Fokotuʻutuʻu Foʻou ki he Ngaahi Laipeli ʻi he Fale Fakatahaʻangá
ʻI he ngaahi taʻu lahi he taimí ni, kuo maʻu ʻaonga ai ʻa e ngaahi fakatahaʻanga ʻi he kotoa ʻo e māmaní mei hono ngāueʻaki ʻo ʻenau laipeli ʻi he Fale Fakatahaʻangá, ʻa ia naʻe ui ki muʻa ko e laipeli Ako Fakafaifekau Fakateokalatí. ʻI he kuohilí, ne vakai ki ai ʻoku fiemaʻu ke maʻu ʻe he fakatahaʻanga taki taha ʻene laipeli tonu. Kae kehe, ʻi hono ngāueʻaki ʻa e ngaahi Fale Fakatahaʻanga lahi he taimí ni ʻe he fakatahaʻanga laka hake he tahá, ko e niʻihi ai ko e ngaahi fakatahaʻanga lea muli, ʻoku hā ngali lelei tahá ke ʻai ha laipeli teuʻi lelei mo fakaeonopooni pē ʻe taha ki he kulupu lea ʻe taha ʻi he Fale Fakatahaʻanga taki taha. ʻI he ngaahi Fale Fakatahaʻanga ʻoku ʻi ai ʻa e loki fakataha laka hake he tahá, ko e loki fakataha taki taha ʻoku totonu ke ʻi ai hano laipeli ki he kulupu lea taki taha ʻoku fakataha ʻi aí.
ʻOku ʻamanekina ko e fokotuʻutuʻu ko ení ʻe tokoni ia ke tauhi ai ha feituʻu ʻatā pea tokoni ki he fakamolé. ʻIkai ngata aí, ko hono fakatahaʻi ʻa e laipeli ʻa ha fakatahaʻanga ʻe ua pe lahi angé ʻoku ngalingali lahi ʻe maʻu ai ha ngaahi laipeli lelei ange. ʻI hono fakatahaʻi ení, ko e toe ngaahi tatau ʻo e ʻū tohí ʻe tauhi nai ia pea ngāueʻaki ʻamui ʻi he taimi ʻe langa ai ʻa e ngaahi Fale Fakatahaʻanga foʻoú. Kapau ʻoku fakanaunau ʻaki ʻa e Fale Fakatahaʻangá ha komipiuta fakataha mo e Watchtower Library ʻi he Sītī, ʻe ʻiloʻi nai ʻe he niʻihi ʻoku mātuʻaki ʻaonga ʻa e meʻangāué ni.
Ki he laipeli ʻa e Fale Fakatahaʻanga taki taha, ko ha tokoua ʻe toko taha, ʻe sai ange ha taha ʻo e kau ʻovasia ʻo e Ako Fakafaifekau Fakateokalatí, ʻe ngāue ko e tokotaha tauhi laipelí. ʻOku totonu ke ne hokohoko tānaki atu ʻa e ʻū tohi ʻoku feʻungamālié ki he tānekingá, ʻo fakaʻilongaʻi maau ʻa e takafi ʻi loto ʻo e tohi taki taha ke fakahaaʻi ai ko e meʻa ia ʻa e laipeli ʻi he Fale Fakatahaʻangá. ʻIkai siʻi hifo he tuʻo tahá ʻi he taʻu, ʻoku totonu ke ne vakaiʻi ai ʻoku kakato ʻa e laipelí pea fakapapauʻi ʻoku ʻi ha tuʻunga lelei ʻa e ʻū tohí. Ko e ʻū tohi mei he ngaahi laipelí ni ʻoku ʻikai totonu ke ʻave ia mei he Fale Fakatahaʻangá.
ʻOku hokohoko atu hono fakahoungaʻi lahi ʻa e laipeli ʻa e Fale Fakatahaʻangá ʻe he faʻahinga kotoa ʻoku feohi mo e fakatahaʻangá. ʻOfa ke tau fakahaaʻi ʻoku tau fakamahuʻingaʻi fakafoʻituitui ʻa e tokonakí ni ʻaki hono tokangaʻi ia pea ʻaki hono ngāueʻaki ia ke kumi ki he “ʻiloʻi ʻo e ʻOtua.”—Pal. 2:5.