ʻI he Funga Moʻunga ko ʻOlivé

KO SĪSŪ ʻeni ʻi he funga moʻunga ko ʻOlivé. Ko e kau tangata ʻe toko fā ko ē ko ʻene kau ʻapositolo. Ko e ongo tokoua ko ʻAnitelū mo Pita, pea pehē foki ki he ongo tokoua ko Sēmisi mo Sione. ʻI he mamaʻo atú ʻoku lava ke ke sio ai ki he temipale ʻo e ʻOtuá ʻi Selusalema.

Ko e ʻosi eni ʻa e ʻaho ʻe ua mei he heka atu ʻa Sīsū ʻi he kiʻi ʻasí ki Selusalemá. Ko e ʻaho Tūsite eni. ʻI he houa pongipongi ʻo e ʻaho ko ení naʻe ʻi he temipale ʻa Sīsū. Naʻe feinga ai ʻa e kau taulaʻeikí ke puke ʻa Sīsū ʻo tāmateʻi ia. Ka naʻa nau ilifia ke fai ʻeni koeʻuhi he naʻe saiʻia ʻa e kakaí ia ʻia Sīsū.

‘Ko e fanga ngata kimoutolu mo e ngaahi foha ʻo e fanga ngata!’ ko e ui ia ʻe Sīsū ʻa e kau taki lotu ko iá. Pea naʻe pehē ʻe Sīsū ʻe tautea kinautolu ʻe he ʻOtuá koeʻuhi ko e ngaahi meʻa kotoa pē naʻa nau fai ʻoku koví. ʻI he hili pē iá pea naʻe ʻalu ʻa Sīsū ki he Moʻunga ko ʻOlivé, pea naʻe kamata ke ʻeke ha ngaahi fehuʻi kiate ia ʻe he kau ʻapositolo ko ʻeni ʻe toko fā. ʻOkú ke ʻilo pe ko e hā naʻa nau ʻeke kia Sīsuú?

Naʻe ʻeke ʻe he kau ʻapositoló ʻo kau ki he ngaahi meʻa ʻi he kahaʻú. Naʻa nau ʻilo ʻe fakangata ʻe Sīsū ʻa e ngaahi kovi hono kotoa pē ʻi he māmaní. Ka naʻa nau fie ʻilo pe ʻe fakahoko ʻeni ʻafē. ʻE toe haʻu ʻafē ʻa Sīsū ke pule ko e Tuʻí?

Naʻe ʻilo ʻe Sīsū ia ʻe ʻikai ke malava hono kau muimuí ʻi māmani ke mamata kiate ia ʻi heʻene toe haʻú. Ko hono ʻuhingá he te ne ʻi hēvani pē ia, pea ʻe ʻikai malava ke nau sio ange ki ai. Ko ia naʻe tala ʻe Sīsū ki heʻene kau ʻapositoló ha ngaahi meʻa ʻe hoko ʻi māmani ʻi he taimi te ne pule ai ko e Tuʻi ʻi hēvaní. Ko e hā ʻa e niʻihi ʻo e ngaahi meʻa ko ʻení?

Naʻe pehē ʻe Sīsū ʻe ʻi ai ʻa e ngaahi tau lalahi, ʻe puke mo fiekaia ʻa e kakai tokolahi, ʻe kovi ʻaupito ʻa e faihiá, pea ʻe ʻi ai ʻa e ngaahi mofuike lahi. Naʻe toe pehē ʻe Sīsū ʻe malangaʻi ʻa e ongoongo lelei ʻo e puleʻanga ʻo e ʻOtuá ki he feituʻu hono kotoa pē ʻi he māmaní. Kuo tau sio kuo hoko ʻa e ngaahi meʻa ko ʻení ʻi hotau taimí? ʻIo! Pea ko ia ʻoku tau ʻilo pau ai ʻoku lolotonga pule ʻa Sīsū ʻi he taimí ni ʻi hēvani. Kuo vavé ni haʻane fakangata ʻa e ngaahi kovi hono kotoa pē ʻi he māmaní.