Fetalanoaʻaki Fakaʻosi mo e Kau Teu Papitaisó

Ko e papitaisó ʻoku faʻa fakahoko ia ʻi he ngaahi ʻasemipilī mo e ngaahi fakataha-lahi ʻa e Kau Fakamoʻoni ʻa Sihová. ʻI he fakaʻosinga ʻo e malanga papitaisó, ʻe kole ai ʻe he tokotaha-malangá ki he kau teu papitaisó ke nau tuʻu hake pea tali leʻo-lahi ʻa e ongo fehuʻi hokó:

1. Kuó ke fakatomala mei hoʻo ngaahi angahalá, fakatapui koe kia Sihova pea tali ʻene ʻalunga ʻo e fakahaofí fakafou ʻia Sīsū Kalaisi?

2. ʻOku mahino kiate koe ko hoʻo papitaisó ʻoku ʻiloʻi ai koe ko e taha ʻo e Kau Fakamoʻoni ʻa Sihová ʻi he feohi mo e kautaha ʻa Sihová?

Ko e tali papau ki he ongo fehuʻi ko ení ʻoku kau ki ai hono “talaki fakahāhā” ʻe he kau teu papitaisó ʻenau tui ki he huhuʻí mo ʻenau fakatapui kakato kinautolu kia Sihová. (Loma 10:9, 10) Ko e kau teu papitaisó te nau loto ke tomuʻa fai ha fakakaukau ʻi he lotu ki he ongo fehuʻí ni koeʻuhi ke nau lava ʻo tali ʻo fehoanakimālie mo ʻenau ngaahi tuipau fakafoʻituituí.

Kuó ke fakatapui koe kia Sihova ʻi he lotu, ʻo palōmesi ke lotu kiate ia toko taha pē pea ʻai ko e meʻa mahuʻinga taha ʻi hoʻo moʻuí ʻa e fai hono finangaló?

ʻOkú ke tuipau kakato he taimí ni ʻoku totonu ke ke papitaiso ʻi he ʻuluaki faingamālié pē?

Ko e hā ʻa e vala ʻoku taau ki he papitaisó? (1 Tīm. 2:9, 10; Sione 15:19; Fil. 1:10)

ʻOku totonu ke tau ʻai vala “fakataha mo e anga-fakanānā mo e fakakaukau lelei” koeʻuhi ke fakahaaʻi ai ʻetau “anga-līʻoa ki he ʻOtuá.” Ko ia, ko e faʻahinga ʻoku teu papitaisó heʻikai ke nau tui ha teunga kaukau tahi ʻoku aata pe ko ha vala ʻoku ʻasi ai ha ngaahi lea pe ngaahi tuʻuaki. ʻOku totonu ke nau ʻai vala ʻi ha founga ʻoku maau, maʻa mo fakafiemālie pea feʻungamālie mo e meʻa ʻoku faí.

ʻOku totonu ke fēfē ʻa e tōʻonga ʻa ha taha ʻi he taimi ʻoku papitaiso aí? (Luke 3:21, 22)

Ko e papitaiso ʻa Sīsuú ʻoku fokotuʻu mai ai ʻa e faʻifaʻitakiʻanga ki he ngaahi papitaiso faka-Kalisitiane he ʻaho ní. Naʻá ne mahinoʻi ko e papitaisó ko ha sitepu mafatukituki, pea naʻe tapua atu eni ʻi heʻene fakakaukaú mo ʻene tōʻongá. Ko ia ai, ko e feituʻu faiʻanga papitaisó ʻe ʻikai ko ha feituʻu ia ki ha fakakata tōtuʻa, vaʻinga, kaukau, pe ko ha tōʻonga kehe ʻa ia te ne fakasiʻisiʻia ʻa e mafatukituki ʻo e meʻá ni; ʻe ʻikai ke fakahoko ʻe ha Kalisitiane foʻou ha meʻa ʻo hangē ia kuó ne maʻu ha ikuna lahí. Lolotonga ko e papitaisó ko ha taimi fakafiefia, ko e fiefia ko iá ʻoku totonu ke fakahāhā ia ʻi ha founga fakangeingeia.

ʻE anga-fēfē hono tokoniʻi koe ʻe he fakatahataha mo e feohi maʻu pē mo e fakatahaʻangá ke ke fakahoko ʻa hoʻo fakatapui kia Sihová?

Hili hoʻo papitaisó, ko e hā ʻe mātuʻaki mahuʻinga ai ke ke tauhi maʻu ha taimi-tēpile lelei ʻo e ako fakafoʻituituí pea kau maʻu pē ʻi he ngāue fakafaifekaú?

NGAAHI FAKAHINOHINO KI HE KAU MĀTUʻA ʻI HE FAKATAHAʻANGÁ

ʻI he taimi ʻoku ʻai ai ʻe ha tokotaha malanga teʻeki papitaiso ke ʻiloʻi ʻene fie papitaisó, ʻoku totonu ke fakalototoʻaʻi ia ke ne fakamanatu fakalelei ʻa e “Ngaahi Fehuʻi ki he Faʻahinga ʻOku Fie Papitaisó,” ʻoku maʻu ʻi he peesi 185-207 ʻo e tohi ko ení. ʻOku totonu ke ne tokanga ki he konga “Ko ha Pōpoaki ki he Tokotaha Malanga Teʻeki Papitaisó,” ʻoku kamata ʻi he peesi 182, ʻa ia ʻoku fakamatala ai ki he founga ʻe lava ke ne teuteu ai ki he ngaahi fetalanoaʻaki mo e kau mātuʻá. Hangē ko ia ʻoku fakahaaʻi aí, ko e tokotaha ʻoku ʻamanaki ke papitaisó ʻe lava ke ne ngāueʻaki ʻa ʻene ngaahi nouti fakafoʻituituí pea ʻe lava ke fakaava ʻa e tohí ni lolotonga ʻa e ngaahi fetalanoaʻakí. Kae kehe, ʻoku ʻikai fiemaʻu ki ha taha kehe ke ne fakamanatu ʻa e ngaahi fehuʻí mo ia ki muʻa ke ne fakataha mo e kau mātuʻá.

Ko ha tokotaha pē ʻoku fie papitaiso ʻoku totonu ke fakahā ia ki he sea ʻo e kulupu ʻo e kau mātuʻá. Hili hono maʻu ʻe he tokotaha ʻoku kole ke papitaisó ʻa e taimi ke lau ai ʻa e “Ngaahi Fehuʻi ki he Faʻahinga ʻOku Fie Papitaisó,” ʻe ʻeke ʻe he sea ʻo e kulupu ʻo e kau mātuʻá ki he tokotahá pe kuó ne fai ha fakatapui fakafoʻituitui ʻi he lotu kia Sihova ke fai Hono finangaló. Kapau kuo fai ʻe he tokotahá ha fakatapui, ʻe fai leva ʻe he sea ʻo e kulupu ʻo e kau mātuʻá ha fokotuʻutuʻu ki ha mātuʻa ʻe toko ua ke fetalanoaʻaki mo e tokotahá ʻi he “Ngaahi Fehuʻi ki he Faʻahinga ʻOku Fie Papitaisó.” ʻOku totonu ke vaheʻi ki ha mātuʻa kehekehe ke ne fakahoko ʻa e konga taki taha. ʻOku ʻikai fiemaʻu ke tatali ʻa e ngaahi fetalanoaʻaki ko ení kae ʻoua leva ke toki fanongonongo ha ʻasemipilī pe fakataha-lahi.

Ko e konga ʻe uá ʻe lava ke faʻa ʻosiki ia ʻo meimei houa ʻe taha ʻa e konga taki taha, neongo ʻoku ʻikai taʻofi hono ngāueʻaki ʻa e taimi lahi ange ʻo kapau ʻoku fiemaʻu. Ko e konga taki taha ʻoku totonu ke kamata mo fakaʻosiʻaki ʻa e lotu. ʻOku ʻikai totonu ki he tokotaha teu papitaisó pe ko ha mātuʻa ke fakavaveʻi ʻa e lāulea ki he ngaahi fehuʻí. Ko ha mātuʻa ʻoku vaheʻi ʻe fiemaʻu ke ne ʻai ʻa e lāulea ko ení ko ha meʻa muʻomuʻa ia ʻi heʻene taimi-tēpilé.

ʻOku faʻa lelei tahá ke fakamanatu ʻa e ngaahi fehuʻí mo e tokotaha teu papitaiso tāutaha, ʻo ʻikai ʻi ha kulupu. ʻI hono ʻai ha tokotaha teu papitaiso ke tali ʻa e fehuʻi kotoa pē, ʻe maʻu ai ʻe he mātuʻa ʻe toko uá ha fakakaukau māʻalaʻala fekauʻaki mo e loloto ʻo ʻene mahinó, ʻo ʻikai ai ha veiveiua pe ʻokú ne mateuteu ki he papitaisó. Tānaki atu ki ai, ko e tokotaha ʻoku kole ke papitaisó ʻe hehema lahi ange nai ke ne fai ha fakamatala ʻi he fokotuʻutuʻu ko ení. Ko ha husepāniti mo ha uaifi ʻe lava ke fakaʻekeʻeke fakataha kinaua.

Kapau ko e tokotaha teu papitaisó ko ha tuofefine, ko e ngaahi fetalanoaʻakí ʻoku totonu ke fai ia ʻi ha founga ʻe lava ke sio lelei mai ki ai ʻa e niʻihi kehé kae ʻikai ke nau fanongo ki ai. Kapau ʻoku fiemaʻu ke ʻalu mo ha taha kehe, ʻoku totonu ko ha mātuʻa pe ko ha sevāniti fakafaifekau, ʻo fakatuʻunga ʻi he konga ʻoku fakamanatú, ʻo hangē ko ia ʻoku fakamatala ki ai ʻi he palakalafi hokó.

ʻI he ngaahi fakatahaʻanga ʻoku tokosiʻi ʻaupito ai ʻa e kau mātuʻá, ko e kau sevāniti fakafaifekau taau ʻoku nau fakahāhā ʻa e fakafuofua lelei mo e ʻiloʻiló te nau fakamanatu nai mo e faʻahinga tāutaha ʻa e ngaahi fehuʻi ki he papitaisó ʻoku hā ʻi he “Konga 1: Ngaahi Tui Faka-Kalisitiane.” Ko e kau mātuʻá pē ʻoku totonu ke nau lāulea ki he “Konga 2: Moʻui Faka-Kalisitiane.” Kapau ʻoku ʻikai ke tokolahi ʻa e fanga tokoua taau ʻi he fakatahaʻangá, ʻe fai nai ha fetuʻutaki ki he ʻovasia sēketí ke fakapapauʻi pe ʻoku ʻi ai nai ha fakatahaʻanga ofi mai ʻe malava ke tokoni.

Kapau ʻoku kei siʻi ʻa e tokotaha teu papitaisó, ʻoku totonu ke kau ʻene (ongo) mātuʻa ʻoku tuí ʻi he fetalanoaʻakí. Kapau heʻikai lava ʻo kau ki ai ʻa e (ongo) mātuʻá, pea ko e mātuʻa leva ʻe toko ua (pe ko ha mātuʻa mo ha sevāniti fakafaifekau, ʻo makatuʻunga ʻi he konga ʻoku fai ki ai ʻa e lāuleá) ʻoku totonu ke kau ʻi he konga taki taha.

ʻE fakapapauʻi ʻe he mātuʻa ʻe toko uá ko e tokotaha ʻoku holi ke papitaisó kuó ne maʻu ha mahino feʻunga ʻo e ngaahi tefitoʻi moʻoni tefito Fakatohitapú. Tānaki atu ki ai, te na loto ke fakapapauʻi pe ʻokú ne fakamahuʻingaʻi loloto ʻa e moʻoní pea fakahāhā ʻa e ʻapasia totonu ki he kautaha ʻa Sihová. Kapau ʻoku ʻikai ke mahinoʻi ʻe he tokotahá ʻa e ngaahi akonaki Fakatohitapu tefitó, ʻe fokotuʻutuʻu ʻe he mātuʻa ʻe toko uá ke ne maʻu ʻa e tokoni fakafoʻituitui koeʻuhí ke lava ʻo ne taau ai ki he papitaisó ʻi ha taimi ʻamui ange. ʻE fiemaʻu nai ki he niʻihi ke tuku ange ha taimi ke nau fakahāhā ai ʻa e mahuʻingaʻia lahi ange ʻi he ngāue fakamalangá pe fakamoʻulaloa ki he ngaahi fokotuʻutuʻu fakaekautahá. ʻE tuku ki he mātuʻa ʻe toko uá ke na ngāueʻaki ʻa e fakapotopotó ʻi hono vaheʻi ʻa e houa ʻe taha pe lahi ange ʻoku fakamoleki ʻi he konga taki taha koeʻuhi ke ʻiloʻi kakato ai pe ʻoku mateuteu ʻa e tokotahá ki he papitaisó. Neongo ʻe fakamoleki nai ʻa e taimi lahi ange ʻi he ngaahi fehuʻi pau pe taimi siʻisiʻi ʻi he ngaahi fehuʻi kehé, ʻoku totonu ke fakamanatu ʻa e ngaahi fehuʻí kotoa.

Ko e mātuʻa ʻe toko ua ʻoku vaheʻi ke na fakamanatu ʻa e ngaahi fehuʻi ko ení te na fakataha ʻi he hili ʻa e konga hono uá pea fakapapauʻi ai pe ʻoku totonu ke tali ke papitaiso ʻa e tokotaha ko iá pe ʻikai. Ko e mātuʻa ʻe toko uá te na fakakaukauʻi ʻa e puipuituʻa, malava mo e ngaahi tuʻunga kehe ʻo e tokotaha taki taha. Ko e meʻa ʻoku tau tokanga ki aí ko e faʻahinga ko ia kuo tafoki honau lotó kia Sihova pea kuo nau mahinoʻi ʻa e ngaahi moʻoni tefito Fakatohitapú. ʻI hoʻo tokoni ʻofá, ʻe tokoniʻi ai ʻa e faʻahinga ʻoku teu papitaisó ke nau mateuteu feʻunga ke fakahoko honau vāhenga-ngāue mahuʻinga ʻi he tuʻunga ko e kau faifekau ʻo e ongoongo leleí.

Hili iá, ko e toko taha pe fakatouʻosi ʻa e mātuʻa ʻe toko ua kuo vaheʻí ʻoku totonu ke na fakataha mo e tokotaha ko iá ʻo tala ange kiate ia pe ʻokú ne taau ki he papitaisó pe ʻikai. Kapau ʻoku taau ʻa e tokotahá, ʻoku totonu ke fakamanatu ʻe he mātuʻa ʻe toko uá mo ia ʻa e “Fetalanoaʻaki Fakaʻosi mo e Kau Teu Papitaisó,” ʻoku maʻu ʻi he peesi 206-207. Kapau ʻoku teʻeki ai ʻosi hono ako ʻe he tokotaha teu papitaisó ʻa e tohi Fiefia ʻi he Moʻuí ʻo Taʻengata!, ʻoku totonu ke fakalototoʻaʻi ia ʻe he kau mātuʻá ke ne ako ia hili ʻa e papitaisó. Fakahaaʻi ki he tokotaha teu papitaisó ko hono ʻaho papitaisó ʻe fakakau ia ki heʻene lēkooti ʻi he Congregation’s Publisher Record. Fakamanatu kiate ia ʻoku tānaki ʻe he kau mātuʻá ʻa e fakamatala fakafoʻituitui ko ení meiate ia koeʻuhi ke lava ʻe he kautahá ʻo tokangaʻi ʻa e ngaahi ngāue fakalotu ʻa e Kau Fakamoʻoni ʻa Sihova ʻi māmani lahí pea koeʻuhi ke lava ʻo kau nai ʻa e tokotaha malangá ʻi he ngaahi ngāue fakalaumālié pea maʻu ʻa e poupou fakalaumālié. Tānaki atu ki aí, ʻoku lava ke fakamanatu ʻe he mātuʻa ʻe toko uá ki he kau malanga foʻoú ko ha fakamatala fakafoʻituitui pē ʻoku ngāueʻaki ia ʻo fakatatau ki he Global Data Protection Policy of Jehovah’s Witnesses ʻoku maʻu ʻi he jw.org. Ko e fetalanoaʻaki ko ení ʻoku faʻa fiemaʻu ia ke miniti pē ʻe hongofulu pe siʻi ange ai.

ʻI he hili ʻa e taʻu ʻe taha ʻo e papitaiso ʻa e tokotaha malangá, ʻoku totonu ke fakataha ʻa e mātuʻa ʻe toko ua mo ia ke ʻoange ha fakalototoʻa mo ha ngaahi fokotuʻu ʻaonga. Ko e taha ʻi he mātuʻa ʻe toko uá ʻoku totonu ko e ʻovasia kulupu ia ʻa e tokotahá. Kapau ko e tokotaha foʻoú ʻoku kei siʻi, ʻoku totonu ke ʻi ai ʻene (ongo) mātuʻa ʻoku tuí. ʻOku totonu ke mātuʻaki fakalotomāfana mo fakalototoʻa ʻa e laumālie ʻo e fakatahá. ʻE lāulea ʻa e toko ua ʻo e kau mātuʻá ki heʻene fakalakalaka fakalaumālié pea ʻoange ha ngaahi fokotuʻu ʻaonga ki he founga ʻe lava ke ne hokohoko atu ʻi ha founga-tuʻumaʻu lelei ʻo e ako fakafoʻituitui mo lau fakaʻaho ʻa e Tohi Tapú, lotu fakafāmili fakauike, faitōnunga ʻi hono maʻu ʻa e fakatahá pea kau ki ai, mo ngāue fakamalanga ʻi he uike kotoa. (ʻEf. 5:15, 16) Kapau ʻoku teʻeki ai ke ʻosi ʻene ako ʻa e tohi Fiefia ʻi he Moʻuí ʻo Taʻengata!, ʻoku totonu ke fai ʻe he toko ua ʻo e kau mātuʻá ha ngaahi fokotuʻutuʻu ki ha taha ke ne fakaʻosi ʻa e akó. ʻOku totonu ke anga-lelei ʻa e mātuʻa ʻe toko uá ʻi heʻena fakaongoongolelei anga-ʻofá. ʻOku faʻa feʻunga pē ha akonaki mo e fokotuʻu ʻe taha pe ua.