Toe Foki ki he Faʻahinga Mahuʻingaʻiá—ʻI he Taimi Fē?
1. Ko e hā ʻoku kau ki he ngaohi ākongá?
1 Ko e ngaohi ākongá ʻoku kau ki ai ʻa e toe foki ki ha taha pē ʻokú ne fakahaaʻi ha loto-lelei ke ako fekauʻaki mo e fokotuʻutuʻu ʻo e Puleʻanga ʻo Sihová. (Mt. 28:19, 20) Ko e taimi lelei taha ke fai ai ʻa e toe ʻaʻahí ʻoku faʻa fakatuʻunga ia ʻi heʻetau taimi-tēpilé pea pehē ki he taimi-tēpile ʻa e tokotaha mahuʻingaʻiá. Ko e hā ʻoku totonu ai ke tau toe foki ʻi he hili ha taimi nounou pē mei heʻetau ʻuluaki ʻaʻahí?
2, 3. Ko e hā ʻoku totonu ai ke tau feinga ke toe foki ʻi he vave taha ʻe ala lavá?
2 Ko e Hā ke Foki Vave Aí? Ko e ngāue malangaʻi ʻo e “ongoongolelei ko eni ʻo e puleʻanga” ʻoku vave ke ngata, pea ko e ngataʻanga ʻo e fokotuʻutuʻu ko ení kuo ofi. (Mt. 24:14; 1 Pita 4:7) Ko ia ai, lolotonga ʻoku kei faingamālie pē ki he faʻahinga mahuʻingaʻiá ʻa e “ʻaho fai fakamoʻui,” kuo pau ke tau tokanga ki he ekinaki ke ‘malangaʻaki fakavavevave ʻa e folofolá,’ ʻa ia ʻoku kau ki ai ʻa e toe foki ʻi he vave taha ʻe ala lavá ke fakatupulekina ʻa e mahuʻingaʻia kuo fakahāʻí.—2 Kol. 6:1, 2; 2 Tim. 4:2.
3 ʻOku vēkeveke ʻa Sētane ke ʻave ha faʻahinga tenga pē ʻo e Puleʻangá ʻa ia kuo tau tō ʻi he loto ʻo ha tokotaha mahuʻingaʻia. (Mk. 4:14, 15) Ko e ngaahi mēmipa ʻo e fāmilí, kaungāngāué mo e niʻihi kehé te nau faʻa manukiʻi ʻa e faʻahinga kuo nau fakahāhā ʻa e mahuʻingaʻiá. Ko e toe foki vavé ʻoku malava ai ke hoko atu ʻetau fetalanoaʻaki ki muʻá, ki muʻa ke lavameʻa ʻa e niʻihi kehé ʻi hono ʻai ke mōlia atu ʻa e mahuʻingaʻia naʻe haá.
4. ʻI he ʻuluaki ʻaʻahí, ʻe anga-fēfē haʻatau fakatoka ha makatuʻunga ke fai ai ha toe ʻaʻahi?
4 Fai ha Fokotuʻutuʻu: ʻOku lelei tahá ke fai ha ngaahi fokotuʻutuʻu pau ke toe foki ai ki muʻa ke ke mavahe mei he ʻuluaki ʻaʻahí. ʻOhake ha fehuʻi ʻa ia te ke tali ʻi hoʻo ʻaʻahi hono hokó. ʻOku mahuʻinga ke tauhi ha lēkooti fakafoʻituitui lelei ʻo e meʻá ni. Kapau ʻoku fakaʻatā ʻe hoʻo taimi-tēpilé, te ke kole nai ke ke toe foki atu ʻi he ʻaho hono hokó pe taimi siʻi pē mei ai. Kapau ko e ʻuluaki ʻaʻahí ʻi he fakaʻosinga ʻo e uiké pea ʻoku ngāue ʻa e tokotaha mahuʻingaʻiá he lolotonga ʻo e uiké, mahalo te ne loto ki ha toe ʻaʻahi ʻi he fakaʻosinga ʻo e uike hoko maí. ʻI he taimi ʻokú ke fai ai ha fokotuʻutuʻu, fakapapauʻi ke ke fai ki hoʻo leá.—Mt. 5:37.
5. ʻE anga-fēfē ʻa e hoko ʻetau toe foki vavé ke fakahoko ai ʻa e fekau ʻa Sīsū ke ngaohi ākongá?
5 ʻOku ʻi ai ʻa e ngaahi ʻuhinga lelei ke tau toe foki ai ki he faʻahinga mahuʻingaʻiá ʻi he vave taha ʻe ala lavá. Ko ia ai, fai ha fokotuʻutuʻu pea foki vave, he “kuo fakanounou” ʻa e taimí. (1 Kol. 7:29) Ko e vave ange ʻetau toe ʻaʻahi ki he faʻahinga ʻoku mahuʻingaʻia ʻi he pōpoaki ʻo e Puleʻangá, ʻe ngalingali ke ola lelei ange ai ʻa ʻetau ngaahi feingá.