“Tauhi Maʻu ʻa e Laumālie Taha”
NAʻE enginaki ʻe he ʻapositolo ko Paulá ki he kau Kalisitiane ʻi ʻEfesoó ke nau “fekātakiʻaki ʻi he ʻofa, ʻo feinga tōtōivi ke tauhi maʻu ʻa e laumālie taha ʻi he haʻi fāʻūtaha ko e melinó.”—ʻEf. 4:2, 3.
Ko e “taha,” pe fāʻūtaha ʻoku tau maʻú ʻoku ‘ʻa e laumālié’ ia. ʻOku ʻuhinga ení ko e hoko ʻa e fāʻūtahá koeʻuhí ko e ivi ngāue ʻo e ʻOtuá. Kae kehe, hangē ko ia naʻe fakahaaʻi ʻe Paulá, ko ʻetau fāʻūtahá ʻoku fiemaʻu ke tauhi maʻu. ʻE hai? Ko e moʻoni ko e Kalisitiane taki taha kuo pau ke ne fai ʻene tafaʻakí “ke tauhi maʻu ʻa e laumālie taha.”
Ke fakatātaaʻí, tau pehē pē ʻoku foaki atu ʻe ha taha haʻo kā foʻou. Ko e fatongia ʻo hai ke tauhi ia ke ʻi ha tuʻunga leleí? Ko e talí ʻoku māʻalaʻala. Heʻikai te ke tukuakiʻi ʻa e tokotaha naʻá ne ʻoatu ʻa e meʻaʻofá kapau ʻe maumau ʻa e kaá koeʻuhí naʻe ʻikai ke ke tokangaʻi lelei ia.
ʻI he tuʻunga meimei tatau, neongo ko ʻetau fāʻūtaha faka-Kalisitiané ko ha meʻaʻofa ia kuo foaki mai ʻe he ʻOtuá, ko e fatongia ia ʻo kitautolu taki taha ke tauhi maʻu ia. Kapau ʻoku ʻikai ke ke maʻu ha vahaʻangatae melino mo ha tokoua pe tuofefine, ʻoku fiemaʻu ke tau ʻeke hifo, ‘ʻOku ou fai ʻeku tafaʻakí ke tauhi maʻu ʻa e laumālie tahá ʻaki hono fakaleleiʻi ʻa e tuʻungá?’
“FEINGA TŌTŌIVI” KE TAUHI MAʻU ʻA E FĀʻŪTAHÁ
Hangē ko ia naʻe fakahaaʻi ʻe Paulá, ʻe fiemaʻu nai ʻi he taimi ʻe niʻihi ke tau ngāue mālohi ke tauhi maʻu ʻa e laumālie tahá. ʻE lava ke hoko ia tautefito ʻi he taimi ʻoku fakaʻitaʻi ai kitautolu ʻe ha tokoua pe tuofefine. ʻOku ʻuhinga ʻa hono tauhi maʻu ʻa e fāʻūtahá ʻe fiemaʻu maʻu pē ke tau fakaofiofi ki he tokotahá pea talanoa ki he palopalemá? ʻIkai ʻaupito. ʻEke hifo kiate koe, ‘Kapau te u ʻohake ʻa e palopalema ko ení ʻe pouaki nai ai ʻa e fāʻūtahá pe ʻe fakatupunga ai ha māvahevahe lahi ange?’ ʻI he taimi ʻe niʻihi ko e founga fakapotopotó ko hono tukunoaʻi pe fakamolemoleʻi ia.—Pal. 19:11; Mk. 11:25.
ʻEke hifo kiate koe, ‘Kapau te u ʻohake ʻa e palopalema ko ení ʻe pouaki nai ai ʻa e fāʻūtahá pe ʻe fakatupunga ai ha māvahevahe lahi ange?’
Hangē ko ia naʻe tohi ʻe he ʻapositolo ko Paulá, tuku ke tau hanganaki “fekātakiʻaki ʻi he ʻofa.” (ʻEf. 4:2) ʻOku pehē ʻe ha maʻuʻanga fakamatala ʻe taha ko e kupuʻi lea ko ení ʻe lava ke fakamatalaʻi ia ko hono “tali kinautolu ʻo fakatatau ki honau tuʻungá.” ʻOku ʻuhinga ení ʻoku tau tali ʻoku angahalaʻia ʻa hotau kaungātuí, ʻo hangē pē ko kitautolú. Ko e moʻoni, ʻoku tau feinga ke kofuʻaki “ʻa e angaʻitangata foʻou.” (ʻEf. 4:23, 24) Neongo ia, heʻikai lava ʻe ha taha ʻo kitautolu ʻo fakahoko haohaoa ia. (Loma 3:23) Kapau te tau tali ʻa e moʻoniʻi meʻa ko iá, ʻe faingofua ange ai ke tau fekātakiʻaki, faʻa fakamolemole, pea “tauhi maʻu ʻa e laumālie taha.”
ʻI heʻetau fakaleleiʻi ʻa e fetōkehekeheʻaki fakafoʻituituí—neongo kapau ʻoku tau fai pē ia ʻi hotau lotó—ʻe hokohoko atu ai ʻetau hokosia ʻa e “haʻi fāʻūtaha ko e melinó.” Ko e foʻi lea faka-Kalisi ʻoku liliu ko e “haʻi fāʻūtaha” ʻi he ʻEfesō 4:3 ʻoku fakalea ia ko e “ngaahi uouá” ʻi he Kolose 2:19. Ko e ngaahi uouá ko e ngaahi tīsiu mālohi ia ʻoku nau fakafehokotaki ʻa e ngaahi huí. ʻI ha tuʻunga meimei tatau, ko e melinó, pehē foki ki he ʻofa ki hotau fanga tokouá, ʻokú ne tokoniʻi kitautolu ke tau nofo ofi kiate kinautolu neongo pe ko e hā ha faʻahinga faikehekehe pē ʻoku tau maʻu.
Ko ia ʻi hono fakaʻitaʻi pe fakalotomamahiʻi koe ʻe ha kaungātui, feinga ke vakai ki he tokotaha ko iá ʻi he manavaʻofa kae ʻikai ko hono fakaangaʻi. (Kol. 3:12) Koeʻuhí ʻoku taʻehaohaoa ʻa e faʻahinga kotoa ʻo e tangatá, ko koe foki ʻoku ngalingali naʻá ke fakaʻitaʻi ha taha ʻi ha taimi. ʻI hono manatuʻi iá te ne tokoniʻi koe ke ke fai hoʻo tafaʻakí “ke tauhi maʻu ʻa e laumālie taha.”