Ko e Ongo Misi ʻa Feló

ʻI HE ʻosi ha taʻu ʻe ua, pea mo e kei nofo pilīsone pē ʻa Siosifa. Naʻe teʻeki ai pē ke manatuʻi ia ʻe he tangata tauhi ipú. Pea ʻi he pō ʻe taha naʻe ʻi ai ʻa e ongo misi makehe ʻa Felo, pea naʻá ne fifili pe ko e hā hona ʻuhingá. ʻOkú ke sio ko ia eni ʻoku mohé? ʻI he pongipongi hono hokó naʻe ui ʻe Felo ʻene kau tangata potó pea naʻá ne tala kiate kinautolu ʻa e ngaahi meʻa ʻi heʻene misí. Ka naʻe ʻikai malava ke nau fakahā kiate ia ʻa e ʻuhinga ʻo e ongo misí.

Naʻe faifai pea toki manatuʻi ʻe he tangata tauhi ipú ʻa Siosifa. Naʻá ne pehē kia Felo: ‘ʻI heʻeku ʻi pilīsoné naʻe ʻi ai ʻa e tangata naʻá ne lava ʻo fakamatala ʻa e ʻuhinga ʻo e misí.’ Naʻe ʻai leva ʻe Felo ke ʻomai ʻa Siosifa mei he pilīsoné he taimi pē ko iá.

Naʻe fakahā ʻe Felo kia Siosifa ʻene ongo misí: ‘Naʻá ku sio ki ha fanga pulu sino mo fakaʻofoʻofa ʻe fitu. Pea naʻá ku toki sio ki he fanga pulu tutue mo huihuia ʻe fitu. Pea naʻe kai ʻo ʻosi ʻe he fanga pulu tutué ʻa e fanga pulu sisinó.

‘ʻI heʻeku misi hono uá naʻá ku sio ki he fuʻu uite ʻe fitu ʻi he sino pē ʻe taha naʻe fuo lalahi mo lelei. Pea naʻá ku toki sio ki he fuʻu uite ʻe fitu, naʻe fua mate. Pea naʻe hanga ʻe he fuʻu uite fua maté ʻo folo kotoa ʻa e fuʻu uite fua lelei ʻe fitú.’

Pea naʻe pehē ʻe Siosifa kia Felo: ‘Ko e ongo misí ʻokú na ʻuhinga tatau pē. Ko e pulu sino ʻe fitú, pea mo e uite fua lelei ʻe fitú ʻoku ʻuhinga ki ha taʻu ʻe fitu, pea ko e pulu tutue ʻe fitú mo e fuʻu uite fua mate ʻe fitú ʻoku ʻuhinga ia ki ha toe taʻu ʻe fitu kehe. ʻE ʻi ai ʻa e taʻu ʻe fitu ʻe lahi ai ʻa e meʻakai ʻe maʻu ʻi ʻIsipite. Pea ʻe toki hoko mo e taʻu ʻe fitu ʻe siʻisiʻi ʻa e meʻakai ʻe tupu ai.’

Ko ia naʻe fakahā ʻe Siosifa kia Felo: ‘Fili ha tangata poto pea ʻai ia ke ne tokangaʻi hono tānaki mai ʻo e meʻakaí ʻi he lolotonga ʻo e ngaahi taʻu mahu ʻe fitú. Pea ʻe ʻikai ke fiekaia ʻa e kakaí lolotonga ʻa e ngaahi taʻu kovi ʻe fitu ʻe hoko mai ʻa ia ʻe ʻikai ke lahi ai ʻa e meʻakai ʻe tupu aí.’

Naʻe saiʻia ʻa Felo ʻi he fakakaukaú. Peá ne fili pē ʻa Siosifa ke ne tānaki ʻa e meʻakaí, mo tauhi ia. Naʻe hoko ʻa Siosifa ko e tangata mahuʻinga taha ʻi ʻIsipite tukukehe ʻa Felo.

ʻI he ʻosi ha taʻu ʻe valu mei ai, lolotonga ʻo e hongé, naʻe sio ʻa Siosifa ki ha kau tangata ʻoku nau haʻu. ʻOkú ke ʻilo pe ko hai kinautolu? Ko hono ngaahi tokoua ia ʻe toko 10! Naʻe fekau kinautolu ʻe heʻenau tamai ko Sēkopé ke nau haʻu ki ʻIsipite koeʻuhi he naʻe mei ʻosi ʻenau meʻakai ʻi honau ʻapi ʻi Kēnaní. Naʻe ʻilo ʻe Siosifa ko hono ngaahi tokouá, ka naʻe ʻikai te nau ʻiloʻi ia. ʻOkú ke ʻilo hono ʻuhingá? Koeʻuhi he kuo motuʻa ange ʻa Siosifa, pea kuó ne teuteu ʻaki ʻa e faʻahinga vala kehe ia.

Naʻe kei manatuʻi pē ʻe Siosifa naʻá ne misi ʻi heʻene kei siʻí ʻo fekauʻaki mo e haʻu ʻo punou ange ki ai ʻa hono ngaahi tokouá. ʻOkú ke manatuʻi haʻo lau ʻo fekauʻaki mo ia? Ko ia naʻe ʻilo ʻe Siosifa ko e ʻOtuá naʻá ne ʻomai ia ki ʻIsipité, pea naʻe ʻi ai ha ʻuhinga lelei ki ai. Ko e hā hoʻo fakakaukau ki he meʻa ʻe fai ʻe Siosifá? Tau sio ange ki ai.