Ko e Tatali ʻi Selusalema

KO E kakai ko ʻení ko e kau muimui ia ʻo Sīsuú. Naʻa nau talangofua ki ai ʻo nofo pē ʻi Selusalema. Pea lolotonga ʻa ʻenau tatali kotoa fakatahá, naʻe fonu ʻa e falé ʻi he longoaʻa lahi. Naʻe ongo ʻo hangē ko ha ʻoho mai ʻa ha matangi mālohi. Pea naʻe kamata ke hā ʻi he funga ʻulu ʻo e kau ākongá taki taha ha ngaahi ʻeleloʻi afi. ʻOku lava ke ke sio ki he afi ʻi ʻolunga ʻiate kinautolu taki taha? Ko e hā ʻa e ʻuhinga ʻo e ngaahi meʻa ko ʻení?

Ko ha mana ia! Naʻe toe ʻi hēvani ʻa Sīsū mo ʻene Tamaí, pea naʻá ne huaʻi hifo ʻa e laumālie māʻoniʻoni ʻo e ʻOtuá ki heʻene kau muimuí. ʻOkú ke ʻilo pe ko e hā naʻe fakatupunga ʻe he laumālie ko ení ke nau faí? Naʻa nau kamata kotoa ke lea ʻi he ngaahi lea kehekehe.

Naʻe tokolahi ʻa e kakai ʻi Selusalema naʻa nau fanongo ki he longoaʻa ʻo hangē ko ha matangi mālohí, pea naʻa nau haʻu ke sio pe ko e hā ʻa e meʻa ʻoku hokó. Ko e niʻihi ʻo e kakaí naʻe mei he ngaahi fonua kehe pea naʻa nau ʻi heni ki he kātoanga ʻa e kau ʻIsilelí ko e Penitekosi. Ko ha ʻohovale ē ka ko e kau ʻaʻahi mai ko ʻení! Naʻa nau fanongo ki heʻenau ngaahi lea totonu ʻanautolú ʻoku leaʻaki atu ia ʻe he kau ākongá ʻo kau ki he ngaahi meʻa fakaofo kuo fai ʻe he ʻOtuá.

Naʻe pehē ʻe he kau ʻaʻahí: ‘Ko e kakai kotoa ko ʻení mei Kāleli. Ko ia ai, ʻoku anga-fēfē ʻa ʻenau malava ke lea ʻi he ngaahi lea kehekehe ko ʻeni ʻa ia ko e lea ia ʻa e ngaahi fonua ʻoku mau haʻu mei aí?’

Naʻe tuʻu hake leva ʻa Pita ke fakamatala kiate kinautolu. Naʻá ne lea leʻo lahi mo tala ki he kakaí ʻo kau ki hono tāmateʻi ʻo Sīsuú pea naʻe toe fokotuʻu ia ʻe Sihova mei he maté. Pea pehē ʻe Pita: ‘ʻOku ʻi hēvani he taimí ni ʻa Sīsū ʻi he toʻomataʻu ʻo e ʻOtuá. Pea kuó ne huaʻi hifo ʻa e laumālie māʻoniʻoni naʻe talaʻofa. Ko e ʻuhinga ia ʻoku mou mamata mo fanongo ai ki he ngaahi mana ko ʻení.’

ʻI he lave ʻa Pita ki he ngaahi meʻá ni, naʻe ongoʻi fakatomala lahi ʻa e kakai tokolahi fekauʻaki mo e meʻa naʻe fai kia Sīsuú. Naʻa nau ʻeke: ‘Ko e hā ʻoku totonu ke mau faí?’ Naʻe tala ʻe Pita kiate kinautolu: ‘ʻOku fiemaʻu ke liliu hoʻomou founga moʻuí pea papitaiso.’ Ko ia ʻi he ʻaho pē ko iá naʻe papitaiso ai ʻa e kakai ʻe toko 3,000 nai pea nau hoko ko e kau muimui ʻo Sīsū.