻOku moʻuaʻaki ʻe he kau akó ke nau tamuʻomuʻa ke ako, tuʻu fakamakatuʻu maʻá e moʻoní, pea fakalakalaka atu ki he fakatapui mo e papitaiso.
4 ʻI he ngaahi ʻapi ʻe niʻihi, ʻoku fai ai ʻa e ako ʻo laka hake ʻi he ako ʻe tahá, he ko e ngaahi mēmipa kehekehe ʻo e fāmilí ʻoku nau ako kehekehe. Kae kehe, ko hono fai ha ako fakafāmili fakataha ʻoku lelei ange nai ia ʻi he ngaahi tafaʻaki lahi, koeʻuhi ʻe tokoni ai ki hono fakafāʻūtahaʻi fakalaumālie ʻa e fāmilí.
5 Ko e fekau ʻa Sīsuú ke tau ō ʻo ngaohi ākonga. (Mt. 28:19) Ke fai iá, kuo pau ke tau fai ʻa e ngaahi ako Tohitapu ʻa ia ʻe tokoniʻi ai ʻa e kau akó ke nau fakalakalaka atu ki ha tuʻunga ʻa ia te nau fehuʻi ai ʻo pehē, “ʻOku ai ha meʻa ʻoku taʻofi ki haku papitaiso?”