Vahe 92
Fakamoʻui ʻa e Kilia ʻe Toko Hongofulu Lolotonga ʻa e Fononga Fakaʻosi ʻa Sīsū ki Selusalemá
NAʻE fakataʻeʻaongaʻi ʻe Sīsū ʻa e ngaahi feinga ʻa e Sanetalimí ke tāmateʻi iá ʻaki ʻene mavahe mei Selusalema peá ne fononga atu ki he kolo ko ʻIfalemi, ko ha kilomita nai ʻe 24 pe ofi ki ai ki he tokelau-hahake ʻo Selusalemá. Naʻá ne nofo ai mo ʻene kau ākongá ʻo mamaʻo mei hono ngaahi filí.
Ka neongo ia, ko e taimi ki he Laka-Atu ʻo e 33 T.S. naʻe panaki, pea naʻe vave pē ha toe ʻalu ʻa Sīsū. Naʻá ne fononga atu ʻo fou atu ʻi Samēlia ʻo ʻalu ki Kāleli. Ko ʻene ʻaʻahi fakaʻosi ʻeni ki he feituʻu ko ʻení ki muʻa peá ne pekiá. Lolotonga ʻa ʻene ʻi Kālelí, ngalingali ko ia mo ʻene kau ākongá naʻa nau kau mo e niʻihi kehe naʻa nau fononga atu ki Selusalema ki he kātoanga ʻo e Laka-Atú. Naʻa nau ʻalu ʻi he hala naʻe fou atu ʻi he vahefonua ʻo Pēleá, ʻi he hahake ʻo e Vaitafe Sioataní.
ʻI he kamataʻanga ʻo e fonongá, lolotonga ʻa e hū atu ʻa Sīsū ki ha kolo ʻi Samēlia pe ʻi Kāleli, naʻá ne fetaulaki ai mo e kau tangata ʻe toko hongofulu naʻa nau kilia. Ko e mahaki fakalilifú ni ʻokú ne keina māmālie ʻa e ngaahi konga ʻo e sino ʻo ha taha—hono ngaahi louhiʻi nimá, hono louhiʻi vaʻé, hono telingá, hono ihú, mo hono loungutú. Ke maluʻi ʻa e niʻihi kehé ke ʻoua te nau puké, naʻe pehē ʻe he Lao ʻa e ʻOtuá ʻo fekauʻaki mo ha kilia: “Te ne ʻuʻufi hono ngutú, pea te ne kaila, ‘Taʻemaʻa, taʻemaʻa!’ Lolotonga ʻoku ʻiate ia ʻa e malá, te ne taʻemaʻa; . . . te ne nofo toko taha pē.”
Naʻe tauhi ʻe he kau kilia ʻe toko hongofulú ʻa e ngaahi fakangatangata ʻo e Lao ki he kau kiliá pea nau nofo mamaʻo ʻaupito meia Sīsū. Ka, naʻa nau kalanga leʻo-lahi kia Sīsū: “ʻEī Sīsū, ʻaloʻofa mai.”
Naʻe sio atu ʻa Sīsū kiate kinautolu ʻi he mamaʻó, peá ne fekau atu: “Mou ō pē, ʻo fakahā kimoutolu ki he kau taulaʻeikí.” Naʻe leaʻaki ʻeni ʻe Sīsū koeʻuhi naʻe fakamafaiʻi ʻe he Lao ʻa e ʻOtuá ʻa e kau taulaʻeikí ke nau leaʻaki kuo fakamaʻa ha kau kilia mei he mahaki naʻa nau puke aí. ʻI he founga ko iá naʻe tali lelei ai ʻa e faʻahinga peheé ke nau toe nofo fakataha mo e kakai moʻui leleí.
Naʻe tui pau ʻa e kau kilia ʻe toko hongofulú ki he ngaahi ivi fakaemana ʻo Sīsuú. Ko ia naʻa nau fakatoʻotoʻo atu ke sio ki he kau taulaʻeikí, neongo naʻe teʻeki ai ke fakamoʻui kinautolu. Lolotonga ʻenau fonongá, naʻe fakapaleʻi ʻa ʻenau tui kia Sīsuú. Naʻe kamata ke nau sio mo nau ongoʻi kuo fakamoʻui kinautolu!
Ko e toko hiva ʻo e kau kilia naʻe fakamoʻuí naʻa nau hoko atu pē ʻa e fonongá, ka ko e kilia ʻe taha, ko ha Samēlia, naʻá ne foki ʻo kumi ʻa Sīsū. Ko e hā hono ʻuhingá? Koeʻuhi he naʻá ne fuʻu houngaʻia ki he meʻa kuo hoko kiate iá. Naʻá ne fakamālō leʻo-lahi ki he ʻOtuá, pea ʻi heʻene maʻu ʻa Sīsuú, naʻá ne tō mapeʻe atu ki hono vaʻé ʻo fakamālō kiate ia.
ʻI he talí naʻe pehē ai ʻe Sīsū: “ʻIkai naʻe toko hongofulu naʻe fakamaʻá? Pea kofaʻā ʻa e toko hivá? ʻOku ʻikai ʻiloa mai koā hanau taha kuo foki ke fai ha fakafetaʻi ki he ʻOtuá; ka ko siʻi mulí ni pē?”
Ko ia naʻá ne tala ki he Samēliá: “Tuʻu ʻo ʻalu; kuo fakamoʻui koe ʻe hoʻo tuí.”
ʻI heʻetau lau ʻo kau ki he fakamoʻui ʻe Sīsū ʻa e kau kilia ʻe toko hongofulú, ʻoku totonu ke tau tukulotoʻi ʻa e lēsoni naʻe fakahuʻuhuʻunga ki ai ʻi heʻene fehuʻí: “Pea kofaʻā ʻa e toko hivá?” Ko e taʻehoungaʻia naʻe fakahāhā ʻe he toko hivá ko ha tō nounou mafatukituki ia. Te tau hangē ko e tangata Samēliá, ʻo fakahā ʻoku tau houngaʻia ki he ngaahi meʻa ʻoku tau maʻu mei he ʻOtuá, kau ai mo e talaʻofa pau ʻo e moʻui taʻengata ʻi he maama foʻou māʻoniʻoni ʻa e ʻOtuá? Sione 11:54, 55; Luke 17:11-19; Livitiko 13:16, 17, 45, 46; Fakahā 21:3, 4.
▪ Naʻe anga-fēfē ʻa hono fakataʻeʻaongaʻi ʻe Sīsū ʻa e ngaahi feinga ke tāmateʻi iá?
▪ Ko fē naʻe hoko atu ki ai ʻa e fononga ʻa Sīsuú, pea ko ʻene fonongá ki fē?
▪ Ko e hā naʻe tuʻu ai pē ʻa e kau kiliá mei he mamaʻó, pea ko e hā naʻe tala ai ʻe Sīsū kiate kinautolu ke nau ʻalu ki he kau taulaʻeikí?
▪ Ko e hā ʻa e lēsoni ʻoku totonu ke tau ako mei he meʻa ko ʻeni naʻe hokó?