Ko e Hā ʻOku Hoko ʻi he Maté?

Ko e maté ko e fehangahangai ia ʻo e moʻuí. Ko e maté ʻoku hangē ia ha mohe maʻú. (Sione 11:11-14) ʻOku ʻikai lava ʻa e kau maté ke fanongo, sio, lea, pe fakakaukau ki ha meʻa. (Koheleti 9:5, 10 [Tagata Malaga, PM]) ʻOku akoʻi ʻe he lotu loí ʻoku ʻalu ʻa e kau maté ki ha māmani laumālie ke nofo ai mo ʻenau fanga kuí. ʻOku ʻikai ko e meʻa ia ʻoku akoʻi ʻe he Tohitapú.

Ko e faʻahinga ko ia kuo maté ʻe ʻikai lava ke nau tokoniʻi kitautolu, pea ʻe ʻikai lava ke nau fakalaveaʻi kitautolu. ʻOku angamaheniʻaki ʻa hono fai ʻe he kakaí ʻa e ngaahi ouau mo e ngaahi feilaulau ʻa ia ʻoku nau tui ʻe leleiʻia ai ʻa e faʻahinga ko ia kuo maté. ʻOku taʻefakahōifua eni ki he ʻOtuá koeʻuhi ʻoku makatuʻunga ia ʻi he taha ʻo e ngaahi loi ʻa Sētané. ʻOku ʻikai lava foki ke ne ʻai ke leleiʻia ai ʻa e kau maté, koeʻuhi he ʻoku ʻikai te nau moʻui. ʻOku ʻikai totonu ke tau manavahē pe lotu ki he kau maté. ʻOku totonu ke tau lotu ki he ʻOtuá pē.​—Mātiu 4:10.

ʻE toe moʻui ʻa e kau maté. ʻE lava ke fafangu ʻe Sihova ʻa e kau maté ki ha moʻui ʻi ha māmani palataisi. ʻOku kei ʻi he kahaʻú ʻa e taimi ko iá. (Sione 5:28, 29; Ngāue 24:15) ʻOku lava ʻe he ʻOtuá ke fafangu ʻa e faʻahinga ko ia kuo nau maté ʻo hangē tofu pē ko e lava ke ke fafangu ha tokotaha mei he mohé.​—Maake 5:22, 23, 41, 42.

Ko e fakakaukau ko ia ʻoku ʻikai ke tau maté ko ha loi ia ʻoku fakamafola ʻe Sētane ko e Tēvoló. Ko Sētane mo ʻene kau tēmenioó ʻoku nau ʻai ʻa e kakaí ke nau fakakaukau ʻoku moʻui ʻa e ngaahi laumālie ʻo e kau maté pea nau fakatupunga ʻa e puké mo e ngaahi palopalema kehe. ʻOku kākaaʻi ʻe Sētane ʻa e kakaí, ʻi he taimi ʻe niʻihi fakafou ʻi ha ngaahi misi mo ha ngaahi vīsone. ʻOku fakahalaiaʻi ʻe Sihova ʻa e faʻahinga ko ia ʻoku nau feinga ke talanoa ki he kau maté.​—Teutalonome 18:10-12.