Naʻe Langa ʻe he Kau Tangata ha Fuʻu Taua

NAʻE ʻosi atu ha ngaahi taʻu lahi. Naʻe tokolahi ʻa e fānau ʻa e ngaahi foha ʻo Noá. Pea naʻe lalahi hake ʻenau fānaú ʻo toe ʻi ai mo ʻenau fānau foki. Naʻe ʻikai ke fuʻu fuoloa kuo tokolahi ʻa e kakai ʻi he māmaní.

Ko e tokotaha ʻo e kakai ko ení ko e mokopuna hono ua ʻo Noa naʻe hingoa ko Nimilote. Ko e tangata kovi naʻá ne tuli manu mo tāmateʻi fakatouʻosi ʻa e fanga manú mo e tangatá. Naʻe toe ʻai pē foki ʻe Nimilote ia ko e tuʻi ke pule ki he kakai kehé. Naʻe ʻikai ke saiʻia ʻa e ʻOtuá ʻia Nimilote.

Ko e kakai kotoa ʻi he taimi ko iá naʻa nau lea ʻi he lea pē ʻe taha. Naʻe fiemaʻu ʻe Nimilote ke fakatahaʻi ai pē ʻa e kakaí kae lava ke ne puleʻi kinautolu. Ko ia, ʻokú ke ʻilo ʻa e meʻa naʻá ne faí? Naʻá ne tala ki he kakaí ke nau langa ha kolo mo ha fuʻu taua ʻi ai. Vakai kiate kinautolu ʻi he fakatātaá ʻoku nau ngaohi ʻa e ngaahi piliki.

Naʻe ʻikai ke fiefia ʻa Sihova ko e ʻOtuá ʻi he langa ko ʻení. Naʻe fiemaʻu ʻe he ʻOtuá ʻa e kakaí ke mafola atu pea nofoʻi ʻa e māmaní kotoa. Ka naʻe pehē ʻe he kakaí: ‘ʻE, tau langa haʻatau kolo, mo ha taua ʻo fuʻu māʻolunga fau ke aʻu hono tumutumú ki he langí. Pea ʻe ʻiloa ai kitautolu!’ Naʻe fiemaʻu pē ʻe he kakaí ʻa e lāngilangi maʻanautolu pē, kae ʻikai maʻá e ʻOtuá.

Ko ia naʻe ʻai ʻe he ʻOtuá ʻa e kakaí ke tuku hono langa ʻa e tauá. ʻOkú ke ʻilo pe naʻe anga-fēfē ʻene fai iá? ʻAki ʻene ʻai fakafokifā ʻa e kakaí ke nau lea ʻi he ngaahi lea kehekehe, kae ʻikai ko e lea pē ʻe taha. Naʻe ʻikai toe femahinoʻaki ʻa e kau langá. Ko hono ʻuhinga ia naʻe ui ai honau koló ko Pēpeli, pe Pāpilone, ko hono ʻuhinga ko e “Maveuveu.”

Naʻe kamata leva ke hiki ʻa e kakaí mei Pēpeli. Naʻe ʻalu ʻa e kakai naʻa nau lea ʻi he lea tataú ʻo nofo fakataha ʻi he ngaahi feituʻu kehekehe ʻo māmaní.