LĒSONI 27

ʻOku Lava Fēfē Ke Mau Maʻu ʻAonga mei he Laipeli ʻa e Fale Fakatahaʻangá?

Ko ha tangata ‘okú ne ngāue‘aki ‘a e laipeli ‘i he Fale Fakataha‘angá — ʻIsileli

Taha ‘o e Kau Fakamo‘oni ‘a Sihová ‘okú ne tokoni ki ha talavou ke fai ‘ene fekumi — Lepupilika Seki

Ko ha ki‘i ta‘ahine ‘okú ne tohi hono hingoá ‘i he‘ene tohi hivá — Penini

Ko ha tangata ‘okú ne fekumi ‘i he Watchtower Library — ʻOtu Motu Keimeni

Te ke saiʻia ke fai ha fekumi ke fakalahi hoʻo ʻilo fekauʻaki mo e Tohi Tapú? ʻOkú ke fieʻilo fekauʻaki mo ha konga Tohi Tapu pe ko ha tokotaha pau, feituʻu, pe ko ha meʻa ʻoku lave ki ai ʻa e Tohi Tapú? Pe kuó ke fifili pe ʻe lava ke tokoniʻi koe ʻe he Folofola ʻa e ʻOtuá ʻi ha hohaʻa fakafoʻituitui ʻokú ke maʻu? Peʻi ʻaʻahi leva ki he laipeli ʻa e Fale Fakatahaʻangá.

ʻOku ʻomai ai ʻa e ngaahi meʻangāue fakaefekumi ʻaonga. Ngalingali ʻoku ʻikai te ke maʻu ʻa e ʻū tohi kotoa makatuʻunga ʻi he Tohi Tapú ʻa e Kau Fakamoʻoni ʻa Sihová ʻa ē ʻoku ala maʻu ʻi hoʻo leá. Ka ko e laipeli ʻa e Fale Fakatahaʻangá ʻoku ʻi ai ʻa e lahi taha ʻo e ʻū tohi ki muí ni maí. ʻOku toe ʻi ai nai ha ngaahi liliu Tohi Tapu kehekehe, ko ha tikisinale lelei, mo ha ngaahi tohi maʻuʻanga fakamatala ʻaonga kehe. ʻOku ʻatā ke ke ngāueʻaki ʻa e laipelí ki muʻa pea mo e hili ʻa e ngaahi fakatahá. Kapau ʻoku fokotuʻu ai ha komipiuta, ʻe ʻi ai nai ʻa e Watchtower Library. Ko ha polokalama fakaʻilekitulōnika eni ʻa ia ʻoku ʻi ai ha tānekina lahi ʻo ʻemau ʻū tohí mo ha tafaʻaki fakaefekumi faingofua ke ngāueʻaki ʻa ia ʻe lava ke ke kumi ai ki ha kaveinga, ko ha foʻi lea, pe ko ha konga Tohi Tapu.

ʻOku ʻaonga ia ki he kau ako ʻi he Fakataha ki he Moʻuí mo e Ngāue Fakafaifekaú. ʻOku malava ke ke ngāueleleiʻaki ʻa e laipeli ʻa e Fale Fakatahaʻangá ʻi hoʻo teuteuʻi hoʻo ngaahi lēsoní. ʻOku tokangaʻi ʻe he ʻovasia ʻo e Fakataha ki he Moʻuí mo e Ngāue Fakafaifekaú ʻa e laipelí. ʻOku fakafatongia ia ke ne fakapapauʻi ʻoku ʻi ai ʻa e ʻū tohi fakamuimui tahá pea ʻoku fokotuʻutuʻu lelei. Ko ia pe ko hoʻo faiako Tohi Tapú ʻe lava ke na fakahā atu kiate koe ʻa e founga ke maʻu ai ʻa e fakamatala ʻokú ke fiemaʻú. Kae kehe, ʻoku ʻikai totonu ke ʻave ha ʻū tohi mei he laipeli ʻa e Fale Fakatahaʻangá. Pea ko e moʻoni, ʻoku mau loto ke tokangaʻi lelei ʻa e ʻū tohí pea ke ʻoua ʻe tohitohiʻi ia.

ʻOku fakamatalaʻi ʻe he Tohi Tapú ke ‘maʻu ʻa e ʻiloʻi ʻo e ʻOtuá,’ kuo pau ke tau loto-lelei ke kumi ki ai ʻo hangē “ha haʻao ki ha koloa fufuú.” (Palōveepi 2:1-5) Ko e laipeli ʻa e Fale Fakatahaʻangá ʻe lava ke tokoni ia kiate koe ke kamata hoʻo fekumí.

Ko e hā ʻa e ngaahi meʻangāue fakaefekumi ʻoku ala maʻu he laipeli ʻa e Fale Fakatahaʻangá?
Ko hai ʻe lava ke ne tokoniʻi koe ke ke ngāueʻaki lelei taha ʻa e laipelí?