AKO 10

Fetūkuaki ʻo e Leʻó

Palōveepi 8:4, 7

MEʻA KE FAÍ: Fakahaaʻi māʻalaʻala ʻa e ngaahi fakakaukaú pea ueʻi ʻa e ngaahi ongó ʻaki ʻa e fetūkuaki ʻi he lahi, māʻolunga mo e vave ho leʻó.

Fetūkuaki ʻa e lahi ho leʻó. Tuku hake ʻa e lahi ho leʻó ke fakamamafaʻi ʻa e ngaahi poini tefitó pea ueʻi ʻa hoʻo kau fanongó. Fai ʻa e meʻa tatau ʻi he taimi ʻokú ke lau ai ha konga Tohi Tapu fekauʻaki mo ha fakamaau. Tuku hifo ʻa e lahi ho leʻó ke langa hake ha fakatuʻamelie pe ke fakahaaʻi atu ʻa e manavahē pe hohaʻa.

ʻOua ʻe faʻa ʻai ke leʻo-lahi ho leʻó naʻa ongoʻi ʻe hoʻo kau fanongó ʻoku tafuluʻi kinautolu. Fakaʻehiʻehi mei hono tohoaki mai ʻa e tokangá kiate koé ʻaki ʻa e hoko ʻo fuʻu fakahāhā tōtuʻa.
Fetūkuaki ʻa e māʻolunga ho leʻó. Kapau ʻoku feʻungamālie ʻi hoʻo leá, ʻai ke māʻolunga ho leʻó ke fakahaaʻi ʻa e loto-mafaná pe fakahaaʻi ʻa e lahi pe mamaʻo ʻo ha meʻa. ʻAi ke māʻulalo ange ho leʻó ke fakahaaʻi ʻa e mamahi pe loto-moʻua.
Fetūkuaki ʻa e vave ho leʻó. Lea vave ange ʻi hoʻo fakahaaʻi ha meʻa fakafiefia. Lea māmālie ange ʻi hono fakahaaʻi ha poini mahuʻinga.

Ke fakaʻehiʻehi mei hono fakaʻohovaleʻi hoʻo kau fanongó, ʻoua ʻe liliu fakafokifā ʻa e vave hoʻo leá. ʻOua ʻe lea fuʻu vave naʻa uesia ai ʻa hoʻo puʻaki ʻa e leá.