Naʻe Tui ʻa Lēhapi kia Sihova

Tau pehē pē ʻoku tau ʻi he kolo ko Sielikoó. Ko e kolo eni ʻi he fonua ko Kēnani, ʻa ia ko e kakai aí naʻe ʻikai ke nau tui kia Sihova. Naʻe nofo ai ʻa e fefine ko Lēhapi.

ʻI he taimi naʻe kei siʻi ai ʻa Lēhapí, naʻá ne fanongo ai ki he ngaahi talanoa fekauʻaki mo Mōsese ʻi heʻene taaʻi ʻa e Tahi Kulokulá pea taki atu ʻa e kakai ʻIsilelí mei ʻIsipite. Naʻá ne toe fanongo fekauʻaki mo e founga hono tokoniʻi kinautolu ʻe Sihova ke nau ikuna ʻi he faitau mo honau ngaahi filí. ʻI he taimi ko ení ʻokú ne fanongo ʻoku ʻapitanga ʻa e kau ʻIsilelí ʻo ofi mai ki Sielikō!

ʻI ha efiafi ʻe taha, naʻe ō ai ʻa e ongo ʻIsileli ʻe toko ua ki Sielikō ke asiasi ki he koló. Naʻá na haʻu ki he fale ʻo Lēhapí. Naʻá ne fakaafeʻi kinaua ke na hū ange mo nofo ai. Lolotonga ʻa e pō ko iá, naʻe ʻiloʻi ʻe he tuʻi ʻo Sielikoó ʻoku ʻi he koló ʻa e ongo asiasí pea naʻá na ō ki he fale ʻo Lēhapí. Ko ia naʻe fekauʻi ʻe he tuʻí ha kau tangata ke puke kinaua. Naʻe fūfuuʻi ʻe Lēhapi ʻa e ongo asiasí ʻi he funga ʻato lafalafa ʻo hono falé pea tala ange ki he kau tangata ʻa e Tuʻí: ‘Naʻe ʻi heni ʻa e ongo asiasí ka kuó na ʻosi ʻalu mei he koló. Kapau te mou ʻalu ʻi he taimí ni te mou maʻu kinaua!’ ʻOkú ke ʻilo ʻa e ʻuhinga naʻe maluʻi ai ʻe Lēhapi ʻa e ongo asiasí?— Koeʻuhí naʻá ne tui kia Sihova mo ʻiloʻi te ne foaki ʻa e fonua ko Kēnaní ki he kau ʻIsilelí.

Ki muʻa ke mavahe ʻa e ongo asiasí mei he fale ʻo Lēhapí, naʻá na palōmesi ange ʻe fakahaofi ia mo hono fāmilí he taimi ʻe fakaʻauha ai ʻa Sielikoó. ʻOkú ke ʻiloʻi ʻa e meʻa naʻá na tala ange ke ne faí?— Naʻá na pehē: ‘Toʻo ʻa e maea kulokula ko ení ʻo tautau ia ʻi tuʻa ʻi ho matapā sioʻatá. Kapau te ke fai ia, ko e tokotaha kotoa pē ʻi ho falé ʻe hao.’ Naʻe fai ʻe Lēhapi ʻa e meʻa tofu pē naʻe tala ange ʻe he ongo asiasí ke ne faí. ʻOkú ke ʻilo ʻa e meʻa naʻe hoko atu aí?—

Hili ha ngaahi ʻaho siʻi mei ai, naʻe laka takai fakalongolongo ʻa e kau ʻIsilelí ʻi he koló. Naʻa nau laka takai ʻi he koló ʻi he ʻaho ʻe ono, ʻo tuʻo taha ʻi he ʻaho. Ka ʻi he ʻaho hono fitú naʻa nau laka takai ʻi he koló ʻo tuʻo fitu. Pea nau toki kaila leʻo lahi kotoa. Naʻe ʻai ʻe Sihova ʻa e ngaahi ʻā takatakai ʻi he koló ke holafa ki lalo. Ka ko e fale naʻe tautau ai ʻa e maea kulokula ʻi he matapā sioʻatá naʻe kei tuʻu pē ia! ʻE lava ke ke sio ki ai ʻi he fakatātaá?— Naʻe hao ʻa Lēhapi mo hono fāmilí!

Ko e hā ʻe lava ke ke ako meia Lēhapí?— Naʻe tui ʻa Lēhapi kia Sihova koeʻuhi ko e ngaahi meʻa fakaofo kotoa naʻá ne ako fekauʻaki mo Sihová. ʻOkú ke ako foki mo koe ʻa e ngaahi meʻa fakaofo lahi fekauʻaki mo Sihova. ʻOkú ke tui kiate ia ʻo hangē ko e meʻa naʻe fai ʻe Lēhapí?— ʻOku mau ʻiloʻi ʻokú ke fai pehē!