Kau Talavou ʻOku Tauhi ʻa e ʻOtuá

ʻOKU ngalikehe kiate koe ke ʻi ai ha kau talavou lelei ʻa ia te nau foaki honau taimí, ʻo ʻikai ha totongi, ke haʻu ki ho matapaá ke talanoa ʻo kau ki he ʻOtuá? ʻOku hā ngali fakaofo, ʻi ha kuonga ʻoku tupulekina ai ʻa e taʻetuí, ke kau fakataha ʻa e fānaú mo ʻenau mātuʻá ʻi he talanoa ki he niʻihi kehé ʻo kau ki he ngaahi talaʻofa fakaofo ʻa e Tohitapú ki ha kahaʻu fiefia?a

ʻI he lahi taha ʻo e ngaahi fakatahaʻanga ʻe 60,000 tupu ʻa e Kau Fakamoʻoni ʻa Sihová ʻi he māmani lahí, te ke ʻilo ai ha kau talavou tokolahi. ʻOku ʻikai te nau ʻalu ki he lautohi faka-Sāpate fakauiké pe lotu fehuʻi mo e talí. Ka ko e kau talavou ko ʻení ʻoku nau maʻu ʻa e ʻaonga pea ʻoku nau kau ki he ngaahi fakataha ʻa e fakatahaʻangá. Ko kinautolu ʻoku kei iiki angé ʻoku nau fai nai ha ngaahi fakamatala faingofua. Ko kinautolu ʻoku teʻeki ke talavoú ʻoku nau kau ki he Ako Fakafaifekau Fakateokalatí. Ko e tokolahi ʻo e kau talavoú ʻoku nau ngāueʻaki ʻa e taimi ʻoku tutuku ai ʻa e akó ke tokoni ki honau ngaahi kaungāʻapí ke ako ʻo kau ki he ʻOtuá mo ʻene ngaahi talaʻofa fakaofo ki he kahaʻú.

Ko e faʻahinga ngāue pehē ʻa e toʻutupú ʻoku ʻikai ko ha meʻa foʻou. ʻOku tala ʻe he Tohitapú kiate kitautolu ʻo kau ki he kau tangata mo e kau fefine angatonu pea pehē ki he toʻutupu mo e fānau iiki, ʻa ia naʻa nau fokotuʻu ha faʻifaʻitakiʻanga tuʻu-ki-muʻa ʻi he tauhi ki he ʻOtuá.

Naʻe kikiteʻi ʻe he tohi Sāmé ha “kau talavou,” mateuteu mo tokolahi ʻo hangē ko e “hahau,” ʻi he ngāue fakaʻotuá. Naʻe toe fakahā foki ʻo kau ki he “kau talavou” mo e “finemui” ʻoku fakamālō ki he huafa ʻo e ʻOtuá. (Sāme 110:3; 148:​12, 13) ʻOku ngalingali naʻe ʻi ai ha kau talavou ʻi he haʻohaʻonga ʻo kinautolu naʻe huaʻi hifo ki ai ʻa e laumālie māʻoniʻoni ʻo e ʻOtuá ki he kau tui ʻi he ʻaho Penitekosi ʻo e 33 T.S. ʻI he ʻaho ko iá ʻoku fakafuofua ki he toko 3,000 nai naʻa nau tali ʻa e Folofolá pea naʻa nau papitaiso. Naʻe pehē ʻe he ʻapositolo ko Pitá ko e meʻa fakaʻohovale ko ʻení ko ha fakahoko ia ʻo e kikite ʻa Sioelí: “ʻE toki palōfisai ʻe homou ngaahi foha mo homou ngaahi ʻofefine pea ko e kau talavou ʻomoutolu te nau mata visone, pea ko e mātuʻa ʻomoutolu te nau faʻa misi.”​—Ngāue 2:​4-8, 16, 17, 41.

Ko e ngaahi faʻifaʻitakiʻanga kehe ʻi he Tohitapú ʻo e kakai naʻa nau tauhi ki he ʻOtua ko Sihová ʻi heʻenau kei toʻutupú ko Sāmiuela, Tuʻi angatonu ko Tēvitá, ko e kau palōfita ʻiloa ko Selemaia mo Tāniela, pea pehē ki he mateaki ko Tīmote. Ko e ʻīsiu ko ʻení ʻoku ʻi ai ʻa e kupu ʻe tolu ʻoku lave ki he niʻihi ʻo e ngaahi faʻifaʻitakiʻanga faka-Tohitapu ko ʻení. ʻE lava ke ke ʻilo mei he ngaahi kupu ko ʻení ʻa e ʻuhinga ʻo e fai ʻe he toʻutupú, pea pehē ki he faʻahinga ʻoku matuʻotuʻa angé ʻa e ngāue ki he ʻOtuá ʻo fakamātoato pehē pea mo e ʻuhinga ʻoku nau fakamoleki lahi ai ʻa e taimí ʻi he tokoni ki honau ngaahi kaungāʻapí ke nau fai pehē.

[Fakamatala ʻi lalo]