Fakatangaʻi Koeʻuhi ko e Failelei

Mahalo te ke fanongo mei hao ngaahi kaungāmeʻa pe kāinga ʻo pehē ʻoku maumaulao ʻa e Kau Fakamoʻoni ʻa Sihová, kuo fakangatangata kinautolu ʻe ha ngaahi puleʻanga, pe ko e kakai kovi kinautolu. Ko e hā ʻoku lau kovi pehē ai fekauʻaki mo kinautolú?

ʻOku ʻikai fakatuʻunga ʻi ha taʻefaka­ʻapaʻapa ʻa e Kau Fakamoʻoní ki he laó ka koeʻuhi ko ʻenau muimui ʻi he topuvaʻe ʻo Sīsū. Naʻe pehē ʻe Sīsū ki heʻene kau ākongá ʻe manukia kinautolu ʻe he tangatá, fakatangaʻi kinautolu, pea lohiekina kinautolu ʻi he kovi kehekehe. ʻOku hoko ʻeni koeʻuhi ko e tuʻufili lahi ʻo e ʻOtuá, ʻa Sētane, ko e ʻotua ia ʻo e māmaní, pea ʻokú ne saiʻia ke fakatafoki ʻa e tangatá mei heʻenau tauhi ki he ʻOtuá.​—Mātiu 5:10-12; 10:16-22, 34-39; 24:9, 10; Sione 15:17–16:3; 2 Tīmote 3:12; 1 Pita 5:8; Fakahā 12:17.

ʻI hono puke pōpula ʻo e kau ʻapositoló pea ʻave ki he fakamaauʻangá, naʻe ʻikai koeʻuhi ko ha kau maumaulao, kau tangata fakamālohi pe ko ha kau fakatupu-angatuʻu kinautolu. Ka koeʻuhi ko ʻenau malangaʻi ʻa e ongoongo leleí. ʻI he tangi ʻa e ʻapositolo ko Paulá ki he fakamaau­ʻanga māʻolunga angé, ko hono ʻuhingá pē ke taukapoʻi mo fokotuʻu fakalao ʻa e totonu ʻa e kau Kalisitiané ke malangaʻi ʻa e ongoongo leleí.​—Ngāue 4:18-20; 5:28-32; Filipai 1:7.

ʻI he ʻahó ni, ko e Kau Fakamoʻoni ʻa Sihová ko e kau Kalisitiane tauhi lao ʻa ia ʻoku nau totongi ʻenau tukuhaú pea fakaʻapaʻapaʻia ʻa e kau maʻu mafai māʻolungá. ʻOku nau totongi ʻa e ngaahi meʻa ʻa Sisá kia Sisa pea ko e ngaahi meʻa ʻa e ʻOtuá ki he ʻOtua. Kapau ʻoku ʻi ai haʻanau fepaki mo ha faʻahinga mafai fakapuleʻanga, ko hono ʻuhingá pē ʻoku ʻikai tali ʻe he puleʻangá ʻenau ngāue fakamalangá, pe koeʻuhi ko ʻenau tuʻuʻatā mei he ngaahi meʻa ʻoku hoko ʻi he vā ʻo e ngaahi puleʻangá. Ka ʻi he meʻá ni kuo pau ke fai ʻe he Kau Fakamoʻoni ʻa Sihová ʻa e meʻa tatau mo ia naʻe fai ʻe he kau ʻapositoló, ʻa ia naʻa nau pehē: “ʻOku totonu pe ke fai ki he pule ʻa e ʻOtua ʻi he pule ʻa e tangata.”​—Ngāue 5:29; Maʻake 12:17; Sione 18:36; Taitusi 3:1, 2.

ʻOku ʻikai ke kumi ʻa e Kau Fakamoʻoni ʻa Sihová ki he fakatangá ka ʻoku nau saiʻia ange ke moʻui nonga mo fiemālie. Kaekehe, kapau ʻoku fakatangaʻi kinautolu koeʻuhi ko ʻenau muimui ki he lao ʻa e ʻOtuá pea mo e faʻifaʻitakiʻanga ʻa Sīsū Kalaisí, ʻoku nau kātakiʻi ia ʻi he loto-fiefia.​—Mātiu 5:10-12; Ngāue 5:40, 41; 1 Kolinitō 4:12; 1 Tīmote 2:2; 1 Pita 3:14, 15; 4:12-16.

• Ko e hā hono ʻuhinga ʻoku lauʻikoviʻi ai mo fakatangaʻi ʻa e kau sevāniti ʻa Sihová?

• Ko e hā hono ʻuhinga ʻoku fepaki ai he taimi ʻe niʻihi ʻa e Kau Fakamoʻoni ʻa Sihová mo e kau maʻu mafai fakapuleʻangá, ʻo hangē ko ia naʻe fai ʻe he kau ʻapositolo Kalisitiané?

• ʻOku anga-fēfē ʻa e vakai ʻa e kau sevāniti ʻa Sihová ki he fakatangá?

[Fakatātā ʻi he peesi 29]

Naʻe fau mai ʻa Sīsū ki he ʻao ʻo Pailató pea naʻe tuku pilīsone ʻa e ʻapositolo ko Paulá koeʻuhi ko hono malangaʻi ʻa e Puleʻanga ʻo e ʻOtuá