ʻIkai Tuʻunga Tataú—Naʻe Fakataumuʻa Ia ʻe he ʻOtuá?

Ko e talí ʻi ha foʻi lea pē ʻe taha ko e ʻikai. Tau sio angé ki hono ʻuhingá.

NAʻE fakataumuʻa ʻe he ʻOtuá ki he faʻahinga ʻo e tangatá kotoa ke nau maʻu ʻa e ngaahi faingamālie tatau ke maʻu ai ʻa e moʻuí mo e fiefiá. Fekauʻaki mo e fakatupu ʻo e tangatá, ʻoku tau lau: “Pea folofola ʻa e ʻOtua, Tau ngaohi tangata ʻi hotau imisi, ʻo faʻifaʻitaki ki hotau anga: pea ke nau pule ki he ika ʻo e tahi, mo e manupuna ʻo e ʻatā, mo e manu lalata, ʻio mo ʻuta kātoa; pea mo e faʻahinga totolo ʻoku totolo ʻi he funga fonua.” ʻI he kakato ʻa e fakatupu fakaemāmaní, “Naʻe ʻafio ʻa e ʻOtua ki he meʻa kotoa pe kuo ne ngaohi, pea tā kuo lelei ʻaupito.”​—Senesi 1:​26, 31.

ʻE lava ke fakahaaʻi ʻe he ʻOtuá ʻa e tuʻunga fakamamahi ʻo e ʻikai tuʻunga tatau he ʻaho ní “kuo lelei ʻaupito”? ʻIkai ʻaupito, “he ko e ʻOtua ko e ʻOfa.” (1 Sione 4:8) ʻOku pehē fekauʻaki mo ia ʻoku “ʻikai te ne humataniu” pea “ʻoku haohaoa ʻene ngaue; ko ʻene ngaahi founga kotoa ʻoku fakakonisitutone: ko e ʻOtua ʻo e Moʻoni, pea taʻehaʻane hala.” (Teutalonome 10:17; 32:4; fakafehoanaki mo Siope 34:19.) Pea naʻe fakaʻosiʻaki ʻe he ʻapositolo ko Pitá: “Ta ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.”​—Ngāue 10:​34, 35.

Koeʻuhi ko e ʻOtuá ʻoku ʻofa, taʻefilifilimānako, totonu, faitotonu, mo māʻoniʻoni, ʻe lava fēfē ke ne fakatupu ʻa e faʻahinga ʻo e tangatá mo e ʻikai tuʻunga tatau fakaenatula ʻi he fekauʻaki mo ʻenau totonu ke maʻu ʻa e fiefiá? Ke fakaʻatā ʻa e tomuʻa fehiʻá ʻi he lotolotonga ʻo e kakaí pea ke tuku kinautolu ʻi ha fokotuʻutuʻu ʻo e ʻikai tuʻunga tataú ʻe ʻi ha fepaki fakahangatonu ia mo hono ʻulungāngá. Naʻá ne fakataumuʻa kiate kinautolu kotoa ke “tauʻatāina ʻi honau fanauʻí mo tatau ʻi he ngeiá mo e ngaahi totonú.” Neongo ia, ʻi he ʻahó ni ʻoku hā mahino ʻoku ʻikai ʻi he founga ko iá ʻa e ngaahi meʻá. Ko e hā ʻoku ʻikai aí?

Ko e Tefito ʻo e ʻIkai Tuʻunga Tataú

Ko e fakatupu ko ia ʻe he ʻOtuá ʻa e faʻahinga ʻo e tangatá ke nau tataú ʻoku ʻikai ʻuhinga ia ai naʻá ne fakataumuʻa kiate kinautolu kotoa ke nau tatau ʻi he tafaʻaki kotoa pē. ʻE lava ke nau kehekehe ʻi he ngaahi talēnití, ngaahi mahuʻingaʻiá, mo e angaʻitangatá. ʻE lava ke nau toe kehekehe ʻi he tuʻungá pe ʻi he lahi ʻo e mafaí. Ko e fakatātaá, ʻoku ʻikai tatau ʻa e tangatá mo e fefiné ʻi he ngaahi tafaʻaki kotoa pē, ka naʻe fakatupu ʻe he ʻOtuá ʻa e fefiné “ko ha fakakakato” ʻo e tangatá. (Senesi 2:​18, NW) ʻOku hā mahino ʻoku kehekehe ʻa e ngaahi mātuʻá mo e fānaú ʻi he tuʻunga mafaí. Kae kehe, neongo ʻa e ngaahi kehekehé ni, ko e kotoa​—ʻo e kakai tangatá, kakai fefiné, mo e fānaú​—naʻe pau ke nau fiefia ʻi he totonu kuo foaki ʻe he ʻOtuá ko ha ngaahi faingamālie tatau ke fakafiemālieʻi ʻa e ngaahi fiemaʻu tefito ki he fiefiá. Naʻe pau ke nau fiefia kotoa ʻi he ngeia mo e tuʻu tatau ʻi he ʻao ʻo e ʻOtuá.

ʻI he tuʻunga meimei tatau, ko e ngaahi foha fakalaumālie ʻo e ʻOtuá, ʻa ia naʻe fakatupu ki muʻa ʻi he faʻahinga ʻo e tangatá, ne ʻoange kiate kinautolu ʻa e ngaahi vāhenga-ngāue mo e ngaahi fatongia kehekehe. (Senesi 3:​24; 16:​7-​11; Aisea 6:​6; Siutasi 9) Ka neongo ia, ʻi loto ʻi he ngaahi fakangatangata naʻe foaki ange kiate kinautolú, naʻe malava ke fiefia ʻa e tokotaha kotoa ʻi he ngaahi tokonaki fakaʻotua ki he moʻuí mo e fiefiá ʻi ha tuʻunga tatau. Naʻa nau tapua mai ai ʻa e taʻefilifilimānako ʻa e ʻOtuá ʻi ha founga fakaofo.

ʻOku fakamamahi ke leaʻakí, naʻe ʻikai fiemālie ʻa e meʻamoʻui laumālie ia ʻe taha ʻi he fokotuʻutuʻu taʻefilifilimānako ʻa e ʻOtuá. Naʻá ne fiemaʻu ʻa e meʻa lahi ange ʻi he meʻa ne foaki ange ʻe he ʻOtuá kiate iá, ʻo holi ki ha tuʻunga māʻolunga ange, mo lahi ange. ʻI hono ohi ʻa e holi fehālaaki ko ení, naʻá ne fokotuʻu ai ia ki ha fakafeʻauhi kia Sihova, ʻa ia ʻi hono tuʻunga ko e Tokotaha-Fakatupú ʻokú ne maʻu totonu ha tuʻunga ʻo e māʻolunga taupotu fakakātoa. Ko e foha fakalaumālie angatuʻu ko eni ʻo e ʻOtuá naʻá ne fakataueleʻi ki mui ʻa e faʻahinga ʻo e tangatá ke nau kounaʻi mei he ʻOtuá ʻa e meʻa lahi ange ia ʻi he meʻa naʻá Ne foaki ange kiate kinautolú. (Senesi 3:​1-6; fakafehoanaki mo Aisea 14:​12-​14.) Ko ia ai, ko e tokonaki ʻa Sihova ki he faʻahinga ʻo e tangatá ke nau maʻu ai ʻi he moʻuí mo e fiefiá naʻe hā kuo taʻemafamafatatau fakaʻulia ia. Ko e laumālie angatuʻu ko ení, ʻoku fakahaaʻi ʻi he Fakahā 20:2 ko e “Tevolo foki mo Setane,” naʻá ne hoko ko e tokotaha fakalanga ʻo e ʻikai tuʻunga tatau ʻa e tangatá.

ʻE Faifai pea Liliu ʻa e Ngaahi Meʻá?

Ko e talí ʻi ha foʻi lea pē ʻe taha ko e ʻio!

Ka ko hai ʻe lava ke ne fakahoko mai ʻa e ngaahi liliu ʻoku fakaʻamuá? Ko e kau taki fakaetangatá, ko e niʻihi ai ʻoku ʻikai ha veiveiua ko e kotoa ia ʻo ʻenau loto-moʻoní, kuo nau fāinga ʻi he laui senituli ke fai ia. Kuo fakangatangata ʻenau lavameʻá, ʻo taki atu ai ʻa e kakai tokolahi ke fakaʻosiʻaki ʻoku ʻikai moʻoni ke ʻamanekina ʻe solova ʻa e palopalema ʻo e ʻikai tuʻunga tatau ʻa e faʻahinga ʻo e tangatá. Kae kehe, ko e vakai ʻa e ʻOtuá, ʻoku hiki ʻi he Aisea 55:​10, 11: “Hange ʻoku hifo ʻa e ʻuha mo e sinou mei langi, ʻo ʻikai te ne foki ki ai, kaeʻoua ke ne fakaviviku ʻa e fonua, ʻo ngaohi ia ke fakatupu meʻa, mo laku muka mai; ʻo ʻoua foki ke ai ha tenga maʻa e tangata tūtūʻi, mo ha meʻakai maʻa e fiekaia; ʻe pehe pe mo ʻeku lea ʻoku ʻalu atu mei hoku ngutu: ʻe ʻikai foki ngeʻesi mai, kaeʻoua ke ne fai ʻa e meʻa ne u loto ki ai, mo fakaaʻu ʻa e meʻa ne u fekau atu ai ia.”

He fakafiemālie moʻoni ke ʻiloʻi kuo fakahaaʻi ʻe Sihova ko e ʻOtuá te ne fakahoko ʻene muʻaki taumuʻa ke tokonaki ki he kotoa ʻo e faʻahinga ʻo e tangatá ha ngaahi faingamālie tatau ki he moʻuí mo e fiefiá! ʻI he tuʻunga ko ha ʻOtua ʻo e moʻoní, kuó ne fakafatongiaʻi ia tonu ke fakahoko ʻa e meʻa kuó ne talaʻofá. ʻOku fakafiefiá, ʻokú ne maʻu fakatouʻosi ʻa e finangalo pea mo e mafai ke fai iá. ʻE anga-fēfē ʻene fakahoko ʻa e meʻá ni?

Ko e talí ʻoku ʻi he Puleʻanga ʻa ia naʻe akoʻi ʻe Sīsū Kalaisi ki he kotoa ʻo hono kau muimuí ke lotu: “Ko ʻemau Tamai ʻoku ʻi Hevani, . . . ke hoko hoʻo Pule [“puleʻanga,” NW], ke fai ho Finangalo, hange ko ia ʻi he langi ke pehe foki ʻi māmani.” (Mātiu 6:​9, 10) ʻIo, ko e Puleʻanga ʻo e ʻOtuá ko e founga ia ʻe ngāueʻaki ʻe Sihova ke “laiki mo fakaʻauha ʻa e ngaahi puleʻanga ko ia [ʻoku lolotonga ʻi aí], kae tuʻu pe ia ʻo taʻengata.”​—Taniela 2:​44.

ʻI he malumalu ʻo e Puleʻanga fakahēvaní, ʻe tupu hake ai ha sōsaieti foʻou ʻo e faʻahinga ʻo e tangatá. ʻI he fekauʻaki mo e meʻá ni, naʻe tohi ʻe he ʻapositolo ko Sioné ʻi he tohi fakaʻosi ʻo e Tohitapú, ʻa e Fakahaá: “Pea u vakai ha langi foʻou mo ha fonua foʻou: he ne mole ʻa e ʻuluaki langi mo e ʻuluaki fonua.” (Fakahā 21:1) ʻE mole atu ʻa e ngaahi tuʻunga palakū ʻo e ʻikai tuʻunga tataú​—ko e masivá, mahamahakí, taʻeʻiló, tomuʻa fehiʻá, mo e ngaahi faingataʻa kehe ʻa e faʻahinga ʻo e tangatá.a

Laka hake ʻi ha senituli, ʻa hono tataki ʻe he Kau Fakamoʻoni ʻa Sihová ʻa e tokanga ʻa e kakaí ki he Puleʻanga ko iá. (Mātiu 24:14) Fakafou ʻi he ngaahi peesi kuo pulusí pea ʻi he tokoni fakafoʻituituí, kuo nau ngāue mālohi ʻi hono tokoniʻi ʻa e kakaí ke maʻu ha ʻilo fekauʻaki mo e taumuʻa ʻa e ʻOtuá hangē ko ia ʻoku hiki ʻi he Tohitapú. Kae kehe, ko ʻenau ngāue fakaeako ʻi māmani lahí, kuo ʻikai ngata pē ʻi heʻene ʻoange ki he kakaí ʻa e ʻamanaki ʻo e moʻui ʻi he tuʻunga tatau mo e fiefia ʻi he kahaʻú ka kuó ne toe ʻomai ʻa e ngaahi ʻaonga ʻi he taimí ni ʻi hono taʻotaʻofi ʻa e faingataʻa ʻo e ʻikai tuʻunga tataú. Tau sio angé ki he foungá.

[Fakamatala ʻi lalo]

[Fakamatala ʻi he peesi 5]

Naʻe fakataumuʻa ʻe he ʻOtuá ke maʻu ʻe he faʻahinga ʻo e tangatá kotoa ʻa e ngaahi faingamālie tatau ki he moʻuí mo e fiefiá