Puleʻanga ʻo e ʻOtuá, Ko e Hā Ia?
HE FAKATAMAKI fakamamahi moʻoni ē naʻá ne taaʻi ʻa e tangatá ʻi he hisitōlia ʻo e faʻahinga ʻo e tangatá! Naʻe angatuʻu ha ʻāngelo ki he tuʻunga mafai ʻo e Tokotaha tonu pē ko ia naʻá ne fakatupu iá. Ko e angatuʻu ko ʻení, naʻá ne fakaʻaiʻai ʻa e ʻuluaki fefiné, ʻa ʻIvi, ke ne kai ʻa e fuaʻiʻakau naʻe tapuí. ʻI he lave kiate ia mo hono husepānití, ʻa ʻĀtama, naʻe pehē ʻe he ʻāngeló: “ʻE ʻikai ʻaupito te mo mate: kae kehe, ʻoku meaʻi ʻe he ʻOtua ko e ʻaho te mo kai ai ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.” (Senesi 2:16, 17; 3:1-5) Naʻe hoko ʻa e ʻāngelo angatuʻú ʻo ui ko e Tēvoló, pea toe ui ko Sētane.—Fakahā 12:9.
Naʻe tokanga nai ʻa ʻIvi ki he meʻa naʻe leaʻaki ʻe Sētané? ʻOku tala mai ʻe he Tohi Tapú: “Naʻe vakai ʻe he fefine ko e ʻakau ia ʻoku lelei ki he kai, pea matamatalelei ki he mata, kaeʻumaʻa ko e ʻakau ke fai ki ai ha velevele ko ʻene fakapotoʻi, pea ne hanga ʻo toli hono fua, ʻo kai, pea ne ʻange foki ki hono husepaniti naʻe ʻiate ia; pea kai mo ia.” (Senesi 3:6) ʻIo, ko e ʻuluaki ongo mātuʻá, ʻa ʻĀtama mo ʻIvi, naʻá na kau fakataha mo Sētane ʻi heʻene angatuʻú. Ko hono ikuʻangá, naʻe mole ai meiate kinaua mo hona hakó ʻa e Palataisí. Ko e fānau ko ia naʻe mei fanauʻi haohaoa fakataha mo e ʻamanaki ʻo e moʻui taʻengatá te nau maʻu tukufakaholo ʻe kinautolu ʻa e angahalá mo e maté.—Loma 5:12.
Naʻe anga-fēfē ʻa e tali ki ai ʻa e Pule Fakaleveleva ʻo e ʻunivēsí, ʻa Sihova ko e ʻOtuá? Naʻá ne fakataumuʻa ke ʻomai ha tokonaki ke fakamolemoleʻi ai ʻa e angahalá. (Loma 5:8) Kuo toe fokotuʻu foki ʻe Sihova ko e ʻOtuá ha fokotuʻutuʻu fakapuleʻanga ke fakaleleiʻiʻaki ʻa e tuʻunga faingataʻa kuo hokó. Ko e fokotuʻutuʻu ko ʻení ʻoku ui ia ko e “Puleʻanga ʻo e ʻOtua.” (Luke 21:31) ʻI hono fokotuʻu ko ha konga ia ʻo e tuʻunga-pule fakaleveleva ʻo e ʻOtuá, ko e Puleʻanga ko ʻení ʻoku ʻi ai ʻene taumuʻa tefito.
Ko e hā e taumuʻa ʻa e Puleʻanga ʻo e ʻOtuá? Ko e hā ʻa e niʻihi ʻo hono ngaahi tafaʻakí, pea ʻoku anga-fēfē hono tuʻungá ʻi hono fakahoa atu ki he tuʻunga-pule fakaetangatá? Ko fē ʻa e taimi naʻe pau ke kamata pule ai ʻa e Puleʻangá? Ko e ngaahi fehuʻi ko ʻení ʻe lāulea ki ai ʻi he kupu hoko maí.