Faivelenga

ʻOKU tokoni ʻa e faivelengá ki hono ʻai ke longomoʻui ha malanga. Lolotonga ʻoku mahuʻinga ke maʻu ha fakamatala fakatupu-ʻilo, ko ha fakahoko longomoʻui mo faivelengá ʻa e meʻa ʻe tokoni ki hono maʻu ʻa e tokanga ʻa ha kau fanongo. Tatau ai pē pe ko e hā ho ʻātakai fakafonuá pe angaʻitangatá, ʻe lava ke ke fakatupu ʻa e faivelengá.

Leaʻaki ʻa e Ongoʻi. ʻI he lea ki ha fefine Samēlia, naʻe pehē ʻe Sīsū ko e faʻahinga ʻoku nau lotu kia Sihová kuo pau ke nau fai ia “ʻi laumālie pea fai ʻi moʻoni.” (Sione 4:24) Ko ʻenau lotú kuo pau ke ueʻi ia ʻe he ngaahi loto houngaʻia pea ʻi he feongoongoi mo e moʻoni ʻoku maʻu ʻi he Folofola ʻa e ʻOtuá. ʻI hono maʻu ʻe ha taha ʻa e loloto ko ia ʻo e mahuʻingaʻiá, ʻe tapua atu ia ʻi he founga ʻo ʻene leá. Te ne vēkeveke ke talanoa ki he niʻihi kehé fekauʻaki mo e ngaahi tokonaki ʻofa ʻa Sihová. Ko e fakahāhā ʻi hono matá, ko ʻene ngaue ke fakahaaʻi ʻa e fakakaukaú, pea mo hono leʻó ʻe tapua atu mei ai ʻa e founga moʻoni ʻo ʻene ongoʻí.

Ko e hā leva ʻe ʻikai nai ai ha faivelenga ʻi he malanga ʻa ha tokotaha malanga ʻoku ʻofa kia Sihova pea ʻokú ne tui ki he meʻa ʻokú ne leaʻakí? ʻOku ʻikai ke feʻunga ʻa ʻene teuteu pē ʻa e meʻa te ne leaʻakí. Kuo pau ke ne nōfoʻi kakato ʻi heʻene tuʻunga-leá, ʻo kau fakaeongo ki ai. Tau pehē kuo vaheʻi ia ke malanga fekauʻaki mo e feilaulau huhuʻi ʻa Sīsū Kalaisí. ʻI he fakahoko ʻe he tokotaha malangá ʻa ʻene malangá, ko ʻene ngaahi fakakaukaú kuo pau ke fakafonu, ʻo ʻikai ʻaki pē ʻa e ngaahi fakaikiikí, ka ko e houngaʻia ki he ʻuhinga ʻo e feilaulau ʻa Sīsuú fakatouʻosi ʻi he tokotaha malangá tonu pea ki heʻene kau fanongó. ʻOku fiemaʻu ke ne fakamanatu ʻa ʻene ngaahi ongoʻi houngaʻia kia Sihova ko e ʻOtuá mo Kalaisi Sīsū ʻi he tokonaki fakaofo ko ení. ʻOku fiemaʻu ke ne fakakaukau ki he ʻamanaki maʻongoʻonga ʻo e moʻuí ʻoku fakaʻatā mai ai ki he faʻahinga ʻo e tangatá—ko e fiefia taʻengata ʻi he moʻuilelei haohaoa ʻi ha māmani palataisi ʻe toe fakafoki mai! Ko ia ai, ʻoku fiemaʻu ke ne fakakau ki ai hono lotó.

Fekauʻaki mo e sikalaipe ko ʻĒselá, ko ha faiako ʻi ʻIsileli, ʻoku pehē ʻe he Tohitapú naʻá ne “teuteuʻi hono loto . . . ke kumi i he fono a Jihova, bea ke fai ia, bea ke akonaki i Isileli.” (Esela 7:​10, PM) Kapau te tau fai ʻa e meʻa tatau—ʻo teuteu ʻo ʻikai ngata pē ʻi he fakamatalá kae toe pehē ki hotau lotó—te tau lea ai mei he lotó. Ko e leaʻaki fakamātoato pehē ʻa e moʻoní ʻe lava ke ne fai ʻa e meʻa lahi ke tokoniʻi ʻa e faʻahinga ʻoku tau lea ki aí ke nau fakatupu ha ʻofa moʻoni ki he moʻoní.

Fakakaukau Fekauʻaki mo Hoʻo Kau Fanongó. Ko e meʻa mahuʻinga ʻe taha ʻi hono fakahāhā ʻa e faivelengá ko hono maʻu ʻa e tuipau ʻoku fiemaʻu ʻe hoʻo kau fanongó ke fanongo ki he meʻa ʻoku teu ke ke leaʻakí. ʻOku ʻuhinga ení ʻi hono teuteuʻi hoʻo malangá, ʻoku ʻikai totonu ke ke tātānaki pē ʻa e fakamatala mahuʻingá kae toe lotu foki kia Sihova ki heʻene tatakí ʻi hono ngāueʻaki ia ke maʻu ʻaonga mei ai ʻa e faʻahinga te ke lea ki aí. (Sāme 32:8; Mt. 7:​7, 8) ʻAnalaiso ʻa e ʻuhinga ʻoku fiemaʻu ai ke fanongo ʻa hoʻo kau fanongó ki he fakamatalá, founga ʻe ʻaonga ai kia kinautolú, mo e founga ʻe lava ke ke fakahoko ai ia ʻi ha founga te nau houngaʻia ai ʻi hono mahuʻingá.

Ngāue ki hoʻo fakamatalá kae ʻoua kuó ke maʻu ha meʻa ʻokú ke ongoʻi fiefia fekauʻaki mo ia. ʻOku ʻikai fiemaʻu ia ke foʻou, ka ʻe lava ke foʻou ʻa hoʻo fakakaukau ki he tuʻunga-leá. Kapau ʻokú ke teuteu ha meʻa ʻa ia ʻe tokoni moʻoni ki hoʻo kau fanongó ke ʻai ke mālohi honau vahaʻangatae mo Sihová, ke houngaʻia ʻi heʻene ngaahi tokonakí, ke fekuki lavameʻa mo e ngaahi tenge ʻo e moʻuí ʻi he fokotuʻutuʻu motuʻa ko ení, pe hoko ʻo ola lelei ʻi heʻenau ngāue faifekaú, ʻokú ke maʻu leva ʻa e ʻuhinga kotoa ke faivelenga ai fekauʻaki mo hoʻo malangá.

Fēfē kapau ko hoʻo kongá ke lautohi fakahāhā? Koeʻuhi ke fai ia ʻi he faivelenga, ʻoku fiemaʻu ʻa e meʻa lahi ange ʻi he malava pē ke leaʻaki totonu ʻa e ngaahi foʻi leá pea ke fakakulupu totonu fakataha kinautolu. Ako ʻa e fakamatalá. Kapau te ke lau ha konga ʻo e Tohitapú, fai ha fekumi ai. Fakapapauʻi ʻoku mahino kia koe ʻa hono ʻuhinga tefitó. Fakakaukau ki he anga ʻo ʻene ʻaonga kia koe pea ki hoʻo kau fanongó, pea lau fakataha mo ha holi ke fakahaaʻi ia ki he faʻahinga ʻoku fanongo kiate koé.

ʻOkú ke teuteu ki he malaʻe fakafaifekaú? Fakamanatu ʻa hoʻo tuʻunga-lea ki he fetalanoaʻakí pea mo e ngaahi konga Tohitapu ʻokú ke palani ke ngāueʻakí. Fakakaukau foki ki he meʻa ʻoku ʻi he fakakaukau ʻa e kakaí. Ko e hā kuo ʻi he ongoongó? Ko e hā ʻa e ngaahi palopalema ʻoku nau fetaulaki mo iá? ʻI hoʻo mateuteu ke fakahaaʻi ki he kakaí ʻoku ʻi he Folofola ʻa e ʻOtuá ʻa e ngaahi fakaleleiʻanga ki he ngaahi palopalema tofu pē ko ia ʻoku fekauʻaki mo kinautolú, ʻokú ke ongoʻi ai ha vēkeveke ke fai ia, pea ʻoku hoko fakanatula mai ai ʻa e faivelengá.

Fakahaaʻi ʻa e Faivelengá ʻAki ʻa e Fakahoko Longomoʻui. ʻOku fakahaaʻi mātuʻaki māʻalaʻala ʻa e faivelengá ʻaki ʻa e longomoʻui ʻi hoʻo fakahokó. ʻOku totonu ke hā mahino eni ʻi hono fakahaaʻi ʻo ho matá. Kuo pau ke ke ongo fakatupu tuipau, ʻo ʻikai fefeka.

ʻOku fiemaʻu ʻa e palanisi. ʻE hehema nai ʻa e niʻihi ke fiefia ʻi he meʻa kotoa pē. ʻE fiemaʻu nai ke tokoniʻi kinautolu ke nau ʻiloʻi ko e taimi ʻoku hoko ai ha tokotaha ʻo fie hā pe fakaueʻiloto tōtuʻá, ʻe fakakaukau ai ʻa ʻene kau fanongó fekauʻaki mo ia kae ʻikai fekauʻaki mo e pōpoakí. ʻI he tafaʻaki ʻe tahá, ko e faʻahinga ʻoku nau maá ʻoku fiemaʻu ʻa e fakalototoʻa ke nau lea lahi ange.

ʻOku pipihi ʻa e faivelengá. Kapau ʻokú ke fetuʻutaki lelei mo e kau fanongó pea faivelenga fekauʻaki mo hoʻo malangá, ʻe ongoʻi ʻe hoʻo kau fanongó ʻa e faivelenga ko iá. Naʻe fakahaaʻi ʻe ʻApolosi ʻa e longomoʻui ʻi heʻene leá, pea naʻe fakamatalaʻi ia ko ha tokotaha pōtoʻi lea. Kapau ʻokú ke loto-māfana ʻi he laumālie ʻo e ʻOtuá, ko hoʻo fakahoko longomoʻuí te ne ueʻi ʻa e faʻahinga ʻoku fanongo kia koé ke nau fai ha meʻa.​—Ng. 18:​24, 25; Loma 12:11.

Feʻungamālie ʻa e Faivelengá ki he Fakamatalá. Tokanga ke ʻoua ʻe fakahoko hoʻo faivelengá ʻi ha tuʻunga māʻolunga ʻi he kotoa hoʻo malangá ʻo hoko ai hoʻo kau fanongó ʻo helaʻia. Ko ha enginaki pē ʻokú ke fai ke ngāue ai ki he meʻa ʻoku fai ki ai ʻa e lāuleá ʻe fakatupu ongosia. ʻOku fakamamafaʻi heni ʻa e fiemaʻu ke teuteu ʻa e fakamatala ʻa ia ʻoku fakaʻatā ai ki ha tuʻunga kehekehe ʻi hoʻo fakahokó. Feinga ke ʻoua ʻe tō ki ha sīpinga ʻoku tapua mei ai ha taʻetokanga. Kapau te ke filifili lelei hoʻo fakamatalá, te ke mātuʻaki mahuʻingaʻia ai. Ka ʻoku fiemaʻu fakanatula ʻi he ngaahi poini ʻe niʻihi ʻa e faivelenga lahi ange ʻi hono fakahokó ʻi he ngaahi poini kehé, pea ko e ngaahi poini ko ení ʻoku totonu ke huluni pōtoʻi ia ʻi he kotoa hoʻo malangá.

Ko e ngaahi poini tefitó ʻoku totonu ke tautefito ʻa hono fakahoko faivelengá. Kuo pau ke faʻu hoʻo malangá ke aʻu ki he ngaahi tumutumú. Koeʻuhi ko e ngaahi poini māʻolunga eni hoʻo malangá, te nau faʻa hoko ko e ngaahi poini kuo faʻufaʻu ke ne ueʻi hoʻo kau fanongó. ʻI hono fakatuipauʻi hoʻo kau fanongó, ʻoku fiemaʻu ke ke ueʻi kinautolu, ke fakahaaʻi kia kinautolu ʻa e ngaahi ʻaonga ʻo hono ngāueʻaki ʻa e meʻa kuo fai ki ai e lāuleá. ʻE tokoniʻi koe ʻe hoʻo faivelengá ke ke aʻu ki he loto ʻo hoʻo kau fanongó. ʻOku ʻikai totonu ke fai fakamālohiʻi ʻa e fakahoko longomoʻuí. ʻOku totonu ke ʻi ai ha ʻuhinga ki ai, pea ʻe tokonaki atu ʻe hoʻo fakamatalá kia koe ʻa e ʻuhinga ko iá.