Ko e Hā ʻOku Mātuʻaki Faingataʻa Ai ke Kole Fakamolemolé?
ʻI SIULAI 2000, naʻe fakapaasi ai ʻe he Kau Faʻu Lao Fakapuleʻanga ʻo Kalefōniá ʻi he ʻIunaite Seteté ha lao fakaangaanga naʻe faʻufaʻu ke fakaʻatā ʻaki ʻa e kakaí mei ha moʻua, kapau ʻoku nau fakahāhā ha kaungāongoʻi ki ha tokotaha naʻe lavea ʻi ha fakatuʻutāmaki ʻa ia naʻa nau kau tonu ki ai. Ko e hā ʻa e ʻuhinga ʻo e laó? Naʻe fakatokangaʻi ʻi he taimi ʻoku fakatupunga ai ʻe ha fakatuʻutāmaki ha lavea pe maumau, ʻoku faʻa toumoua ai ʻa e kakaí ke fai ha kole fakamolemole telia naʻa fakaʻuhingaʻi ia ʻi he fakamaauʻangá ko hano fakahaaʻi ʻo e halaia. ʻI he tafaʻaki ʻe tahá, ko e faʻahinga ko ia ʻoku nau ongoʻi ʻoku totonu ke fai vave ange kia kinautolu ha kole fakamolemolé ʻoku nau hoko nai ʻo loto-mamahi, pea iku nai ai ha kiʻi fakatuʻutāmaki siʻisiʻi ki ha vākovi lahi.
Ko e moʻoni, ʻoku ʻikai fiemaʻu ke fai ha kole fakamolemole ki ha fakatuʻutāmaki naʻe ʻikai ko hao foʻui. Pea ʻoku ʻi ai nai ʻa e ngaahi taimi ʻa ia ko e ʻalunga fakapotopotó ke tokanga ai fekauʻaki mo e meʻa ʻokú ke leaʻakí. ʻOku pehē ʻe ha palōveepi motuʻa: “Ka lahi ha lea ʻe ʻikai hala ha angahala: ka ko ia ʻoku fakamaʻumaʻu hono loungutu ko e poto ia.” (Palovepi 10:19; 27:12) Kae kehe, ʻe lava ke ke hoko ʻo anga-fakaʻapaʻapa mo tokoni.
Neongo ia, ʻikai ʻoku moʻoni kuo tuku ʻe he kakai tokolahi ʻa e kole fakamolemolé, ʻo aʻu ki he taimi ʻoku ʻikai fai ai ha ngaahi fakaʻiló? ʻOku tangilāulau nai ʻi ʻapi ha uaifi, ‘Ko hoku husepānití ʻoku ʻikai ʻaupito kole fakamolemole ia ʻi ha meʻa pē.’ ʻI he ngāueʻangá ʻe lāunga nai ai ʻe ha taki ngāue, ‘ʻOku ʻikai ke fakahaaʻi ʻe heʻeku kau ngāué ʻenau ngaahi fehālaakí, pea ʻoku tātātaha ke faifai angé pea nau lea kātaki.’ ʻI he ʻapiakó ʻe līpooti nai ai ʻe ha faiako, ‘ʻOku ʻikai akoʻi ʻa e fānaú ke nau lea kātaki.’
Ko e Hā ʻOku Mātuʻaki Faingataʻa Aí?
Ko e ʻuhinga ʻe taha ʻoku toumoua ai ha tokotaha ke kole fakamolemolé ko e manavahē nai ki hano talitekeʻi. ʻI he fakahohaʻasi ia ʻe he fakakaukau ki ha fakamomoko ange kiate iá, ʻe ʻikai nai te ne fakahaaʻi ʻa e anga moʻoni ʻo ʻene ongoʻí. Ko hono moʻoní, ko e tokotaha mamahí te ne fakaʻehiʻehi fakaʻaufuli nai mei he tokotaha naʻá ne fakaʻitaʻi iá, ʻo ʻai ai ke mātuʻaki faingataʻa ʻa e fakaleleí.
Ko e ʻikai ha tokanga ki he ongoʻi ʻa e kakai kehé ko e toe ʻuhinga nai ia ʻe taha ki he toumoua ʻa e niʻihi ke kole fakamolemolé. Te nau fakaʻuhinga nai, ‘ʻE ʻikai fakafoki ʻe he kole fakamolemolé ʻa e fehālaaki kuó u ʻosi faí.’ ʻOku toe ʻi ai ʻa e niʻihi kehe ia ʻoku nau toumoua ke lea kātaki koeʻuhi ko e ngaahi nunuʻa ʻe ala hokó. ʻOku nau fifili, ‘ʻE tukuakiʻi mai nai kiate au pea fiemaʻu mai ke u fai ha totongi huhuʻi?’ Kae kehe, ko e fakafaingataʻaʻiaʻanga lahi taha ki hono fakahaaʻi ha fehālaakí ko e loto-pōlepolé. Ko ha tokotaha ʻoku fuʻu loto-pōlepole ke ne pehē “kātakí” ko hono moʻoní, te ne fakaʻosiʻaki nai, ‘ʻOku ʻikai te u loto ke tuku hifo hoku ongoongó ʻaki hono fakahaaʻi ʻeku fehālaakí. ʻE fakavaivaiʻi ʻe he meʻa ko iá hoku tuʻungá.’
Ko e hā pē nai ʻa e ʻuhingá, ʻoku faingataʻa ki he tokolahi ke leaʻaki ʻa e ngaahi foʻi lea ʻo e kole fakamolemolé. Ka ʻoku fiemaʻu moʻoni ke kole fakamolemole? Ko e hā ʻa e ngaahi ʻaonga ʻo e kole fakamolemolé?
[Fakatātā ʻi he peesi 3]
“ʻOku ʻikai akoʻi ʻa e fānaú ke nau lea kātaki”
[Fakatātā ʻi he peesi 3]
“Ko hoku husepānití ʻoku ʻikai ʻaupito kole fakamolemole ia”
[Fakatātā ʻi he peesi 3]
“ʻOku ʻikai ke fakahaaʻi ʻe heʻeku kau ngāué ʻenau ngaahi fehālaakí”