Fakahoko ʻa e Ngaahi Ako Tohi Tapu Ola Lelei
1. Ko e hā ʻa e fatongia ʻoku maʻu ʻe he kau malanga ʻoku nau fakahoko ʻa e ngaahi ako Tohi Tapú?
1 ʻOku ʻikai lava ha taha ke tauhi ki he ʻOtuá kae ʻoua kuo “tohoaki mai ia” ʻe Sihova. (Sione 6:44) Kae kehe, ko e kau malanga ʻoku nau fakahoko ʻa e ngaahi ako Tohi Tapú kuo pau ke nau fai ʻenau tafaʻakí ʻi hono tokoniʻi ʻa e kakaí ke nau ʻunuʻunu ofi ki heʻenau Tamai fakahēvaní. (Sēm. 4:8) ʻOku fiemaʻu heni ʻa e teuteu. Ko hono lau pē ʻa e palakalafi taki taha mo ʻeke ʻa e fehuʻi ʻoku haá ʻoku ʻikai ke feʻunga ia ke tokoniʻi ʻetau kau akó ke nau mahinoʻi ʻa e pōpoakí pea fai ha fakalakalaka.
2. Ko e hā ʻe fakahoko ʻe ha ako Tohi Tapu ola lelei?
2 Ke fakahoko ha ngaahi ako ola lelei, kuo pau ki he kau malangá ke nau tokoniʻi ʻenau kau akó ke nau (1) mahinoʻi ʻa e meʻa ʻoku akoʻi ʻe he Tohi Tapú, (2) tali ʻa e meʻa ʻoku akoʻi ʻe he Tohi Tapú, mo e (3) ngāueʻaki ʻa e meʻa ʻoku akoʻi ʻe he Tohi Tapú. (Sione 3:16; 17:3; Sēm. 2:26) ʻE fiemaʻu ha ngaahi māhina ke tataki ha tokotaha ʻi he ngaahi sitepu ko ení. Ka, ko e sitepu taki taha ʻoku fakahaaʻi ai ʻa ʻene fakatupulekina ha vahaʻangatae mo Sihova pea fai ha fakatapui kiate ia.
3. Ko e hā ʻoku ʻeke ai ʻe he kau faiako ola leleí ʻa e ngaahi fehuʻi fakatupu fakakaukaú?
3 Ko e Hā ʻa e Fakakaukau ʻa e Tokotaha Ako Tohi Tapú?: Ke ʻiloʻi pe ʻoku mahinoʻi mo tali ʻe he tokotaha ako Tohi Tapú ʻa e meʻa ʻokú ne akó, fakaʻehiʻehi mei he fai toko taha pē ʻe koe ʻa e fakamatalá kae fakalototoʻaʻi ʻa e tokotaha akó ke ʻomai ʻene fakakaukaú. (Sēm. 1:19) ʻOkú ne mahinoʻi ʻa e meʻa ʻoku leaʻaki ʻe he Tohi Tapú ʻi he kaveinga ʻoku lāulea ki aí? ʻE lava ke ne fakamatalaʻi ʻa e kaveingá ʻi heʻene ngaahi lea pē ʻaʻana? ʻOku anga-fēfē ʻene ongoʻi fekauʻaki mo e meʻa kuó ne akó? ʻOkú ne tui ko e meʻa ʻoku akoʻi ʻe he Tohi Tapú ʻoku ʻuhinga lelei? (1 Tes. 2:13) ʻOkú ne mahinoʻi ko e meʻa ʻokú ne akó ʻoku totonu ke ʻai ai ke kehe ʻene founga moʻuí? (Kol. 3:10) Koeʻuhí ke maʻu ʻa e ngaahi tali ki he ngaahi fehuʻi ko iá, ʻoku fiemaʻu ke tau ʻeke ha ngaahi fehuʻi fakatupu fakakaukau fakapotopoto pea fanongo leva.—Māt. 16:13-16.
4. Ko e hā ʻoku totonu ke fai kapau ʻoku faingataʻa ke mahinoʻi pe ngāueʻaki ʻe ha tokotaha ako ʻa e meʻa ʻokú ne ako mei he Tohi Tapú?
4 Ko e ngaahi tōʻonga mo e ngaahi sīpinga fakaefakakaukaú kuo faʻa fokotuʻu maʻu mālohi ia pea ʻoku fiemaʻu ha taimi ke toʻo atu ia. (2 Kol. 10:5) Fēfē kapau ʻoku ʻikai ke tali pe ngāueʻaki ʻe heʻetau tokotaha akó ʻa e meʻa ʻokú ne akó? ʻOku fiemaʻu ʻa e kātaki ke fakaʻatā ha taimi feʻunga ki he Folofola ʻa e ʻOtuá mo e laumālie māʻoniʻoní ke ngāue ʻi he loto ʻo e tokotaha akó. (1 Kol. 3:6, 7; Hep. 4:12) ʻI he ʻikai tenge iá, ʻoku faʻa lelei ange ke hiki ki ha kaveinga kehe kapau ʻoku faingataʻa ki he tokotaha akó ke mahinoʻi pe ngāueʻaki ha akonaki Fakatohitapu. ʻI heʻetau hokohoko atu ke akoʻi ia ʻi he anga-kātaki mo e anga-ʻofa mei he Tohi Tapú, ʻe ueʻi nai ia ʻi ha taimi ke fai ha ngaahi feʻunuʻaki ʻoku fiemaʻu.