Fakaleleiʻi ʻEtau Pōtoʻi ʻi he Ngāue Fakafaifekaú—Akoʻi ʻa e Kau Ako Tohi Tapú ke Fakatupulekina ha Tōʻonga Ako Lelei

ʻUhinga ʻOku Mahuʻinga Aí: Koeʻuhi ke hoko ʻo matuʻotuʻa fakalaumālie, ʻoku fiemaʻu ki he kau ako Tohi Tapú ke fafangaʻaki honau ʻatamaí mo honau lotó ʻa e meʻa lahi ange ʻi he ngaahi akonaki tefito pē ʻa e Folofola ʻa e ʻOtuá. (Hep. 5:12–6:1) ʻOku fiemaʻu ki he akó ʻa e feinga. ʻOku kau ki ai hono fakafekauʻaki ʻa e fakamatala foʻoú mo e meʻa kuo tau ʻosi ʻiló pea lāuʻilo ki hono mahuʻingá. (Pal. 2:1-6) Ko e ako ke fai ʻa e fekumi fakafoʻituituí te ne ʻai ai ʻa e kau akó ke nau tali ʻa e ngaahi fehuʻi Fakatohitapú ʻo ngāueʻaki ʻetau ʻū tohi faka-Kalisitiané. Ko e feinga tōtōivi ʻoku nau fai ke ngāueʻaki ʻa e meʻa kuo nau akó ʻe teuʻi ai kinautolu ke matuʻuaki ʻa e ngaahi ʻahiʻahi te nau fehangahangai mo ia ʻi he tuʻunga ko ha Kalisitiane.—Luke 6:47, 48.

Founga Hono Fai Iá:

Fakamamafaʻi ʻa e mahuʻinga ʻo e kumi ki he tokoni ʻa Sihová ʻi he lotu ki muʻa ke kamata ʻa e ako taki taha.—Sione 14:26; 1 Kol. 2:10.
Fakalototoʻaʻi hoʻo tokotaha akó mei he kamataʻangá, ke teuteu ki muʻa ʻi heʻene ako Tohi Tapú. Fakahaaʻi kiate ia hoʻo tohi akó pea akoʻi ia ki he founga ke laineʻi pe fakaʻilongaʻi ʻa e ngaahi foʻi lea pe kupuʻi lea tefitó.
ʻAi hoʻo tokotaha akó ke ne tali ʻa e ngaahi fehuʻí ʻi he ngaahi lea pē ʻaʻana. Fakaʻehiʻehi mei hono ʻai e akó ke fehuʻi mo e tali ʻataʻatā pē ʻa ia ko hono lau hangatonu pē ʻe he tokotaha akó ʻa e ngaahi talí mei he tohí.
Fakalototoʻaʻi hoʻo tokotaha akó ke lau fakaʻaho ha konga mei he Folofola ʻa e ʻOtuá. Fakahaaʻi kiate ia ʻa e taimi-tēpile lau Tohi Tapu ʻi he jw.org, pe Taua Leʻo ʻo ʻOkatopa-Tīsema, 2009, peesi 15-18, ʻoku fakahaaʻi ai ʻa e founga ʻaonga ʻe lava ke ne fai ai ení. Ko hono fakatupulekina ʻa e tōʻonga ʻo e lau fakaʻaho ʻa e Tohi Tapú ʻe fiemaʻu ki ai ʻa e feinga mālohi, ka ʻe ʻaonga moʻoni ʻa e feingá.—Saame 1:2, 3.
Fakahaaʻi ki hoʻo tokotaha akó ʻa e founga ʻe lava ke ne maʻu ʻa e ngaahi tali ki he ngaahi fehuʻi Fakatohitapú ʻo ngāueʻaki ʻa e LAIPELI Taua Leʻo ʻI HE ʻINITANETÍ pe Tataki Fakaefekumi. Tokoniʻi ia ke ne ʻiloʻi ʻa e fakanounou ki he ʻū tohi ʻoku anga-maheni hono ngāueʻaki ʻi he ngaahi fakataha ʻa e fakatahaʻangá.

ʻAhiʻahiʻi Eni ʻi he Lolotonga ʻa e Māhiná:

ʻI he ngataʻanga ʻo ha kaveinga tokoni pe ko ha vahe, kole ki hoʻo ako Tohi Tapú ke ne fakanounouʻi ʻi ha ngaahi sētesi siʻi ʻa e meʻa kuó ne akó. Kapau ʻoku ʻikai ʻi ai haʻo ako, ʻahiʻahi fakanounouʻi ha fakamatala mei he Tohi Tapú pe ko ha palakalafi mei he Taua Leʻo ʻi ha ngaahi sētesi siʻi ke fakaleleiʻi hoʻo mahinoʻi ʻa e meʻa ʻokú ke laú.