Ko e Lōmakí ʻo Aʻu ki he Fakahaofi mei ʻIsipité

Ko e toko valu pē naʻe hao moʻui atu ʻi he Lōmakí, ka ʻi he ʻalu pē ʻa e taimí naʻa nau tupu ʻo laui afe. Pea hili ʻa e taʻu ʻe 352 mei he Lōmakí, naʻe fāʻeleʻi ʻa ʻĒpalahame. ʻOku tau ako heni ki hono tauhi pau ʻe he ʻOtuá ʻene talaʻofá ʻi heʻene ʻoange ha foha naʻe fakahingoa ko ʻAisake kia ʻĒpalahame. Pea naʻe fili ai ʻe he ʻOtuá ʻa Sēkope mei he ongo foha ʻo ʻAisaké.

Naʻe maʻu ʻe Sēkope ha fāmili tokolahi ko hono ngaahi foha ʻe toko 12 mo hono ngaahi ʻofefine. Ko e ngaahi foha ʻe toko 10 ʻo Sēkope naʻa nau fehiʻa ʻi honau tehina ko Siosifa pea naʻa nau fakatau ia ke nofo pōpula ʻi ʻIsipite. Ki mui mai, naʻe hoko ʻa Siosifa ko e pule mahuʻinga ʻi ʻIsipite. ʻI he hoko ʻa ha fuʻu honge, naʻe ʻahiʻahiʻi ʻe Siosifa hono ngaahi tokouá ke ʻilo pe kuo liliu honau lotó. Faifai atu pē, ko e fāmili kotoa ʻo Sēkopé, ko e kau ʻIsilelí, naʻa nau hiki ki ʻIsipite. Naʻe hoko ia hili ʻa e taʻu ʻe 290 mei hono fāʻeleʻi ʻo ʻĒpalahamé.

ʻI he taʻu ʻe 215 hoko mai ai naʻe nofo ʻa e kau ʻIsilelí ʻi ʻIsipite. ʻI he hili ʻa e mate ʻa Siosifá, naʻa nau hoko ko e kau pōpula ʻi ai. Faifai atu pea naʻe fāʻeleʻi ai ʻa Mōsese, pea naʻe ngāueʻaki ia ʻe he ʻOtuá ke fakahaofi ʻa e kau ʻIsilelí mei ʻIsipite. Ko hono fakakātoá, ko e taʻu ʻe 857 ʻo e hisitōliá ʻoku lau ki ai ʻa e Konga UÁ.