Ko e Hā ʻa e Pēteli?

Ko e Pētelí, ko ha hingoa faka-Hepelū ia, ʻoku ʻuhingá ko e “Fale ʻo e ʻOtuá.” (Sēnesi 28:17, 19, fakamatala ʻi lalo) Ko ha hingoa feʻungamālie ia ki he ngaahi fale kuo fokotuʻu ʻe he Kau Fakamoʻoni ʻa Sihová takatakai ʻi he māmaní ʻa ia ʻoku tataki mo poupouʻi mei ai ʻa e ngāue fakamalangá. ʻOku ngāue ʻa e Kulupu Pulé ʻi he ʻuluʻi ʻapitanga ki he māmaní ʻi he Siteiti Niu ʻIoké, ʻAmelika, pea ʻoku tokangaʻi mei ai ʻa e ngāue ʻa e ngaahi ʻōfisi vaʻá ʻi he ngaahi fonua lahi. ʻI he tuʻunga ko ha kulupú, ko e faʻahinga ʻoku ngāue ʻi he ngaahi fale ko ení ʻoku ʻiloa kinautolu ko e fāmili Pēteli. ʻI he hangē ha fāmilí, ʻoku nau nofo ʻo ngāue fakataha, kai fakataha, pea fāʻūtaha ʻi hono ako ʻa e Tohi Tapú.​—Saame 133:1.

Ko ha feituʻu makehe ʻa ia ʻoku foaki atu ai ʻe he ngaahi mēmipa ʻo e fāmilí kinautolu. ʻI he ʻapi Pēteli kotoa pē, ʻoku ʻi ai ʻa e kau tangata mo e kau fefine Kalisitiane ʻoku nau līʻoa atu kinautolu ke fai ʻa e finangalo ʻo e ʻOtuá pea ngāue taimi-kakato ki he ngaahi meʻa ʻo e Puleʻangá. (Mātiu 6:33) ʻOku ʻikai ke maʻu ʻe ha taha ʻo kinautolu ha vahe pe totongi, ka ʻoku ʻoange ki he tokotaha kotoa ʻa e loki mo e meʻakai pea mo ha kiʻi paʻanga ke tokoni ki heʻenau ngaahi fakamole fakafoʻituituí. Ko e tokotaha kotoa ʻi he Pētelí ʻoku ʻi ai ʻene ngāue, pe ʻi ha ʻōfisi, ʻi ha peito, pe ʻi ha loki kai. ʻOku ngāue ʻa e niʻihi ʻi ha fale pulusi pe ʻi ha tafaʻaki takafi tohi, pe fakamaau fale, fō, tauhi ʻa e ʻapí, pe ko e ngaahi meʻa kehe.

Ko ha feituʻu femoʻuekina ʻoku poupouʻi ai ʻa e malangaʻi ʻo e Puleʻangá. Ko e taumuʻa tefito ʻa e Pēteli kotoa pē ke ʻai ke ala maʻu ʻa e moʻoni Fakatohitapú ʻe he kakai tokolahi taha ʻe ala lavá. Ko e polosiua ko ení ko ha fakatātā ia ʻe taha ʻo e meʻa ko iá. Naʻe hiki ia ʻi he malumalu ʻo e tataki ʻa e Kulupu Pulé, ʻave fakaʻilekitulōnika ki he ngaahi timi liliu lea ʻe lauingeau takatakai ʻi he māmaní, pulusi ʻi he ngaahi mīsini pulusi vave ʻi he ngaahi fale pulusi he ngaahi Pēteli ʻe niʻihi, pea fakaheka ki he ngaahi fakatahaʻanga ʻe 110,000 tupu. Lolotonga ʻa e ngāue kotoa ko ení, ʻoku fai ai ʻe he ngaahi fāmili Pētelí ʻa e poupou ʻoku fiemaʻú ki he ngāue fakavavevave taha ʻi he ngāue kotoa pē​—ko hono malangaʻi ʻa e ongoongo leleí.​—Maʻake 13:10.

• Ko hai ʻoku ngāue ʻi Pētelí, pea ko e hā ʻa e ngaahi tokonaki ʻoku fai maʻanautolú?

• Ko e hā ʻa e ngāue fakavavevave ʻoku poupouʻi ʻe he ngāue ʻi he Pēteli taki taha?