Ngaahi Fehuʻi mei he Kau Lautohí
Naʻe hala nai ʻa e fakangalingali ʻa Sēkope ko ʻĪsoa iá, hangē ko ia ʻoku lēkooti ʻi he Senesi 27:18, 19?
Mahalo pē ʻokú ke maheni mo e talanoa ko ʻení. Ko ʻAisake ʻi hono taʻumotuʻá naʻá ne tala kia ʻĪsoa ke kumi ange haʻane kiki, ʻo ne pehē: “ʻOmi kiate au ke u kai: heʻilo ʻe lava ai ʻa hoku loto ke fai ho tapuakiʻi ʻi he teʻeki ke u mate.” ʻI he fanongo ki he meʻa naʻe leaʻaki ʻe hono husepānití, naʻe ngaohi ʻe Lepeka ha meʻatokoni ifo pea fakahinohinoʻi ʻa Sēkope: “ʻAve ʻe koe [ʻa e meʻakaí] ki hoʻo ʻeiki ke ne tokoni; heʻilo te ne tapuakiʻi koe ʻi he teʻeki ke ne pekia.” Ko ia ai, ʻi hono tui ʻe Sēkope ʻa e ngaahi kofu ʻo ʻĪsoá pea tui mo e kili ʻo e ongo kiʻi kosí ʻi hono kiá mo e ongo nimá, naʻá ne ʻalu atu ki heʻene tamaí mo e meʻatokoni ifó. ʻI he taimi naʻe ʻeke ange ai ʻe ʻAisake “Ko hai koe, siana?” Naʻe tali atu ʻe Sēkope: “Ko Isoa au, ko ho ʻuluaki.” Naʻe tui ʻa ʻAisake kiate ia peá ne foaki ʻa e tāpuakí kiate ia.—Senesi 27:1-29.
ʻOku ʻikai ke ʻomai ʻe he Tohi Tapú ia ʻa e kotoa ʻo e fakaikiiki ki he ʻuhinga naʻe fai pehē ai ʻa Lepeka mo Sēkopé, ka ʻoku ʻiloʻi mei ai naʻe fakafokifā ʻa e hoko ʻa e meʻá. ʻOku totonu ke tau fakatokangaʻi ʻoku ʻikai ke fakatonuhiaʻi pe fakahalaki ʻe he Folofola ʻa e ʻOtuá ʻa e meʻa naʻe fai ʻe Lepeka mo Sēkopé, pea ʻoku ʻikai ke fokotuʻu mai ai ha sīpinga ʻo e loí mo e kākaá. Kae kehe, ʻoku fakamaama mai ʻe he Tohi Tapú ʻa e tuʻungá ni.
ʻUluakí, ʻoku tala mahino mai ʻe he fakamatalá naʻe maʻu ʻe Sēkope ʻa e totonu ki he tāpuaki ʻa ʻene tamaí; naʻe ʻikai maʻu ia ʻe ʻĪsoa. Ki muʻa ange ai, naʻe fakatau fakalao ʻe Sēkope ʻa e totonu ki he foha lahí mei hono māhanga taʻehoungaʻiá, ʻa ia naʻá ne fakatau ia ʻaki ha houa kai ke fakatōliʻaʻaki ʻene fiekaiá. Naʻe “jiaki e Isoa ae inaji oe uluaki foha.” (Senesi 25:29-34, PM) Ko ia ʻi he fakaofiofi ki heʻene tamaí, naʻe kumi ai ʻa Sēkope ki ha tāpuaki ʻa ia ko e meʻa totonu pē ia ʻaʻana.
Uá, ʻi hono ʻiloʻi ʻe ʻAisake kuó ne foaki ʻa e tāpuakí kia Sēkopé, naʻe ʻikai te ne feinga ke toe liliu ʻa e meʻa kuó ne faí. Mahalo pē naʻá ne manatuʻi ʻa e meʻa naʻe folofolaʻaki ʻe Sihova kia Lepeka ki muʻa ke fanauʻi ʻa e ongo māhangá: “Ko taʻokete te ne tauhi ʻa tehina.” (Senesi 25:23) ʻOku taau foki ke fakatokangaʻi ʻi he taimi naʻe teu mavahe ai ʻa Sēkope ki Hālaní, naʻe fakalahi ai ʻe ʻAisake ʻa e tāpuaki naʻá ne foaki ki muʻá.—Senesi 28:1-4.
Ko e fakaʻosí, ʻoku totonu ke manatuʻi naʻe fakatou ʻafioʻi mo mahuʻingaʻia ʻa Sihova ʻi he meʻa kotoa naʻe hokó. Ko e tāpuaki naʻe foaki ʻe ʻAisaké naʻe fekauʻaki ia mo e talaʻofa ʻa e ʻOtuá kia ʻĒpalahamé. (Senesi 12:2, 3) Kapau naʻe ʻikai finangalo ʻa e ʻOtuá ke ʻave ʻa e tāpuakí kia Sēkope, naʻá ne mei fai ha meʻa ki ai. ʻI hono kehé, naʻe fakapapauʻi ʻe Sihova ʻa e tuʻungá kia Sēkope, ʻi heʻene folofola ʻo pehē: “ʻE monuʻia ʻiate koe ʻa e faʻahinga kotoa pe ʻo e kelekele, pea ʻi ho hako foki.”—Senesi 28:10-15.