Ko ha Kahaʻu Fakaofo

He ʻikai ke hoko atu ʻo fuoloa ʻa hono kākaaʻi ʻe Sētane mo ʻene kau tēmenioó ʻa e faʻahinga ʻo e tangatá. Kuo ʻosi lī hifo ʻe Sihova ʻa kinautolu mei hēvani. (Fakahā 12:9) ʻI he kahaʻu ofi maí, ʻe toe fai ʻe he ʻOtuá ha ngāue kia Sētane mo ʻene kau tēmenioó. ʻI ha vīsone mei he ʻOtuá, naʻe pehē ʻe he ʻaposetolo ko Sioné: “Pea u vakai ha angelo ʻoku ʻalu hifo mei he langi, ʻoku ʻiate ia ʻa e kī ʻo e Luo Taʻehanotakele, pea ʻoku ne toʻo ha fuʻu, seini. Pea ne puke ʻa e Talakoni, ʻa e Ngata ʻo onoʻaho, ʻa ia ko e Tevolo foki mo Setane, pea ne haʻi ia ke ʻosi ha taʻu ʻe afe, pea ne li ia ki he Luo, ʻo ne tapuni ia ʻo silaʻi mei ʻolunga; koeʻuhi ke ʻoua te ne toe kākāʻi ʻa e kakai kaeʻoua ke kakato ʻa e [t]aʻu ʻe taha afe.” (Fakahā 20:1-3) ʻI he hili iá, ʻe fakaʻauha ʻo taʻengata ʻa e Tēvoló pea mo ʻene kau tēmenioó.​—Fakahā 20:10.

ʻE toe ʻauha mo e kakai kovi ʻi he māmaní.​—Sāme 37:9, 10; Luke 13:5.

ʻE Toe Moʻui Mai ʻa e Kau Maté!

ʻI he hili ʻa hono toʻo atu ʻa Sētane mo ʻene kau tēmenioó, ʻe fakahoko mai ʻe Sihova ʻa e ngaahi tāpuaki lahi ki he faʻahinga ʻo e tangatá. ʻOkú ke manatuʻi, ko e kau maté ʻoku ʻikai te nau moʻui, ʻo ʻikai te nau ʻi ai. Naʻe fakatatauʻi ʻe Sīsū ʻa e maté ki he mohe​—ko e mohe maʻu ʻo ʻikai ha misi. (Sione 11:11-14) Naʻá ne fai pehē koeʻuhi naʻá ne ʻilo ʻe hoko ʻa e taimi ʻe ʻā hake ai ʻo moʻui ʻa e faʻahinga ʻoku mohe ʻi he maté. Naʻá ne pehē: “ʻOku ʻunu mai ha taimi, ʻa ia . . . [ko e] kakai kotoa pe ʻoku ʻi he ngaahi faʻitoka, . . . te nau ʻalu atu mei ai.”​—Sione 5:28, 29; fakafehoanaki mo Ngāue 24:15.

Te nau toe moʻui ʻi heni ʻi māmani. ʻI he ʻikai ke ʻi ai ha ngaahi fanongonongo ʻoku fakahā ai kuo mate ha taha, ʻe fakahā ʻa e ngaahi fakamatala fakafiefia ʻo fekauʻaki mo kinautolu kuo fakafoki mai ke moʻuí! Ko ha toki meʻa fakafiefia ē ke talitali lelei ʻa e faʻahinga ʻofeina ʻe fakafoki mai mei he faʻitoká!