Naʻe Loto ʻa Lepeka ke ʻAi ʻa Sihova ke Fiefia

Ko Lepeká ko ha fefine naʻe ʻofa kia Sihova. Ko e hingoa hono husepānití ko ʻAisake pea naʻe toe ʻofa mo ia kia Sihova. Naʻe anga-fēfē ʻa e fetaulaki ʻa Lepeka mo ʻAisaké? Naʻe anga-fēfē ʻene fakahaaʻi naʻá ne loto ke ʻai ʻa Sihova ke fiefiá? Tau ako lahi angé fekauʻaki mo Lepeka.

Ko e ongo mātuʻa ʻa ʻAisaké ko ʻĒpalahame mo Sela. Naʻa nau nofo ʻi he fonua ko Kēnaní, ʻa ia ko e kakai aí naʻe ʻikai ke nau lotu kia Sihova. Ka naʻe loto ʻa ʻĒpalahame ke mali hono fohá mo ha fefine naʻe lotu kia Sihova. Ko ia, mahalo ko ʻEliesa ʻene sevāniti naʻe fekauʻi ke kumi ha uaifi ʻo ʻAisake ʻi he feituʻu naʻe ui ko Hālani, ʻa ia naʻe nofo ai ʻa e niʻihi ʻo e ngaahi kāinga ʻo ʻĒpalahamé.

Naʻe fononga ʻa ʻEliesa mo e niʻihi ʻo e kau sevāniti ʻa ʻĒpalahamé. Ko ha fuʻu fononga mamaʻo ia. Naʻa nau ō mo ha kāmeli ʻe hongofulu naʻe fakaheka ai ʻa e meʻakai mo e ngaahi meʻaʻofa. Naʻe ʻiloʻi fēfē ʻe ʻEliesa ʻa e fefine ke fili maʻa ʻAisaké? ʻI he aʻu atu ʻa ʻEliesa mo e niʻihi ʻo e kau sevānití ki Hālaní, naʻa nau mālōlō ʻi ha vaikeli koeʻuhí naʻe ʻiloʻi ʻe ʻEliesa kuo mei omi ʻa e kakaí ke ʻutu vai. Naʻá ne lotu kia Sihova ʻo pehē: ‘Ko e kiʻi fefine te u kole ke ʻomai ha vai peá ne ʻomi ia kiate au mo fakainu ʻeku fanga kāmelí, te u ʻilo ai ko e fefine eni kuó ke filí.’

Naʻe haʻu ʻa e kiʻi fefine ko Lepeká ki he vaikelí. ʻOku pehē ʻe he Tohi Tapú ko e taʻahine talavou ʻaupito. Naʻe kole ange ʻe ʻEliesa ha vai kiate ia ke ne inu, peá ne pehē: ‘ʻIo. Te u ʻoatu ha vai maʻau pea te u ʻalu ʻo ʻomai ha vai ki hoʻo fanga kāmelí foki.’ Kiʻi fakakaukau angé! Ko e fanga kāmeli fieinuá ʻoku nau inu lahi, ko ia ai naʻe pau kia Lepeka ke toutou lele ki he vaikelí. ʻOkú ke sio ʻi he fakatātaá ki he ngāue lahi ʻokú ne faí?— Naʻe ofo ʻa ʻEliesa ʻi he founga naʻe tali ai ʻe Sihova ʻene lotú.

Naʻe ʻoange ʻe ʻEliesa kia Lepeka ha ngaahi meʻaʻofa fakaʻofoʻofa. Naʻá ne fakaafeʻi ʻa ʻEliesa mo ʻene kau sevānití ki hono ʻapí. Naʻe fakamatala ʻe ʻEliesa ʻa e ʻuhinga naʻe fekau mai ia ʻe ʻĒpalahamé mo e founga naʻe tali ai ʻe Sihova ʻene lotú. Naʻe fiefia ʻa e fāmili ʻo Lepeká ke ʻoatu ia ke mali mo ʻAisake.

Ka ʻokú ke fakakaukau naʻe loto ʻa Lepeka ke mali mo ʻAisake?— Naʻe ʻiloʻi ʻe Lepeka naʻe fekau ange ʻe Sihova ʻa ʻEliesa. ʻI he taimi naʻe ʻeke ai ʻe he fāmili ʻo Lepeká pe ʻoku loto ke ʻalu ki Kēnani ʻo mali mo ʻAisaké, naʻá ne tala ange: ‘ʻIo, ʻoku ou loto ke ʻalu.’ ʻI he taimi pē ko iá, naʻá ne ʻalu mo ʻEliesa. ʻI heʻena aʻu ki Kēnaní, naʻe mali ʻa Lepeka mo ʻAisake.

Koeʻuhí naʻe fai ʻe Lepeka ʻa e meʻa naʻe loto ki ai ʻa Sihová naʻe tāpuakiʻi ia ʻe Sihova. Hili ʻa e ngaahi taʻu lahi mei ai, naʻe fanauʻi ʻa Sīsū mei hono fāmilí! Kapau te ke hangē ko Lepeká mo ʻai ʻa Sihova ke fiefia te ne tāpuakiʻi mo koe foki.