Puha Fehuʻi

◼ Ki muʻa ke taau ha tokotaha malanga teʻeki papitaiso ke papitaisó, ʻoku totonu ke lahi fēfē ʻene maʻu ʻa e ngaahi fakataha ʻa e fakatahaʻangá mo kau ki he ngāue fakafaifekaú?

Ko e hoko ʻo papitaisó ko e fili mahuʻinga taha ia ʻe fai ʻe ha tokotaha. Ko ia ai, ki muʻa ke taau ha tokotaha ke papitaiso, kuo pau ke ne maʻu ha mahino feʻunga ki he meʻa ʻoku fiemaʻu mai ʻe he ʻOtuá meiate iá. Tānaki atu ki aí, ʻoku totonu ke ne ʻosi fakahāhā ʻa e fakapapau ke moʻui ʻo fakatatau ki he meʻa ʻoku fiemaʻu ʻe he ʻOtuá.

ʻOku fekauʻi ʻa e kau Kalisitiané ke ʻoua ʻe liʻaki ʻenau fakatahataha fakatahá, ko ia ko e tokotaha malanga teʻeki papitaisó kuo pau ke ne tomuʻa fakahāhā tōtōivi ʻa e kau ʻi he ngaahi fakataha ʻa e fakatahaʻangá. (Hep. 10:24, 25) ʻE lava ke kau ki ai ʻi hono angaʻaki ʻo e fai ha tali. Ngalingali, ʻe kau ki he Ako Fakafaifekau Fakateokalatí neongo ʻoku ʻikai ko ha fiemaʻu pau ia.

Tānaki atu ki aí, ʻi hono fekauʻi ʻa e kau Kalisitiané ke malangaʻi ʻa e ongoongo leleí mo ngaohi ākongá, ʻoku totonu ki ha tokotaha malanga teʻeki papitaiso ke kau tuʻumaʻu ʻi he ngāue fakafaifekaú ki muʻa ke papitaisó. (Māt. 24:14; 28:19, 20) Ko e māhina ʻe fiha ʻoku totonu ke ne malanga aí ki muʻa pea toki lava ke papitaisó? ʻI ha ʻuhinga lelei, ʻoku totonu ke ne fakaʻatā ha taimi feʻunga ke fakahāhā ʻokú ne fakapapauʻi ke tuʻumaʻu pea anga-maheniʻaki ʻa e kau faivelenga ki he ngāue fakafaifekaú ʻi he māhina taki taha. (Saame 78:37) Kae kehe, ʻoku ʻikai fiemaʻu ia ke fuʻu fuoloa mei he taimi naʻá ne kamata malanga aí kae ʻoua ke taau ke papitaiso, mahalo ko ha māhina siʻi pē. Ko e hā hono lahi e taimi ngāue fakamalanga ʻoku totonu ke hiki ʻi heʻene līpōtí? ʻOku ʻikai ke ʻi ai ha lao pau ia. ʻOku totonu ke fakakaukauʻi ʻe he kau mātuʻá ʻa e ngaahi tuʻunga makehe ʻo e tokotaha malanga taki taha pea nau hoko ʻo fakaʻatuʻi mo mafamafatatau.—Luke 21:1-4.

Ko e kau mātuʻá (pe kau sevāniti fakafaifekau ʻi he ngaahi fakatahaʻanga ʻoku tokosiʻi ai ʻa e kau mātuʻá) ʻoku nau fakataha mo e tokotaha teu papitaisó, ʻoku totonu ke nau manatuʻi ʻoku kehekehe ʻa e tokotaha kotoa pē, pea ʻoku totonu ke nau ngāueʻaki ʻa e fakafuofua leleí ʻi hono fakapapauʻi pe ʻoku taau ke ne papitaiso. Te nau ʻamanekina ʻokú ne maʻu ha holi moʻoni ke hoko ko e taha ʻo e Kau Fakamoʻoni ʻa Sihová pea fakahāhaaʻi ʻa e houngaʻia ʻi hono monū ʻi he feohi mo e kautaha ʻa Sihová mo kau ʻi he ngāue fakafaifekaú. ʻOku mahinoʻi ʻe he kau mātuʻá ʻoku teʻeki ai ke ne hoko ʻo matuʻotuʻa fakalaumālie pe maʻu ha pōtoʻi taukei ʻo ha tokotaha ʻevangeliō ʻosi papitaiso. Kapau ʻe pehē ʻe he kau mātuʻá ʻoku ʻikai taau ke papitaiso ʻa e tokotaha teu papitaisó, ʻoku totonu ke nau fakahā anga-ʻofa kiate ia ʻa e ngaahi ʻuhinga Fakatohitapu ki heʻenau filí pea tokoniʻi ia ke ne maʻu ʻa e tokoni fakalaumālié.