Puha Fehuʻi
◼ Ko e hā ʻa e ngaahi tohi ʻoku totonu ke tuku ʻi he laipeli ki he Akoʻanga Fakafaifekau Fakateokalatí?
Ko ha ngaahi tohi fakalaumālie lahi ʻaupito kuo tokonaki ke maʻu ʻaonga mei ai ʻa e kakai ʻa e ʻOtuá. Koeʻuhi ʻoku ʻikai ke maʻu ʻe he kau malanga tokolahi ʻa e kotoa ʻo e ngaahi tohí ni fakafoʻituitui, ko e laipeli ʻa e Akoʻanga Fakafaifekau Fakateokalati ʻi he Fale Fakatahaʻangá ʻokú ne tokonaki mai ʻa e ngaahi founga ke fekumi ai ʻi he ngaahi tohi ʻoku ʻikai nai ke ala maʻú. Ko ia ai, ʻoku totonu ai ke fakanāunauʻi lelei ʻaki ha ngaahi liliu Tohitapu kehekehe, ko e ngaahi tohi lolotonga ʻa e Sōsaietí, ngaahi tatau ʻo ʻEtau Ngāue Fakafaifekau ʻo e Puleʻanga, ngaahi voliume ʻo e Taua Leʻo mo e Awake!, pea mo e Watch Tower Publications Indexes. Tānaki atu ki ai, ʻoku totonu ke fakakau atu ki ai ha tikisinale lelei fakaeonopooni. Kapau ʻe ala maʻu, ʻe hoko ʻo ʻaonga nai ʻa e ngaahi ʻenisaikolopētia, ngaahi ʻatalasa, pe ngaahi tohi maʻuʻanga fakamatala ki he kalamá mo e hisitōliá. Kae kehe, ko ʻetau tokanga tefitó ʻoku totonu ke fai ia ki he ngaahi tohi kuo tokonaki mai ʻe he “tamaioeiki agatonu mo boto.”—Mt. 24:45, PM.
ʻI he ngaahi tuʻunga ʻe niʻihi ʻoku pehē ai ʻoku ʻi ai ha ngaahi tohi ʻoku ʻikai ke feʻunga kuo tuku ʻi he laipeli ʻa e Akoʻanga Fakafaifekau Fakateokalatí. ʻE ʻikai ʻaupito ke feʻunga ke fakakau atu ki ai ha fakamatala faʻu pē, ngaahi fakamatala ki he Tohitapú ʻoku fakaeʻa ai ʻa e ngaahi fakakaukau ʻa e kau ako fakaangaʻi ʻo e Tohitapú, pe ngaahi tohi fekauʻaki mo e fakakaukau fakafilōsefá pe fakahaʻele faʻahikehé. Ko e laipeli ʻa e Akoʻanga Fakafaifekau Fakateokalatí ʻoku totonu ke fakakau ki ai ʻa e fakamatala pē ʻe malava ai ʻe he faʻahinga ʻoku nau ngāueʻaki iá ke nau hokohoko atu hono fai ha fakalakalaka fakalaumālie.—1 Tim. 4:15.
Ko e ʻovasia ki he akoʻangá ʻokú ne tokangaʻi ʻa e laipelí, neongo ko ha tokoua ʻe taha ʻe lava ke vaheʻi ke tokoni kiate ia ʻi hono tokangaʻi iá. ʻOku totonu ke ne sio ko e laipelí ʻoku lele lelei, fakataha mo e ngaahi tohi foʻou ʻoku tānaki atu ki ai ʻi he taimi pē ʻoku ala maʻu aí. Ko e tohi taki taha ʻoku totonu ke fakaʻilongaʻi lelei ʻi loto ʻi he takafí ʻaki ʻa e hingoa ʻo e fakatahaʻanga ʻoku ʻaʻana ʻa e tohi ko iá. ʻI he taʻu kotoa pē, ʻoku totonu ke vakaiʻi ʻa e ngaahi tohí ke sio pe ʻoku ʻi ai ha fiemaʻu ke fakaleleiʻi pe fetongi.
ʻE lava ke fengāueʻaki ʻa e tokotaha kotoa pē ʻi hono tokangaʻi ʻa e laipelí. Ko e tokangá ʻoku totonu ke fai ia ki hono tokangaʻi mo ngāueʻaki ʻa e ngaahi tohí. Ko e fānaú ʻoku ʻikai totonu ke fakaʻatā ke nau vaʻingaʻaki kinautolu, pea ʻoku ʻikai totonu ki ha taha ke ne fakaʻilongaʻi kinautolu. ʻE lava ke fakaʻaliʻali ha fakaʻilonga hā mahino ko ha fakamanatu ko e ngaahi tohí ʻoku ʻikai fiemaʻu ke ʻave mei he Fale Fakatahaʻangá.
ʻI ha ngaahi fakatahaʻanga foʻou kuo fokotuʻu, ʻoku ngalingali ko e ngaahi laipeli lahi ʻe fakangatangata pē hono lahí. Ko e kau malanga ʻe niʻihi ʻoku nau maʻu ʻa ʻetau ngaahi tohi motuʻá te nau fakakaukau nai ke foaki kinautolu ki he fakatahaʻangá. Ko e kau mātuʻá te nau fiemaʻu nai ke ʻota ki he Sōsaietí ke toe pulusi ha ngaahi voliume ʻo e Taua Leʻo. ʻI he ngaahi founga ko ʻení, ʻe hoko ʻa e laipeli ʻa e Akoʻanga Fakafaifekau Fakateokalatí ʻo ʻaonga ʻaupito ki hono tokoniʻi kotoa ke maʻu ʻa e ngaahi koloa fufū ʻo e Folofola ʻa e ʻOtuá, ʻa ia ʻokú ne ʻomai ʻa e ʻiló, potó, pea mo e mahinó.—Pal. 2:4-6.