Ko e Hā ʻa e Kī ki he Moʻui Fakafāmili Fiefiá?

KO E LAU ʻA E TOHI TAPÚ

“He fiefia ē ko e faʻahinga ʻoku fanongo ki he folofola ʻa e ʻOtuá pea tauhi iá!”​—Luke 11:28, Liliu Tohi Tapu Māmani Foʻoú.

ʻAONGA TE KE MAʻU MEI AÍ

Maʻu ai ʻa e ʻofa moʻoní.​—ʻEfesō 5:28, 29.

Maʻu ai ʻa e fakaʻapaʻapa moʻoní.​—ʻEfesō 5:33.

Maʻu ai ʻa e maluʻanga moʻoní.​—Maʻake 10:6-9.

TE TAU TUI MOʻONI KOĀ KI HE LAU ʻA E TOHI TAPÚ?

ʻIo, ʻi he ʻuhinga ʻe ua:

• Ko e ʻOtuá ko e Tupuʻanga ia ʻo e moʻui fakafāmilí. ʻOku pehē ʻe he Tohi Tapú ko Sihova ko e ʻOtuá “ʻoku tupu mei ai ʻa e hingoa ʻo e fāmili kotoa pē.” (ʻEfesō 3:14, 15) ʻI hono fakalea ʻe tahá, ko e ʻi ai ʻa e fāmilí koeʻuhí naʻe fokotuʻu ia ʻe Sihova. Ko e hā ʻoku mahuʻinga ai iá?

  Fakakaukau angé: Kapau naʻá ke ifoʻia ʻi ha meʻatokoni ifo peá ke loto ke ʻilo ki he founga naʻe ngaohi ai iá, ko hai te ke ʻeke ki aí? ʻOku ʻuhinga lelei ke ʻeke ki he tokotaha naʻá ne ngaohi iá.

  ʻOku pehē pē, ke ʻiloʻi ʻa e founga ke maʻu ai ha moʻui fakafāmili fiefiá, ʻoku lelei ke tau hanga kia Sihova, ko e Tupuʻanga ia ʻo e fokotuʻutuʻu ʻo e fāmilí.—Sēnesi 2:18-24.

• ʻOku tokanga mai ʻa e ʻOtuá kiate koe. ʻOku fakapotopoto ʻa e ngaahi fāmilí ʻi heʻenau kumi ki he akonaki ʻa Sihová, ʻa ia ʻokú ne tokonaki mai fakafou ʻi heʻene Folofolá. Ko e hā hono ʻuhingá? “Koeʻuhí he ʻokú ne tokanga mai kiate kimoutolu.” (1 Pita 5:6, 7) ʻOku loto ʻa Sihova ke ke maʻu ʻa e lelei tahá—pea ko ʻene akonakí ʻoku ola lelei maʻu pē!—Palōveepi 3:5, 6; ʻAisea 48:17, 18.