Fakaleleiʻi ʻEtau Pōtoʻi ʻi he Ngāue Fakafaifekaú—Fakatoka ʻa e Makatuʻunga ki ha Toe ʻAʻahi

ʻUhinga ʻOku Mahuʻinga Aí: ʻI he taimi ʻoku tau maʻu ai ha taha ʻokú ne fakahāhā ha mahuʻingaʻia, ʻoku tau loto ke toe foki ʻi he taimi ʻe ʻi ʻapi aí kae lava ke tau fuʻifuʻi ʻa e tenga ʻo e moʻoní naʻa tau toó. (1 Kol. 3:6) ʻI he ki muʻa ke tau mavahé ʻoku faʻa fiemaʻu heni ke tau fakatoka ha makatuʻunga ki ha toe ʻaʻahi, ʻaki hono ʻeke ʻa e taimi te tau toe foki nai ki aí. Tānaki atu ki ai, ʻoku lelei ke tuku ha fehuʻi ke tau lāulea ki ai ʻi heʻetau ʻaʻahi hokó. ʻE langaʻi ai heni ʻa e fakatuʻamelie ʻa e tokotaha-ʻapí ki he ʻaʻahí, pea kapau ʻoku tali ʻa e fehuʻí ʻe he tohi naʻa tau tuku mo iá, ngalingali te ne saiʻia ke lau ia. Ko hono fakatoka ʻa e makatuʻunga ki he fetalanoaʻaki hono hokó ʻoku toe faingofua ange ai ke fai ha toe foki koeʻuhí ko e kaveinga ki he fetalanoaʻakí naʻe ʻosi fakahaaʻi ia, pea kuo ʻiloʻi ʻe he tokotaha-ʻapí ʻa e meʻa ʻe fai ki ai ʻa e talanoá. ʻI he taimi te tau toe fetaulaki ai mo iá, ʻoku lava ke tau fakamatala ʻoku tau toe foki atú ke tali ʻa e fehuʻi naʻe ʻohake ʻi he ʻaʻahi fakamuimuí pea toki hoko atu leva.