Ko e Ngaahi ʻĀ ʻo Sielikō

KO E HĀ ʻokú ne ʻai ʻa e ngaahi ʻā ko ʻeni ʻo Sielikō ke holó? ʻOku hangē naʻe lī ai ha foʻi pomú. Ka ʻi he ngaahi ʻaho ko iá naʻe ʻikai ha ngaahi pomu ia ai; pea naʻe ʻikai foki ke ʻi ai ha ngaahi meʻafana ia. Ko ha mana mo ʻeni ʻe taha ʻa Sihova! Tau ako ke ʻilo pe naʻe anga-fēfē ʻene hokó.

Fanongo ki he meʻa naʻe tala ʻe Sihova kia Siōsiuá: ‘Ko koe mo hoʻo kau tangata taú te mou laka takatakai ʻi he koló. Laka takai tuʻo taha ʻi he ʻaho, ʻo fai pehē ʻi he ʻaho ʻe ono. Fua ʻa e puha ʻo e fuakavá ʻo mou ō mo ia. Ko e kau taulaʻeiki ʻe toko fitu te nau laka ʻi muʻa pea ifi ʻenau ngaahi meʻalea.

‘ʻI he ʻaho hono fitú te mou laka takai tuʻo fitu ʻi he koló. Pea ifi fakaʻaulolongo ʻa e ngaahi meʻaleá, mo kaila leʻo lahi ʻa e kakai kotoa pē. Pea ʻe holo ki lalo ʻa e ngaahi ʻā!’

Naʻe fai ʻe Siōsiua mo e kakaí ʻa e meʻa naʻe tala ʻe Sihová. ʻI heʻenau laká naʻe fakalongolongo ʻa e tokotaha kotoa pē. Naʻe ʻikai ke lea ha taha. Ko e meʻa pē naʻe ongoná ko e leʻo ʻo e ngaahi meʻaleá mo e laka ʻa e vaʻé. ʻOku pau pē naʻe ilifia ʻa e ngaahi fili ʻo e kakai ʻa e ʻOtuá ʻi Sielikō. ʻOkú ke sio ki he afo kulokula ʻoku tautau ʻi he matapā sioʻatá? Ko e matapā sioʻata ia ʻo hai? ʻIo, naʻe fai ʻe Lēhapi ʻa e meʻa naʻe tala ange ʻe he ongo sipaí ke ne faí. Ko e kotoa hono fāmilí kau ai mo ia ʻoku nau ʻi loto ʻo mamata mei ai.

Fakaʻosí, ʻi he ʻaho hono fitú, ʻi he hili ʻenau laka takai tuʻo fitu ʻi he koló, naʻe ifi ʻa e ngaahi meʻaleá, pea naʻe kaila ʻa e kau tangata taú, pea naʻe holo ʻa e ngaahi ʻā. Pea toki pehē ʻe Siōsiua: ‘Tāmateʻi ʻa e tokotaha kotoa pē ʻi he koló pea tutu ia. Tutu ʻa e meʻa kotoa pē. Fakahaofi pē ʻa e siliva, koula, kopa mo e ukamea, pea ʻave ia ki he tukuʻanga koloa ʻo e tēniti ʻo Sihová.’

Naʻe pehē ʻe Siōsiua ki he ongo sipaí: ‘Mo ʻalu ki he fale ʻo Lēhapí, ʻo ʻomai ia mo hono fāmilí ki tuʻa.’ Naʻe hao moʻui ʻa Lēhapi mo hono fāmilí, ʻo hangē pē ko ia naʻe talaʻofa ʻe he ongo sipaí kiate iá.