ʻOkú Ke Manatuʻi?
Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
• Ko e hā ʻe lava ke ako ʻe he ngaahi tamaí mei he ngaahi folofola ʻa Sihova ko e ʻOtuá kia Sīsū ʻi he hili siʻi pē ʻa ʻene papitaisó?
ʻOku ʻi ai ʻa e meʻa ʻe tolu ʻe lava ke ako ʻe he ngaahi tamaí mei he ngaahi folofola ʻa Sihova ko e ʻOtuá. ʻUluakí, ʻaki ʻa e lāuʻilo kia Sīsū ko hono ʻAló ʻa ia naʻe ʻoatu ʻe Sihova ʻa e fakamālōʻia mo e tokanga. ʻE fakafiemālieʻi ʻa e fānaú ʻi he taimi ʻoku vakai ai kia kinautolu ko e ngaahi mēmipa makehe ʻo e fāmilí ʻaki ʻa e ngaahi fakaongoongolelei loto-moʻoni. Uá, naʻe fakamatalaʻi fakahāhā ʻe Sihova ʻa ʻene ʻofa ki hono ʻAló. Ko hono fakahaaʻi moʻoni ʻa e ʻofá ʻi he leá mo e ngāué ʻe tokoniʻi ai ʻa e fānaú ke lakalakaimonū. Tolú, naʻe fakahaaʻi ʻe Sihova ʻa ʻene hōifua kakato ki hono ʻAló. Ko ha tamai ʻofa ʻoku kumi ia ki ha ngaahi faingamālie ke ʻai ke ʻiloʻi ʻe heʻene fānaú ʻokú ne fiefia ʻi he ngaahi meʻa lelei ʻoku nau leaʻaki pe faí. ʻOku maʻu ʻe he fānaú ʻa e mālohi mo e loto-toʻa ʻi he fiefia ʻenau mātuʻá ʻia kinautolú.—1/1, peesi 25.
• Naʻe ʻaʻahi fakakū ʻa e kau vavalo ki he ngaahi fetuʻú kia Sīsuú?
ʻOku fakamatala ʻe ha pulusinga Tohi Tapu: “Naʻe ʻikai ke ʻaʻahi ʻa e kau Makí [kau vavalo ki he ngaahi fetuʻú] kia Sīsū lolotonga ʻene kei ʻi he ʻaiʻanga kai ʻo e manú ʻi he pō pē ko ia naʻe ʻaloʻi aí ʻo hangē ko ia naʻe fai ʻe he kau tauhi-sipí. Naʻa nau toki haʻu hili ha ngaahi māhina mei ai.” ʻI he taimi ko iá kuo “tamasiʻi” ʻa Sīsū ʻa ia naʻe nofo ʻi ha fale. (Mt. 2:7-11) Kapau ne ʻosi foaki kia Sīsū ʻa e koulá pea mo e ngaahi meʻaʻofa mahuʻingá ʻi he pō ʻo hono ʻaloʻí, meʻa ní ʻe ʻalu nai ʻa Mele mo ha foʻi lupe pē ʻe 2 ki he temipalé ʻi he ʻaho ʻe 40 ki mui aí?—1/1, peesi 31.
• Ko e hā ʻe lava ʻo fai ʻe he tokolahi ke fakakoloa ʻaki ʻenau moʻuí?
ʻE ʻeke nai ʻe ha taha, ‘ʻE lava ke feʻunuʻaki hoku ngaahi tuʻungá pea fakafaingofuaʻi mo ʻeku founga moʻuí?’ Naʻe fai pehē ʻa Amy. Naʻá ne maʻu ʻa e meʻa kotoa ka naʻe ʻikai pē ke ne maʻu ʻa e fiefiá. Naʻá ne fakatokangaʻi ko e tulitāupau ki he ngāue ʻi he māmani ko ení naʻá ne mei hē ai mei he tuí. Ko ia ai, naʻá ne fakakaukau leva ke fakamuʻomuʻa ʻa e ngāue ʻo e Puleʻangá pea naʻe lava ai ke tāimuʻa ʻi ha taimi. ʻOku pehē ʻe Amy, “Ko ʻeku toki ongoʻi fiemālie moʻoní eni ʻa ia naʻe ʻikai ʻaupito ke u hokosia” ʻi he taimi ko ia naʻá ku kei tuli ai ki he ngaahi taumuʻa fakamāmaní.—1/15, peesi 19.
• Ko e “toʻutangata” fē naʻe lave ki ai ʻa Sīsū ʻi heʻene lea ko ia ʻoku hiki ʻia Mātiu 24:34?
Naʻe faʻa ngāueʻaki ʻe Sīsū ʻa e foʻi lea “toʻutangata” ʻi ha tuʻunga ʻikai lelei ʻi he taimi naʻá ne lea ai pe talanoa fekauʻaki mo e kakai fulikivanú. Ka naʻe ʻikai ke fai pehē ia ʻi he meʻá ni ʻi heʻene lea ko ia ki heʻene kau ākongá, ʻa ia naʻe ofi ke pani kinautolu ʻaki ʻa e laumālie māʻoniʻoní. Ko kinautolu ia ʻa e faʻahinga kuo nau lava lelei ʻo tala ʻa e ofi ko ia ʻa e ngataʻangá ʻa ia ʻoku lave ki ai ʻi he Mātiu 24:32, 33. ʻOku tau sio leva mei heni tā naʻe ʻuhinga pē ʻa Sīsū ia ki hono kau muimui paní, fakatouʻosi ʻa e faʻahinga ʻi he ʻuluaki senitulí pea mo hono ʻuhinga ʻi onopooni ʻo ʻene leá.—2/15, peesi 23-4.
• Fekauʻaki mo e Semisi 3:17, ko e hā ʻa e ngaahi ʻulungāanga ʻoku totonu ke tau fakahāhaá?
Ke hoko ʻo anga-maʻa, ʻoku fiemaʻu ke tau talitekeʻi leva ʻa e ngaahi meʻa koví ʻi he taimí ni. (Sen. 39:7-9) ʻOku totonu ke tau nofo melino, ʻo ʻoua ʻe fakangofua ʻa e tōʻonga fakafetaú pē ngaahi tōʻonga te ne veuki ʻa e melinó. Ko ia ʻoku lelei ke tau ʻeke hifo kiate kitautolu: ‘ʻOku ʻiloa au ko ha tokotaha fakamelino pe ko ha tokotaha fakatupu kē? ʻOku ou faʻa fetōkehekeheʻaki mo e niʻihi kehé? ʻOku ou ʻitangofua, pe ʻoku ou faʻa fakatupu ʻita ki he niʻihi kehé? Pe ʻoku ou tokateu ki he fakamolemolé pea ʻikai vave ke tuʻukāivi pē ke fai haʻakú fiemaʻu?’—3/15, peesi 24-5.