Līpooti ʻa e Kau Fanongonongo ʻo e Puleʻangá
ʻOku ʻAi ʻe he ʻOtuá ke Tupu Ia ʻi ʻAlasikā
ʻI LALO ʻi he kofukofu ʻe he sinoú mo e ʻaisí, ʻoku tatali ai ha kiʻi foʻi tenga valevale ki ha faingamālie ke tupu ai ʻo matuʻotuʻa. ʻI loto ʻi he māhina nounou ʻe tolu ko e lōloa ia ʻo e faʻahitaʻu māfana ʻo ʻAlasikaá, ko ha foʻi tengaʻi kāpisi ko hono taiamitá ko e milimita ʻe tolú ʻe tupu nai ia ʻo meimei kilokalami ʻe 40! ʻIo, ko e fonuá ni ʻa ia naʻe fakakaukau ʻi he taimi ʻe taha ʻa e tokolahi ko ha fonua kakā, momoko lahi ʻo ʻikai lava ke fua ai ha meʻá ʻoku lava ke ne fakatupu ha fua lahi.
ʻOku tautefito ʻa e moʻoni ʻo e meʻá ni ʻi he malaʻe fakalaumālie ʻi ʻAlasikaá. ʻI aí, ʻi he fonua ʻo e momoko fuoloá, ʻoku hokohoko atu ai ʻa e Kau Fakamoʻoni ʻa Sihová ʻi hono tūtuuʻi ʻa e tenga ʻo e Puleʻangá. Hangē ko ia ʻi he ngaahi tapa kehe ʻo e māmaní, ʻoku ʻai ʻe he ʻOtuá ke tupu ʻa e tengá ʻi he ngaahi loto fua leleí.—1 Kolinito 3:6, 7.
● Lolotonga ʻa e ʻi ha pasi ako, ko ha tokotaha Fakamoʻoni kei siʻi ko Vanessa naʻá ne fakatokangaʻi ai ʻa hono kaungā-ako, ko Ann, ʻa ia ʻoku tangutu tokotaha maʻu pē. Naʻe hā mata-mamahi ʻa Ann, ko ia ai, naʻe fakaafeʻi ʻe Vanessa ʻa Ann ke tangutu ʻi hono tafaʻakí. Naʻe ʻikai ha ofo ʻi he mamahi ʻa Ann! Ne mate ʻene faʻeé ʻi he tuʻu fakafokifā e tā hono mafú, pea ʻi ha taimi nounou ki mui ai, naʻe mate ʻa ʻene tamaí ʻi he kanisaá. Ko hono ʻuhinga ia naʻe nofo ai ʻa Ann mo hono kāinga ʻi ʻAlasikaá.
Naʻe tuʻu atu ʻa Vanessa ʻi he ʻapi ʻo hono maheni foʻoú lolotonga ʻa ʻene ʻi he ngāue fakamalangá ʻi he Tokonaki ʻe taha ʻo tuku atu kiate ia ʻa e polosiua ko e Does God Really Care About Us? ʻI he Mōnite hono hokó ʻi he akoʻangá, naʻe fekumi ʻa Ann ki he kiʻi tokotaha Fakamoʻoní. Naʻe lahi ʻa e ngaahi fehuʻi faka-Tohitapu ʻa Ann, ʻa ia naʻe lava ʻa Vanessa ke ne tali. “Ko fē ʻoku fai ai hoʻomou lotú?” ko ʻene fehuʻí ia. Naʻe ʻuluaki maʻu fakataha ai ʻa Ann ʻi he efiafi ko iá ʻi he Fale Fakatahaʻangá.
Naʻe ʻikai ke fuoloa kuo maʻu ʻe he tokotaha mātuʻa mate taʻu 17 ko ʻení ʻa e ‘ngaahi tamai’ mo e ‘ngaahi faʻe,’ ʻo hangē tofu pē ko e talaʻofa ʻa Sīsuú. (Mātiu 19:29) Pea ko ha taimi fakafiefia ia ke sio ki ha Ann fiefia mo malimali ʻi heʻene fakahāhaaʻi ʻa ʻene fakatapui kia Sihová ʻaki ʻene papitaiso ʻi he vaí ʻi he Fakataha-Lahi Fakavahe “Kau Talafekau ʻo e Melino Fakaʻotuá”!
● ʻI he ngaahi feituʻu mamaʻo ʻo e fuʻu vahefonua ʻĀketika ʻAlasikaá—ʻa ia ʻoku vaheʻiʻaki ʻa e ngaahi koló ʻa e ngaahi kilomita ʻe laui ngeau ʻo e lalá—kuo ngāueʻaki ai ʻa e vakapuna mīsini ua ʻa e Sōsaieti Taua Leʻó ke tūtuuʻi ʻa e tenga ʻo e Puleʻangá laka hake ʻi he ngaahi feituʻu ʻe 150. Ka ko e tupu fakalaumālie fakafou ʻi ha ako tuʻumaʻu ʻo e Tohitapú ʻoku fakatuʻunga ia ʻi he fetohiʻakí. Koeʻuhi ko e faitohí ko ha ngāue faingataʻa ia ki he tokolahi, ʻoku fiemaʻu ki ha faiako Tohitapu ke pōtoʻi koeʻuhi ke ne tauhi ke moʻui ʻa e mahuʻingaʻia ʻa e tokotaha akó. ʻE fakahoko fēfē nai ʻa e meʻá ni?
Naʻe fai ʻe Kathy ha ako Tohitapu fakalakalaka mo Edna, neongo naʻá na nofo māvahevahe laka hake he kilomita ʻe 600! ʻI he ʻikai ke hiki pē ʻa e ngaahi fehuʻi ʻi he tohi tokoní, naʻe faʻu ʻe Kathy ʻa e ngaahi fehuʻí ʻi ha lauʻi pepa pea tuku ai ha sipeisi ke tohi ai ʻa e ngaahi talí. Hili ʻa e fakafonu ʻe Edna ʻa e ngaahi talí, naʻe tali atu leva ʻe Kathy pea fakahū atu ai ʻa e ngaahi fakamatala ko ia naʻe fiemaʻu ke fakamaʻalaʻalaʻaki ha poiní. ʻOku fakamatala ʻa Kathy: “Naʻá ku tuku mavahe ʻa e efiafi Pulelulú ki heʻema ‘akó,’ pea naʻá ku feinga ke tauhi ki ai ʻo hangē pē ko ia ʻoku ou fai ki ha ʻapoinimeni ako Tohitapu pē. Naʻá ku toe ʻave foki kia Edna ha sila kuo ʻosi fakasitapa ke tali mai ʻaki. Koeʻuhi naʻe fiemaʻu ʻa e uike ʻe ua ki he taimi ʻo e meilí, naʻe hā ko e meʻa tuai ʻa e ako fakafou ʻi he fetohiʻakí.”
Fakaʻuta atu ki he loto-māfana ʻi he taimi naʻe fetaulaki femātaaki ai ʻa Kathy mo Edna ʻi he fakataha-lahi fakavahe ʻi Anchorage hili ʻa e ako māhina ʻe hongofulu fakafou ʻi he meilí! Naʻe toe fiefia foki ʻa e Kau Fakamoʻoní ko e ʻi he kau maʻu fakatahá ʻa e kau ako Tohitapu mo e faʻahinga mahuʻingaʻia kehe mei he ngaahi kolo mamaʻo ʻi ʻAlasikaá.
Neongo ʻoku hā ngali māmālie ʻa e tupú ʻi ha ngaahi taimi, ʻoku tupu vave ʻa e “ngaahi tenga” ʻe niʻihi ʻi he taimi ʻoku fakaeʻa ai ki he maama ʻo e moʻoní. ʻI hono fakaʻavalisí, ʻoku laka hake ʻi he toko teaú ʻa e kau fakahīkihiki foʻou ʻo Sihova ʻoku nau papitaiso ʻi he taʻu taki taha ʻi ʻAlasikā! ʻOku tau pehē, “Fakamālō atu, Sihova,” ʻi hono ʻai ia ke tupú!