Ko Hai ʻa e Ngaahi Kaumeʻa ʻo e ʻOtuá?

Ko Sīsū Kalaisí ko e ʻAlo ia pea mo e kaumeʻa ofi taha mo ʻofeina taha ʻo Sihová. Ki muʻa ke ne moʻui ko ha tangata ʻi he foʻi māmaní, naʻe moʻui ʻa Sīsū ʻi hēvani ko ha meʻamoʻui laumālie māfimafi. (Sione 17:5) Naʻá ne toki haʻu leva ki he foʻi māmaní ke akoʻi ki he kakaí ʻa e moʻoni ʻo fekauʻaki mo e ʻOtuá. (Sione 18:37) Naʻá ne toe foaki ʻa ʻene moʻui fakaetangatá ke fakahaofi ʻa e faʻahinga talangofua ʻo e tangatá mei he angahalá mo e maté. (Loma 6:23) Ko Sīsū ʻa e Tuʻi he taimí ni ʻo e Puleʻanga ʻo e ʻOtuá, ko ha founga-pule fakahēvani ʻa ia te ne ʻomai ʻa e Palataisí ki he foʻi māmani ko ení.​—Fakahā 19:16.

Ko e kau ʻāngeló ko e toe ngaahi kaumeʻa kinautolu ʻo e ʻOtuá. Naʻe ʻikai ke kamata ʻa e moʻui ʻa e kau ʻāngeló ʻi he tuʻunga ko e faʻahinga ʻo e tangatá ʻi he foʻi māmaní. Naʻe fakatupu kinautolu ʻi hēvani ki muʻa ke ngaohi ʻe he ʻOtuá ʻa e foʻi māmaní. (Siope 38:4-7) ʻOku ʻi ai ʻa e kau ʻāngelo ʻe laui miliona. (Taniela 7:10) Ko e ngaahi kaumeʻa fakahēvani ko eni ʻo e ʻOtuá ʻoku nau loto ke ako ʻe he kakaí ʻa e moʻoni ʻo fekauʻaki mo Sihová.​—Fakahā 14:6, 7.

ʻOku toe ʻi ai ʻa e ngaahi kaumeʻa ʻo e ʻOtuá ʻi he foʻi māmaní; ʻokú ne ui kinautolu ko ʻene kau fakamoʻoni. Ko ha fakamoʻoni ʻi he fakamāuʻangá ʻokú ne tala ʻa e meʻa ʻokú ne ʻiloʻi ʻo fekauʻaki mo ha taha, pe ko ha meʻa. ʻOku tala ʻe he Kau Fakamoʻoni ʻa Sihová ki he niʻihi kehé ʻa e meʻa ʻoku nau ʻiloʻi ʻo fekauʻaki mo Sihova pea mo ʻene taumuʻá. (Aisea 43:10) ʻI he hangē ko e kau ʻāngeló, ʻoku loto ʻa e Kau Fakamoʻoní ke tokoniʻi koe ke ke ako ʻa e moʻoni ʻo fekauʻaki mo Sihová. ʻOku nau loto ke ke hoko foki ko e kaumeʻa ʻo e ʻOtuá.