Ko ha Kaihaʻa Ne Fakafehālaakiʻi ʻi ʻAfilika Hihifo
Fakamatala fai ʻe Eunice Ebuh
“Naʻe palani ʻe he kau kaihaʻa toʻo meʻataú ʻenau ʻohó, ʻi he ʻaho ko ia ʻoku faʻa fai ai ʻemau Ako Tohi Fakaefakatahaʻangá ʻi homau ʻapí. ʻOku mau tuku fakaava pē ʻa homau ngaahi matapā ʻaá ki homau fanga tokouá mo e fanga tuofāfiné mo e faʻahinga mahuʻingaʻiá. ʻOku ngalingali naʻe ʻiloʻi ʻe he kau kaihaʻá ʻa e meʻa ʻoku mau faʻa faí, pea mo e taimi fakatahá. ʻOku mau ʻilo fakapapau naʻa nau kaihaʻasi ha kā mei ha feituʻu kehe pea nau haʻu ʻo tatali ʻi homau veʻe matapā ʻaá ʻi he ʻaho mo e taimi ʻo e ako tohí.
“Hangē ko ia naʻe hokó, ko e uike naʻa nau haʻu aí ko e uike ʻaʻahi ia ʻa e ʻovasia fakafeituʻú. Naʻe ʻikai te mau fakataha ai ʻi homau falé ka naʻa mau fakataha kimautolu ki he Fale Fakatahaʻangá. ʻI he taimi naʻe ʻosi ai ʻa e fakatahá, naʻe fai e fakataha ʻa e kau mātuʻá. Ko e anga-mahení ia ko e fānaú mo au te mau ʻosi ʻalu kimautolu ki ʻapi, ka ko hoku husepānití, ʻa ia ko ha mātuʻa, naʻá ne kole mai ke mau talitali ange ki ai. Naʻá ne tala mai he ʻikai te ne fuoloa. Ko ia, naʻa mau talitali ai.
“Ko e meʻa naʻe hoko maí naʻa mau ʻilo naʻe ʻikai lava ke fakamoʻui ʻa e kaá. Naʻe ʻikai lava ke ngaahi ia ʻe he ʻovasia fakafeituʻú mo hoku husepānití. Ko e ʻenisinia naʻa mau ui maí naʻe ʻikai te ne lava mo ia foki ʻo ngaahi.
“Naʻe pau ai ki he fānaú ke nau lue lalo ki ʻapi. Hili atu ha taimi, naʻá ku ʻalu mo au foki ki ʻapi. Naʻá ku aʻu ʻi he taimi hongofulú nai. Naʻe ʻikai te u hū atu pe ko e fānaú ki loto-ʻapi ʻi ha kā, ʻa ia naʻe mei fiemaʻu ai ia ke fakaava ʻa e matapā lahi ʻo e ʻaá.
“ʻI he taimi naʻá ku hū ai ki hoku loki mohé, naʻá ku fanongo ki ha fana ha meʻafana, ʻo fuʻu leʻo-lahi ʻaupito. Naʻá ku fifili pe ko e hā e meʻa naʻe hokó. Naʻá ku feinga ke telefoni ki he kau polisí, ka naʻe mate ʻa e telefoní ia. Naʻá ku fakavave ki lalo ʻo lokaʻi ʻa e matapā sitila hūʻangá, peá u fakatoʻotoʻo atu leva ke lokaʻi ʻa e matapā ʻi lotó. Naʻá ku tāmateʻi ʻa e ngaahi māmá. Naʻe manavahē ʻaupito ʻeku fānaú, ko ia naʻá ku tala ange ke nau loto-mokomoko pē. Naʻa mau lotu fakataha ki he maluʻi ʻa Sihová. Lolotonga ení, naʻe kei ʻi he Fale Fakatahaʻangá pē hoku husepānití ʻo fiu fāinga ke moʻui ʻa e kaá.
“Naʻá ku fakasiosio ki tuʻa ʻi he matapā sioʻatá peá u sio ki ha tangata ʻoku tokoto ʻi he halá ʻi tuʻa ʻi he matapā ʻo e ʻaá. Naʻe hangehangē kuo ʻosi ʻalu ʻa e kau kaihaʻá ia, ko ia naʻá ku fakaheka ʻa e tangata laveá ʻi heʻeku kaá ʻo leleakiʻi ki fale mahaki. Ko e meʻa mātuʻaki fakatuʻutāmaki ia, ka naʻe pau ke u fai ha meʻa. Neongo ia, ko e meʻa fakamamahí, naʻe mate ia ʻi he ʻaho hono hokó.
“Neongo ʻa e faingataʻa ko iá, naʻe mei kovi lahi ange ʻaupito ʻa e ngaahi meʻá ia. Ko e ʻaʻahi ʻa e ʻovasia fakafeituʻú naʻe ʻuhinga ia heʻikai fai ʻa e ako tohí ʻi homau falé. Ko e maumau ʻa e kaá naʻe ʻuhinga ia heʻikai te mau ʻalu meʻalele fakafāmili ki ʻapi. Ko hoku husepānití, ʻa ia naʻe mei pau pē hono puke fakamālohiʻi ia ʻe he kau kaihaʻá, naʻe toki aʻu tuʻapō mai ia ki ʻapi. Ko e ngaahi meʻá ni mo e ngaahi moʻoniʻi meʻa kehe naʻe kaunga lelei ia kiate kimautolu ʻi he pō ko iá.
“Ko Sihova homau maluʻangá mo homau hūfangaʻangá. ʻOku hangē pē ia ko e lau ʻa e konga Tohitapú: ‘Ka ʻikai leʻohi ʻe Sihova ʻa e koló, ʻoku ʻa tuʻungaʻa pe ʻa e tangata leʻó.’”—Sāme 127:1.