Potanga Ika

Ko e ngaahi fakatuʻutāmaki ʻi he meʻalelé ʻoku mate ai ʻa e kakai ʻe toko taha miliona tupu pea ʻoku lavea ai ʻa e toko 50 miliona nai ʻi he taʻu taki taha. Kae kehe, ko e laui miliona ʻo e fanga iká ʻoku lava ke nau lele fakataha fakapotanga pea ʻikai ke meimei ʻi ai ha fepakipaki. ʻOku anga-fēfē hono fai ia ʻe he fanga iká, pea ko e hā ʻe lava ke nau akoʻi mai kiate kitautolu fekauʻaki mo e founga ke fakasiʻisiʻi ai ʻa e ngaahi fepaki ʻa e meʻalelé?

Fakakaukau: ʻOku ako ʻa e potanga iká fekauʻaki mo ho nau ngaahi ʻātakaí ʻo fakafou ʻi honau matá mo honau ʻōkani fakaeongo makehe ʻoku ui ko e ʻuno loto. ʻOku nau ngāueʻaki ʻa e ngaahi ongo ko ení ke ʻiloʻi ʻa e feituʻu ʻoku ʻi ai ʻa e fanga ika kehé ʻi he ngaahi ʻēlia ʻe tolu takatakai ʻiate kinautolú, pea nau ngāue leva ʻo hangē ko ení:

1. Fononga fakamatapapa. ʻOku nau fakahoa ʻa e vave ʻo e ika ʻi honau tafaʻakí pea nau tauhi maʻu honau vāmamaʻo meiate kinautolú.

2. Vāvāofi. ʻOku nau tulituli ke ofi ange ki he ika ʻoku mamaʻo atú.

3. Fakaʻehiʻehi mei he fepakipakí. ʻOku nau liliu ʻa e feituʻu ʻoku nau huʻu ki aí ke fakaʻehiʻehi mei he fepaki mo e ika kehé.

Fakatuʻunga ʻi he anga ko ia ʻe tolu ʻo e potanga iká, naʻe faʻu ai ʻe ha kautaha faʻuʻanga kā ʻi Siapani ʻa e fanga kiʻi kā lōpoti ʻe lava ke nau fononga fakakulupu ʻo ʻikai ke fepakipaki. ʻI he ʻikai ngāueʻaki ʻa e matá, ʻoku ngāueʻaki ʻe he ngaahi lōpotí ʻa e ngaahi tekinolosia fakaefetuʻutaki kae ʻikai ko ha ʻuno loto, ʻoku nau ngāueʻaki ʻa e leisa fakafuofua mamaʻo. ʻOku tui ʻa e kautahá ko e tekinolosia ko ení ʻe tokoni ia kiate kinautolu ke faʻu ʻa e ngaahi meʻalele “ʻe ʻikai lava ʻo fepakipaki” pea “tokoni ia ki ha ʻātakai lelei pea ʻikai ke toe ʻi ai ha fihituʻu ʻi he fefonongaʻakí.”

“ʻOku tau toe faʻu ʻa e anga ʻo e potanga iká [ʻaki] hono ngāueʻaki kakato ʻa e ngaahi tekinolosia foʻou,” ko e lau ia ʻa Toshiyuki Andou, ko e ʻenisinia pule ia ʻo e fokotuʻutuʻu ngāue ʻo e kā lōpotí. “ʻOku tau ʻi he māmani ʻo e mīsiní, ʻoku lahi ʻa e meʻa ke tau ako mei he anga ʻo e potanga iká.”

Ko e hā hoʻo fakakaukaú? ʻOku hoko mai pē nai ʻa e potanga iká mei ha founga taʻefakakaukauʻí? Pe naʻe faʻu ia ke pehē?