TOE FOKI
LĒSONI 7
Kītaki
Tefitoʻi Moʻoní: “Naʻa nau hokohoko atu ʻo ʻikai tuku ʻa e faiako mo hono talaki ʻa e ongoongo lelei.”—Ngā. 5:42.
Meʻa Naʻe Fai ʻe Paulá
1. Sio ʻi he VITIOÓ, pe lau ʻa e Ngāue 19:8-10. Fakakaukau leva ki he ongo fehuʻi ko ení:
a. ʻOku anga-fēfē ʻetau ʻiloʻi naʻe kītaki ʻa Paula ʻi hono malangaʻi ʻa e ongoongo leleí neongo naʻe fakafepakiʻi ia ʻe he niʻihi?
e. Naʻe tuʻo fiha ʻa e toe foki ʻa Paula ke akoʻi ʻa e faʻahinga mahuʻingaʻia ko ení pea ko e hā hono lōloa ʻene fai peheé?
Ko e Hā ʻOku Tau Ako meia Paulá?
2. ʻOku fiemaʻu ke tau vaheʻi ʻa e taimi pea feinga ke fai ʻa e ngaahi toe ʻaʻahi ola lelei pea kamataʻi ʻa e ngaahi ako Tohi Tapu.
Faʻifaʻitaki kia Paula
3. Feʻunuʻaki hoʻo taimi-tēpilé ki he fiemaʻu ʻa e tokotahá. ʻEke hifo: ‘Ko fē ʻa e taimi ʻoku ngalingali ʻe feʻungamālie ke u fetuʻutaki ai kiate iá? Ko fē ʻa e taimi mo e feituʻu ʻoku ngalingali te ne fie talanoa ai mo aú?’ Loto-lelei ke toe foki kiate ia naʻa mo e taimi ʻoku ʻikai ke faingamālie kiate koé.
4. Fokotuʻu ha taimi pau. ʻI he hili ʻa e fetalanoaʻaki taki taha, feinga ke fakapapauʻi ha taimi pau ʻe lava ke ke toe talanoa ai mo e tokotahá. Fakapapauʻi ke ke fai pau ki he taimi kuo fokotuʻú.
5. ʻOua ʻe foʻi. ʻOua ʻe fakavave ke fakakaukau ʻoku ʻikai ke mahuʻingaʻia ha tokotaha kapau ʻoku tātātaha ʻene ʻi ʻapí pe faʻa femoʻuekina. (1 Kol. 13:4, 7) ʻI hono kehé, kītaki ʻi he kumi ki he tokotahá kae ngāue fakapotopoto ʻaki ho taimí.—1 Kol. 9:26.