Ngaahi Fehuʻi mei he Kau Lautohí
ʻOku totonu ki ha taha ʻo e Kau Fakamoʻoni ʻa Sihová ke ʻalu ki ha mali ʻa ha kāinga pe ko ha maheni ʻoku ʻikai ko ha Fakamoʻoni?
Ko e malí ko e ngaahi taimi fiefia, pea ko e meʻa mahino pē ia ʻa e saiʻia ʻa ha Kalisitiane ke ne kau ʻi he fiefia ko iá. Ko hono moʻoní, ko e fānau ko ia ʻoku fakaafeʻi ke ʻalu ki aí ʻoku totonu ke nau talangofua ki heʻenau ongo mātuʻá pe tauhí, ʻa ē ʻoku nau maʻu ʻa e totonu ke fai ʻa e fili aofangatukú. (Efeso 6:1-3) Kae fēfē kapau ko ha tangata ʻoku ʻikai ko ha taha ʻo e Kau Fakamoʻoni ʻa Sihová ʻokú ne kole ki hono uaifi Kalisitiané ke na ō ki ha mali ʻi ha fale lotu? ʻE fakaʻatā nai ia ʻe hono konisēnisí ke ʻalu ʻi he tuʻunga ko ha tokotaha mamata pē ʻo ne fakapapauʻi ke ʻoua naʻa kau ʻi ha ngaahi tōʻonga fakalotu ʻe taha ʻoku fekauʻaki mo e meʻa ko iá.
Ko hono tefitó, ko ha fili fakafoʻituitui pē ia pe te te ʻalu ki ha mali ʻoku fai pe ʻikai. Kae kehe, ʻoku totonu ki he Kalisitiane taki taha ke ne manatuʻi ʻa e pau ke ne fai ha fakamatala kia Sihová pea ʻoku totonu ke ne fakakaukau atu ki ha ngaahi tefitoʻi moʻoni Fakatohitapu ʻi he taimi ʻokú ne fai ai ha fili fekauʻaki mo e ʻalu ki he mali ʻa ha tokotaha ʻoku ʻikai ko ha Fakamoʻoní.
ʻOku totonu ko e meʻa mahuʻinga taha ʻi he fakakaukau ʻa ha Kalisitiane ko ha holi ke maʻu ʻa e hōifua ʻa e ʻOtuá. Naʻe pehē ʻe Sīsū: “Ko e ʻOtua ko e laumālie: pea ko kinautolu ʻe hū kiate ia, kuo pau ke nau fai ʻi laumālie pea fai ʻi moʻoni ʻenau hu.” (Sione 4:24) Ko ia, ʻoku ʻikai ke kau ʻa e Kau Fakamoʻoni ʻa Sihová ʻi he ngaahi meʻa fakalotu ʻa e ngaahi lotu kehé, hangē ko e lotú, ngaahi ouaú, pe ngaahi kātoanga ʻoku fepaki mo e moʻoni ʻo e Tohi Tapú.—2 Kolinito 6:14-17.
ʻOku ʻiloʻi ʻe ha Kalisitiane ʻoku malava ke toe uesia heʻene fili ʻoku faí ʻa e niʻihi kehé. Kapau ʻokú ke fili ke ke ʻalu, ʻe loto-mamahi ho kāingá kapau ʻoku ʻikai te ke kau kakato ʻi he ngaahi meʻa ʻoku fai ʻi he malí? ʻOku toe fiemaʻu ke fakakaukau ki he uesia ʻe lava ke hoko ki he kaungātuí. (Loma 14:13) Neongo kapau ʻe fakaʻosiʻaki ʻe koe pe ko ha ngaahi mēmipa kehe ʻi ho fāmilí ʻo pehē ko e ʻalu ki ha mali ʻa ha tokotaha ʻikai ko ha Fakamoʻoní ʻe ʻikai ke hoko ai ha palopalema ia, ʻe lava ke uesia kovi ai ho fanga tokoua mo e fanga tuofāfine Kalisitiané? ʻE lava ke lavea ai ʻa e konisēnisi ʻo ha niʻihi?
Ko e ngaahi kātoanga mali ʻa e ngaahi kāinga ʻikai ko ha Fakamoʻoní ʻoku malava ke ne fakahoko mai ha ngaahi tuʻunga faingataʻa. Fēfē kapau ʻoku kole atu ke ke hoko ko ha taha ʻo e kau toʻo kofú pe kau tangata fakafeʻaó? Pe fēfē kapau ko ho hoá ʻoku ʻikai ko ha Fakamoʻoni pea ʻokú ne fiemaʻu ke mo kau kakato ki he ngaahi ouau ʻo e malí? Kapau ko e malí ko ha ouau fakapuleʻanga pē ʻoku fai ʻe ha fakamaau pe ko ha ʻōfisa fakapuleʻanga, ko e meʻa pē ʻoku kau nai ia ʻi heʻete ʻi aí ko e fakamoʻoni ʻi ha meʻa fakalaó.
Kae kehe, ko ha kātoanga mali ʻoku fai ʻi ha fale lotu pe fakahoko ʻe ha faifekau ʻoku malanga hake ai ha toe ngaahi meʻa ke fai ha tokanga ki ai. Ke ke malava ke muimui ʻi he konisēnisi kuo akoʻi ʻi he Tohi Tapú pea fakaʻehiʻehi mei hano fakangaloku hoʻo ngaahi tuipau fakalotú pe ko hono fai ha meʻa ʻe fakamā nai ia ki he ongo meʻa malí, te ke fili nai ke ke fakaʻehiʻehi mei he ʻalu ki aí. (Palovepi 22:3) ʻE lava ke ke kalofaki ho fāmilí mo koe tonu mei he mafasia lahi ʻaki hono fakamatalaʻi tokamuʻa ʻa hoʻo ngaahi tuipau makatuʻunga ʻi he Tohi Tapú, ʻo fakahaaʻi ʻa hono lahi ʻo e tuʻunga te ke loto-lelei ai ke kau ki he malí pe ko hano fokotuʻu atu ha founga kehe te ke fakahoko.
ʻI he hili ʻa hono fakakaukauʻi fakalelei ʻa e ngaahi meʻá kotoa, ʻoku fili nai ai ʻa e kau Kalisitiane ʻe niʻihi ʻo pehē ʻe ʻikai ke hala ia ke ʻalu ki ha mali ʻa ha taha ʻoku ʻikai ko ha Fakamoʻoni ʻi he tuʻunga heʻikai ke kau ia ʻi ha meʻa fakalotu ʻe taha. Ka ʻo kapau ʻoku fakaʻuhinga ha Kalisitiane ia ʻo pehē ko e ʻalu ki aí ʻe ala fakataueleʻi ai ia ke ne fakangaloku ʻa e ngaahi tefitoʻi moʻoni fakaʻotuá, te ne fakaʻosiʻaki nai ʻoku lahi ange ʻa e maumau ʻe ala hokó ia ʻi he ngaahi ʻaonga ʻe maʻu aí. Kapau ʻokú ne fili ke ʻoua ʻe ʻalu ki he malí, kae toki ʻalu pē ki he ngaahi meʻa ʻoku fai ʻi he hili iá ʻi he tuʻunga ko ha tokotaha pē ʻoku fakaafeʻi, ʻoku totonu ke ne fakapapauʻi ke “fai ʻa e meʻa kotoa pe ke ongoongolelei ai ʻa e ʻOtua.” (1 Kolinito 10:31) ʻI hono fai ʻa e ngaahi fili ko iá, “kuo pau ke taki taha fua ʻene kavenga aʻana.” (Kaletia 6:5) Ko ia ai, ko e hā pē te ke fili ki aí, manatuʻi ʻoku mātuʻaki mahuʻinga ke kei tauhi maʻu ha konisēnisi lelei ʻi he ʻao ʻo Sihova ko e ʻOtuá.