Ko e Falala ki he Tokoni ʻa e ʻOtuá

NAʻE laui afe ʻa e kakai naʻa nau fai ʻa e fononga mamaʻo mei Pāpilone ki Selusalemá. Ka ʻi heʻenau aʻu ki aí, ko e koto maumau pē ʻa Selusalema ia. Naʻe ʻikai ke ʻi ai ha taha naʻe nofo ai. Naʻe pau ke toe langa ʻe he kau ʻIsilelí ʻa e meʻa hono kotoa pē.

Ko e taha ʻi he ngaahi meʻa naʻa nau fuofua langá ko ha ʻōlita. Ko ha feituʻu ʻeni ʻa ia naʻe lava ke nau fai ai ha ngaahi foaki, pe ngaahi meʻaʻofa ʻo e monumanu kia Sihova. ʻI ha ngaahi māhina siʻi pē mei ai naʻe kamata leva ke langa ʻa e temipalé ʻe he kau ʻIsilelí. Ka naʻe ʻikai ke loto ʻa e ngaahi fili naʻa nau nofo ʻi he ngaahi fonua ofi maí ki he langa ʻa e kau ʻIsilelí. Ko ia naʻa nau feinga ke fakailifiaʻi kinautolu ke tuku ʻa e langá. Faifai atu pē, naʻe ʻai ʻe he ngaahi fili ko ʻení ʻa e tuʻi foʻou ʻo Pēsiá ke ne faʻu ha lao ke taʻofi ʻa e ngāue ki he langá.

Naʻe ʻosi atu ʻa e ngaahi taʻu. Naʻe aʻu ki he taʻu ʻe 17 mei he taimi ko ia naʻe toe foki mai ai ʻa e kau ʻIsilelí mei Pāpiloné. Naʻe fekau ʻe Sihova ʻa ʻene ongo palōfita ko Hākeai mo Sākalaia ke tala ki he kakaí ke toe kamata ʻa e langá. Naʻe falala ʻa e kakaí ki he tokoni ʻa e ʻOtuá, pea nau talangofua ki he ongo palōfitá. Naʻa nau toe kamata ʻa e langá, neongo hono pehē ʻe he laó ke ʻoua te nau fai ia.

Ko ia naʻe haʻu ha tokotaha Pēsia maʻu tuʻunga ko hono hingoá ko Tatenai ʻo ʻeke ki he kau ʻIsilelí pe ko e ngofua mei fē ʻoku nau langa ai ʻa e temipalé. Naʻe fakahā kiate ia ʻe he kau ʻIsilelí ʻo pehē ʻi he taimi naʻa nau ʻi Pāpilone aí, naʻe tala kiate kinautolu ʻe Tuʻi Kōlesi: ‘Mou ō ʻi he taimí ni ki Selusalema pea langa ʻa e temipale ʻo Sihová, ko homou ʻOtuá.’

Naʻe ʻosi mate ʻa Kōlesi ʻi he taimi ko iá, ko ia naʻe ʻave ʻe Tatenai ha tohi ki Pāpilone ʻo ʻeke pe ko e moʻoni naʻe ʻi ai ha lea pehē ʻa Kōlesi. Naʻe vave pē hano toe maʻu mai ha tohi mei he tuʻi foʻou ʻo Pēsiá. Naʻe fakahā ai ʻoku moʻoni naʻe leaʻaki ia ʻe Kōlesi. Pea ko ia naʻe tohi ange ʻe he tuʻí: ‘Tuku ʻa e kau ʻIsilelí ke nau langa ʻa e temipale ʻo honau ʻOtuá. Pea ʻoku ou tuʻutuʻuni atu kiate koe ke ke tokoni kiate kinautolu.’ Naʻe fakafuofua ki ha taʻu nai ʻe fā kuo ʻosi ʻa e temipalé, pea naʻe fiefia ʻaupito ʻa e kau ʻIsilelí.

Naʻe toe ʻosi atu mo e ngaahi taʻu. Naʻe aʻu ki he meimei taʻu ʻe 48 mei he ʻosi ʻa e temipalé. Naʻe masiva ʻa e kakaí ʻi Selusalema, pea naʻe ʻikai ke hā lelei ʻa e koló mo e temipale ʻo e ʻOtuá. Naʻe hoko ʻa e tokotaha ʻIsileli ko ʻĒsela, ʻa ia naʻe kei ʻi Pāpilone, ʻo ʻilo ʻo kau ki he fiemaʻu ke fakaleleiʻi ʻa e temipale ʻo e ʻOtuá. Ko ia, ʻokú ke ʻilo ʻa e meʻa naʻá ne faí?

Naʻe ʻalu ʻa ʻĒsela kia ʻAtasease, ko e tuʻi ʻo Pēsia, pea ko e tuʻi lelei ko ʻení naʻá ne ʻoange kia ʻĒsela ha ngaahi meʻaʻofa lahi ke foki mo ia ki Selusalema. Naʻe kole ʻe ʻĒsela ki he kau ʻIsileli ʻi Pāpiloné ke nau tokoni ange kiate ia ʻi hono ʻave ʻa e ngaahi meʻaʻofa ko ʻení ki Selusalema. Naʻe fakafuofua ki he kakai ʻe toko 6,000 naʻa nau pehē te nau ō. Naʻe lahi ʻa e siliva mo e koula mo e ngaahi meʻa mahuʻinga kehe ke nau ō mo ia.

Naʻe hohaʻa ʻa ʻĒsela, koeʻuhi naʻe lahi ʻa e kau tangata kovi ʻi he hala te nau fononga ai. ʻE ʻave nai ʻe he kau tangata ko ʻení ʻa ʻenau silivá mo ʻenau koulá pea tāmateʻi kinautolu. Ko ia naʻe fakatahatahaʻi ʻe ʻĒsela ʻa e kakai kotoa pē, ʻo hangē ko ia ʻokú ke sio ki ai ʻi he fakatātaá. Pea nau lotu kia Sihova ke maluʻi kinautolu ʻi heʻenau fononga mamaʻo ki Selusalemá.

Naʻe maluʻi kinautolu ʻe Sihova. Pea ʻi he ʻosi ʻa e māhina ʻe fā ʻo e fonongá, naʻa nau aʻu lelei pē ki Selusalema. ʻIkai ʻoku fakahā heni ʻoku lava ʻe Sihova ke maluʻi ʻa kinautolu ʻoku falala kiate ia ke maʻu ha tokoni?