Nofo Pōpula ʻi Pāpiloné ʻo Aʻu ki Hono Toe Langa ʻa e Ngaahi ʻĀ ʻo Selusalemá

Lolotonga ʻa e nofo pōpula ʻi Pāpiloné, naʻe lahi hono ʻahiʻahiʻi ʻa e tui ʻa e kau ʻIsilelí. Naʻe lī ʻa Setaleki, Mēsake mo ʻApitenikō ki he fonise afi kakaha, ka naʻe toe fakahaofi moʻui kinautolu ʻe he ʻOtuá. Ki mui mai, ʻi he hili hono ikunaʻi ʻo Pāpilone ʻe he kau Mītiá mo e kau Pēsiá, naʻe lī ʻa Tāniela ki he ʻana ʻo e fanga laioné, ka naʻe toe maluʻi foki mo ia ʻe he ʻOtuá ʻaki ʻene tāpuniʻi ʻa e ngutu ʻo e fanga laioné.

Faifai atu pē, naʻe tuku ange ʻe he tuʻi Pēsia ko Kōlesí ʻa e kau ʻIsilelí. Naʻa nau toe foki ki honau fonuá ko e toki ʻosi ia ʻa e taʻu ʻe 70 mei hono ʻave kinautolu ko e kau pōpula ki Pāpiloné. Ko e taha ʻi he ʻuluaki ngaahi meʻa naʻa nau fai ʻi heʻenau foki ki Selusalemá ko hono kamata ʻa e langa ʻo e temipale ʻo Sihová. Kaekehe, naʻe vave hono taʻofi ʻe he ngaahi filí ia ʻa e ngāué. Ko ia ʻoku fakafuofua ki he taʻu ʻe 22 hili ʻenau toe foki ki Selusalemá naʻa nau toki fakaʻosi ai ʻa e temipalé.

Ko hono hokó, te tau ako ki he fononga ʻa ʻĒsela ʻo foki ki Selusalema ke toe ʻai ke fakaʻofoʻofa ʻa e temipalé. Ko e taʻu ia ʻe 47 hili hono fakaʻosi ʻa e temipalé. Pea hili ʻa e taʻu ʻe 13 mei he fononga naʻe fai ʻe ʻĒselá, naʻe tokoni ʻa Nehemaia ke toe langa ʻa e ngaahi ʻā maumaú ʻo Selusalemá. ʻOku lave ʻa e Konga NIMÁ ki he taʻu ʻe 152 ʻo e hisitōliá.