Naʻe Vahe Ua ʻa e Puleʻangá

ʻOKÚ KE ʻilo ʻa hono ʻuhinga ʻoku haehae ai ʻe he tangata ko ʻení hono pulupulú? Ko e fekau ia ʻe Sihova ke ne fai pehē. Ko e tangata ko ʻení ko e palōfita ia ʻa e ʻOtuá ko ʻAhaia. ʻOkú ke ʻilo pe ko e hā ʻa e palōfitá? Ko ha tokotaha ia naʻe fakahā ki ai ʻe he ʻOtuá ʻa e meʻa ʻe toki hoko.

ʻOku lea heni ʻa ʻAhaia kia Selopoame. Ko Selopoamé ko ha tangata naʻe ʻai ʻe Solomone ke ne tokangaʻi ʻa e niʻihi ʻo ʻene ngāue langá. ʻI he fetaulaki ko ʻeni ʻa ʻAhaia mo Selopoame ʻi he halá, naʻe fai ʻe ʻAhaia ha meʻa faikehe. Naʻá ne vete hono pulupulu foʻou naʻá ne tuí ʻo haehae ia ki he ngaahi konga ʻe 12. Naʻá ne tala kia Selopoame: ‘Toʻo ʻa e konga ʻe 10 maʻau.’ ʻOkú ke ʻilo ʻa e ʻuhinga naʻe ʻoange ai ʻe ʻAhaia ʻa e konga ʻe 10 kia Selopoamé?

Naʻe fakamatala ʻe ʻAhaia ʻe toʻo ʻe Sihova ʻa e puleʻangá meia Solomone. Naʻá ne pehē ʻe ʻoange ʻe Sihova ʻa e matakali ʻe 10 kia Selopoame. Naʻe ʻuhinga ʻeni ko e matakali pē ʻe ua ʻe toe ke pule ki ai ʻa e foha ʻo Solomone ko Lehopoame.

Naʻe ʻita ʻaupito ʻa Solomone ʻi heʻene fanongo ki he meʻa naʻe tala ʻe ʻAhaia kia Selopoamé. Naʻá ne feinga ke tāmateʻi ʻa Selopoame. Ka naʻe hola ʻa Selopoame ia ki ʻIsipite. ʻI he hili atu pē ha taimi naʻe mate ʻa Solomone. Naʻá ne tuʻi he taʻu ʻe 40, pea naʻe toki hoko ʻa hono foha ko Lehopoamé ko e tuʻi. Naʻe fanongo ʻa Selopoame ʻi ʻIsipite kuo mate ʻa Solomone, ko ia naʻá ne foki leva ki ʻIsileli.

Naʻe ʻikai ko ha tuʻi lelei ʻa Lehopoame. Naʻe kovi ange ia ki he kakaí ʻi heʻene tamai ko Solomoné. Naʻe ʻalu ʻa Selopoame mo ha kau tangata mahuʻinga kehe kia Tuʻi Lehopoame ʻo kole kiate ia ke ne fai lelei ange ki he kakaí. Ka naʻe ʻikai ke tokanga ki ai ʻa Lehopoame ia. Ko hono moʻoní, naʻe hoko ia ʻo toe kovi ange ʻi he taimi ki muʻá. Ko ia naʻe ʻai ʻe he kakaí ʻa Selopoame ko e tuʻi ki he matakali ʻe 10, ka ko e ongo matakali ʻo Penisimani mo Siutá naʻá na tauhi pē ʻa Lehopoame ko honau tuʻi.

Naʻe ʻikai ke toe fiemaʻu ʻe Selopoame ʻa hono kakaí ke nau ʻalu ki Selusalema ʻo lotu ʻi he temipale ʻo Sihová. Ko ia naʻá ne ngaohi ha ongo kiʻi pulu koula pea ʻai ʻa e kakai ʻo e puleʻanga matakali ʻe 10 ke nau lotu ki ai. Naʻe vave ʻaupito ʻa e hoko ʻa e fonuá ʻo fonu ʻi he faihiá mo e fakamālohí.

Naʻe ʻi ai mo e faingataʻa ʻi he puleʻanga matakali ʻe uá. Naʻe siʻi hifo ʻi he taʻu ʻe nima ʻi he hili ʻo e hoko ʻa Lehopoame ko e tuʻí, naʻe haʻu ʻa e tuʻi ʻo ʻIsipité ke tauʻi ʻa Selusalema. Naʻá ne ʻave ʻa e ngaahi koloa lahi mei he temipale ʻo Sihová. Ko ia naʻe kiʻi taimi siʻi pē ʻa e tuʻu ʻa e temipalé ʻo hangē ko ia ʻi hono langá.