Meʻa Lelei Ange ʻi he Liliú

KAPAU ʻoku ʻomai ʻe ha fuʻu ʻakau ha fua kovi, ko e palopalemá ʻe ʻikai ke solova ia ʻi hono tutuʻu hifo ha ngaahi vaʻa siʻi pē. Ko e fuʻu ʻakaú kuo pau ke tā hifo ia pea toʻo ʻa hono ngaahi aká mei he kelekelé. ʻOku totonu leva ke tō ha toe fuʻu ʻakau ʻe taha, ʻa e taha ko ia ʻokú ne ʻomai ʻa e fua leleí.​—Mātiu 7:​16-​20.

ʻI he ʻuhinga tatau, naʻa mo e kau feinga liliu ko ia ʻoku ʻi ai ʻenau ngaahi taumuʻa totonu tahá ʻoku nau feinga ke fakaleleiʻi pē ʻa e ngaahi fakaʻilonga ʻo e fehālaaki ʻi he sōsaieti fakaetangatá—ʻa e kākaá, fakamaau taʻetotonú, fakamasivá mo e kaihaʻá. Kae kehe, ko e tupuʻanga tefitó, ʻoku nofo loloto ange ia. Ko e meʻa ʻoku fiemaʻu ke liliú ko e fokotuʻutuʻú fakakātoa. Ko e meʻa eni ʻoku talaʻofa mai ʻe he Tohi Tapú.

Ko e Puleʻanga ʻo e ʻOtuá ko ha founga-pule fakahēvani ia ʻa ia te ne fai ʻa e meʻa lahi—ʻo lahi ʻaupito ange—ʻi hono toe faʻu pē, toe fakafuo, toe fokotuʻutuʻu, pe liliu ʻa e sōsaieti fakaetangatá. Ko e founga-pule ko iá te ne fakahaaʻi mai ha founga foʻou fakaʻaufuli ʻo hono fakalele ʻa e ngaahi meʻa ʻa e tangatá, ʻo fakafāʻūtahaʻi ʻa e faʻahinga kotoa ʻo e tangatá ʻi he malumalu ʻo ʻene pulé. Ko e founga-pule ko ení te ne tokangaʻi ʻa e ngaahi meʻa hangē ko e akó, ngāué, nofoʻangá, meʻakaí, moʻui leleí pea mo e ʻātakaí.

ʻOku fakamatala fakaekikite ʻa e Sāme 72:​12-​14 ki he meʻa ʻe fai ʻe he Tuʻi faka-Mīsaiá ki he faʻahinga ʻo e tangatá: “ʻOku ne fakahaofi ʻa e masiva ʻo ka tangi; ko e vaivai foki mo ia ʻoku ʻikai hano tokoni. Ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui. ʻOku ne huhuʻi honau laumalie mei he maumau mo e fakamalohi.”

Ka ʻo kapau ko e sōsaietí ke tauʻatāina fakaʻaufuli mei he kākaá, fakamaau taʻetotonú mo e fakamasivá, ko e moʻoni ʻe ʻikai ngata pē ʻi he pau ke liliu ʻa e founga-pulé ka ko e kakaí ʻe pau ke nau liliu mo kinautolu foki. Ko ia ai, ʻe ʻoange ʻe he Puleʻangá ki he tokotaha tāutaha ʻa e tataki fakafoʻituitui ki he founga ke tataki ai ha moʻui fiefia, mohu taumuʻa pea mo fakafiemālie. ʻOku talaʻofa ʻa e Tohi Tapú ko e Puleʻanga ʻo e ʻOtuá te ne tokoniʻi ʻa hono kakai ʻi māmaní ke nau liliu. Anga-fēfē?

ʻE akoʻi ʻe he Puleʻangá ʻa hono kakaí ki he ngaahi founga ʻa Sihova ko e ʻOtuá, ʻo tokoniʻi ai kinautolu ke fakatupulekina ʻa e tui mo e ʻofa. (Aisea 11:9) Ko e ʻofa ki he ʻOtuá ʻoku ueʻi ai ʻa e lotó ki he ngāue. Hangē ko ení, ʻi he ʻuluaki senitulí, naʻe fetaulaki ai ʻa Sīsū mo Sākeasi, ko ha tokotaha pule tānaki tukuhau ʻa ia naʻá ne maʻu ʻa e paʻanga maʻana ʻaki hono fakalahi taʻetotonu ʻa e tukuhau naʻe hilifaki ki he kakaí. Naʻe ʻikai fakamālohiʻi ʻe Sīsū ʻa e ʻōfisa kākā ko ení ke fakamaaʻi ia ʻi hono liliu ʻa ʻene ngaahi foungá. ʻI hono kehé, naʻe tokoniʻi ʻe Sīsū ʻa Sākeasi ke ne ʻiloʻi ʻa ʻene halá tonu pea fakatomala. Naʻe ueʻi ʻa Sākeasi ʻe he ʻilo totonu ʻo e ngaahi tefitoʻi moʻoni fakaʻotuá pea ʻe he ʻofa ki he ʻOtuá. Naʻá ne fai ʻa e ngaahi liliu lahi.​—Luke 19:​1-​10.

ʻIkai ko ha fakaleleiʻanga māʻolunga ange ia ki he ngaahi tōnounou ʻa e sōsaietí? Ko ha founga-pule haohaoa mo māʻoniʻoni ke ne tokangaʻi ʻa e ngaahi meʻa ʻa e faʻahinga ʻo e tangatá fakataha mo ha fakaueʻiloto fakafoʻituitui ki he tokotaha taki taha ke liliu ʻa ʻene ngaahi foungá. Te tau fiemaʻu he taimi ko iá ha liliu? ʻE ʻikai kei pehē, he ʻe hanga ʻe he ʻOtuá ʻo fakafoʻou ʻa e meʻa kotoa pē. ʻE mole atu ʻa e ngaahi meʻa muʻá ia.​—Fakahā 21:​4, 5.

[Fakatātā ʻi he peesi 10]

Ko e Puleʻanga ʻo e ʻOtuá te ne ʻomai, ʻo ʻikai ko ha fakatonutonu pē, ka ko e liliu fakaʻaufuli

[Fakatātā ʻi he peesi 11]

Lolotonga ʻene ʻi māmaní naʻe tokoniʻi ʻe Sīsū ʻa e faʻahinga tāutaha ke nau fai ha ngaahi liliu fakafoʻituitui