‘ʻE ʻOtua, ko e Hā Naʻá Ke Fakaʻatā Ai Ení?’

ʻOKU kei manatuʻi pē ʻe Līkato ʻa ʻene tangutu mo hono uaifí, ko Malia, ʻi he loki talitali ʻo e toketaá.a Naʻe ʻikai ha taha ʻia kinaua ʻe loto-lahi ke ne lau ʻa e ola ʻo e ngaahi sivi fakafaitoʻo fakamuimui taha ʻo Maliá. Naʻe faifai pē pea fakaava ʻe Līkato ʻa e silá, pea naʻá na hila fakavave ki he ngaahi lea fakafaitoʻo ʻo e līpōtí. Naʻá na fakatokangaʻi ai ʻa e foʻi lea “kanisā,” pea naʻe kamata ke na tangi fakatouʻosi ʻi heʻena ʻiloʻi ʻa e ʻuhinga kakato ʻo e foʻi lea ko iá.

“Naʻe anga-lelei ʻaupito ʻa e toketaá,” ko e manatu ia ʻa Līkató, “ka naʻá ne ʻiloʻi lelei ʻa e mafatukituki ʻo e tuʻungá koeʻuhí he naʻá ne hokohoko tala mai kia kimaua kuo pau ke ma falala ki he ʻOtuá.”

Ki muʻa ke kamata ʻa e faitoʻo fakaehueló, naʻe fakatokangaʻi ʻe he toketā ʻa Maliá ʻa e ʻikai lava ke ne mapuleʻi ʻa e ngaue ʻa hono vaʻe toʻomataʻú. Naʻe fakaeʻa ʻi ha ngaahi sivi lahi ange kuo mafola ʻa e kanisaá ki hono ʻutó. Hili ha uike pē ʻe taha ʻo e faitoʻó, naʻe taʻofi fakataimi ʻa e faitoʻo fakaehueló. Naʻe longo ai ʻa Malia pea mate ʻi ha māhina ʻe ua ki mui ai. “Naʻá ku fiefia ʻi he ngata ʻene faingataʻaʻiá,” ko e fakamatala ia ʻa Līkató, “ka ʻoku ou ongoʻi ʻaupito ʻene pulí ʻou fakaʻamu ai ke toe ngata foki mo ʻeku moʻuí. Naʻá ku faʻa tangi ki he ʻOtuá: ‘Ko e hā naʻá ke fakaʻatā ai eni ke hokó’”

ʻI he Hoko ʻa e Mamahí, ʻOku Malanga Hake Ai ʻa e Ngaahi Fehuʻi Lahi

ʻI he hangē ko Līkató, ʻoku fakamālohiʻi ʻa e kakai taʻefaʻalaua ʻi he māmaní kotoa ke nau fehangahangai mo e tuʻunga moʻoni ʻo e faingataʻá. ʻI he taimi lahi, ko e tonuhiá ia ʻoku faingataʻaʻiá. Fakakaukau atu ki he mamahi lahi fakaʻulia ʻoku fakatupunga ʻe he ngaahi fepaki fakakautau hokohoko ʻokú ne fakamafasiaʻi ʻa e faʻahinga ʻo e tangatá. Pe fakakaukau angé ki he mamahi naʻe ongoʻi ʻe he kau maʻukovia tokolahi ʻo e tohotohó, pāʻusiʻi ʻa e fānaú, fakamālohi ʻi he fāmilí, mo e ngaahi kovi kehe naʻe fai ʻe he tangatá. ʻI he kotoa ʻo e hisitōliá ʻoku hā ngali ʻikai ha ngataʻanga ki he fakamaau taʻetotonu mo e fakamamahi kuo loto-lelei ʻa e kakai tangatá mo e kakai fefiné ke fefaiʻaki ʻia kinautolú. (Koheleti 4:​1-3) ʻOku ʻi ai foki ʻa e mamahi ʻa e faʻahinga ʻoku maʻukovia ʻi he ngaahi fakatamaki fakanatulá pe ko e puke fakaeongo, fakaʻatamai mo fakaesinó. ʻOku siʻi ʻa e ofo ʻi he ʻeke ʻe he tokolahi, “Ko e hā ʻoku fakaʻatā ai ʻe he ʻOtuá ʻa e faingataʻa peheé?”

Naʻa mo e faʻahinga ʻoku ʻi ai ʻenau ngaahi tuipau fakalotú, ʻoku ʻikai ʻaupito faingofua ke fekuki mo e mamahí. Ko koe foki te ke fifili nai ki he ʻuhinga ʻoku ala maʻu ʻe ha ʻOtua ʻofa, mo mālohi fakaʻaufuli ki hono fakaʻatā ke faingataʻaʻia ʻa e tangatá. Ko hono maʻu ha tali fakafiemālie mo moʻoni ki he fehuʻi fakatupu puputuʻu ko ení ʻoku mātuʻaki mahuʻinga ia ki he nonga ʻo ʻetau fakakaukaú pea mo hotau vahaʻangatae mo e ʻOtuá. ʻOku tokonaki mai ʻe he Tohitapú ha tali ki he meʻa ko iá. Kātaki ʻo vakai ki he meʻa ʻoku leaʻaki aí ʻi hono ʻomai ʻi he kupu hoko maí.

[Fakamatala ʻi lalo]

[Fakatātā ʻi he peesi 3]

Naʻe toutou tala mai ʻe he toketaá kia kimaua kuo pau ke ma falala ki he ʻOtuá