Tokoniʻi ʻa e Kau Kuí ke Ako Fekauʻaki mo Sihova
1. Naʻe anga-fēfē hono fakahāhā ʻe Sīsū ʻa e manavaʻofá ki he ongo tangata kuí?
1 Naʻe toesiʻi pē ʻa e ngaahi ʻaho pea pekia ʻa Sīsū. ʻI heʻene mavahe mei he kolo ko Sielikoó, naʻe kalanga atu kiate ia ha ongo tangata kui kolekole: “ʻEiki, ʻaloʻofa mai kiate kimaua!” Neongo naʻe fakakaukau ʻa Sīsū ki he ngaahi ʻahiʻahi faingataʻa naʻe tuʻunuku maí, naʻe tuʻu ʻa Sīsū ʻo ui atu ʻa e ongo tangatá pea fakamoʻui kinaua. (Māt. 20:29-34) ʻE lava fēfē ke tau faʻifaʻitaki ki he manavaʻofa ʻa Sīsū ki he ongo tangata kuí?
2. ʻE lava fēfē nai ke tau faifakamoʻoni ki ha tokotaha kui ʻoku tau fetaulaki ʻi ha feituʻu kakai?
2 Fai ha Tokoni: Kapau te ke fetaulaki mo ha tokotaha kui, mahalo ʻi ha feituʻu kakai, fakafeʻiloaki ange koe pea fai ha tokoni. Koeʻuhi ʻoku faʻa ngaohikoviʻi ʻa e faʻahinga ko ení, ʻe ʻuluaki huʻuhuʻu nai ʻa e tokotahá. Kae kehe, ko hoʻo anga-fakakaumeʻa moʻoni mo mahuʻingaʻia loto-moʻoní ʻe ʻai nai ia ke ne ongoʻi fiemālie. Manatuʻi foki, ʻoku kehekehe ʻa e tuʻunga ʻoku ʻi ai ʻa e kau kuí pea ʻe fakapapauʻi mei heni ʻa e lahi ʻo e tokoni ke fakahokó. Hili hoʻo fakahoko ʻa e tokoní, mahalo ʻe lava ke ke fakahaaʻi ange ʻokú ke kau ʻi ha ngāue fakaeako Tohi Tapu. Lau ange kiate ia ha veesi Tohi Tapu, hangē ko e Saame 146:8 pe ʻAisea 35:5, 6. ʻE lava ke ke toe tokoniʻi ia ke maʻu ha hiki-leʻo mei he jw.org.—Sio ki he puha “ʻI he Tokoni ki ha Tokotaha Kui . . .”
3. ʻE lava fēfē ke tau kumi ki he kau kui ʻi hotau feituʻu ngāué?
3 Kumi ki he Kau Kuí: ʻOku tātātaha ke tau fetaulaki mo ha kakai kui ʻi he ngāue fakafaifekau fale-ki-he-falé koeʻuhí ko e tokolahi ʻo kinautolu ʻoku ʻikai ke nau ongoʻi fiemālie ke talanoa ki ha taha foʻou ʻoku haʻu ki honau ʻapí. Ko ia ai, ʻoku fiemaʻu ʻa e feinga lahi ke “kumi” ki he faʻahinga ko iá ke faifakamoʻoni kia kinautolu. (Māt. 10:11) ʻOku ʻi ai hao kaungāngāue pe kaungāako ʻoku kui? Tamuʻomuʻa ke talanoa kiate ia. Kapau ʻoku ʻi ai ha ʻapiako ki he kau kuí ʻi ho feituʻu ngāué, ʻave ha niʻihi ʻo ʻetau ngaahi hiki-leʻó ki he laipeli ʻa e akó. ʻOkú ke ʻiloʻi ha taha ʻoku ʻi ai hano fāmili ʻoku kui? ʻOku ʻi ai ha kautaha ʻi ho feituʻu ngāué ʻoku nau fai ha tokoni ki he kau kuí pe ʻoange ha nofoʻanga ki he kuí? Fakamatalaʻi ki he mēmipa ʻo e fāmilí, tokotaha tali telefoní pe talēkitá ʻoku mahuʻingaʻia ʻaupito ʻa e Kau Fakamoʻoni ʻa Sihová ke tokoniʻi ʻa e kau kuí pea ʻomai ha ngaahi hiki-leʻo. Fakahaaʻi ange kiate ia ʻa e talaʻofa ʻa e Tohi Tapú ʻoku vavé ni ke toʻo ʻosi atu ʻe he ʻOtuá ʻa e kuí. ʻI hono fakamatalaʻi ʻa e taumuʻa hoʻo ʻaʻahí, ʻe maʻu heni ha faingamālie ke fetuʻutaki mo e faʻahinga kuí.
4. Ko e hā ʻa e lēsoni ʻoku tau ako mei he hokosia ʻa Janet?
4 Naʻe ʻaʻahi ha tuofefine kui ko Janet ki ha nofoʻanga naʻe ʻi ai ha kau kui. Naʻá ne fetalanoaʻaki mo ha kiʻi fefine. Naʻe tala ange ʻe Janet, “Naʻe fakamoʻui ʻe Sīsū ʻa e kakai kuí ke fakahaaʻi ai ʻa e meʻa te ne fai ki he faʻahinga kotoa ʻoku kuí.” Naʻá na lāulea ki he Fakahā 21:3, 4 pea fakamatalaʻi ʻe Janet ʻa e founga ʻe fakahoko ai ʻa e talaʻofa ko ení ʻe he Puleʻanga ʻo e ʻOtuá. Naʻe fakalongolongo pē ʻa e fefiné peá ne pehē: “Naʻe teʻeki ai tala mai ʻe ha tokotaha kui ha meʻa peheni. Ko e tokolahi taha ʻo e kakai ʻoku nau sió ʻoku nau tui ko e kui ʻa e kakaí koeʻuhí ko ha meʻa naʻa nau fai pe fai ʻe heʻenau fanga kuí.” Naʻe ʻīmeili ʻe Janet ki he fefiné ha tuʻasila ki he tohi Akoʻi ʻe he Tohi Tapú pea ʻokú na ako Tohi Tapu tuʻo ua he uike ʻi he taimí ni.
5. Neongo heʻikai lava ke tau fakamoʻui ʻa e kau kuí ʻo hangē ko ia naʻe fai ʻe Sīsuú, ko e hā ʻa e tāpuaki ʻe lava ke tau maʻu mei hono fakahāhā ʻa e mahuʻingaʻia ʻi he kau kuí?
5 Ko e moʻoni, heʻikai lava ke tau fakamoʻui ʻa e kakai ʻoku kuí hangē ko ia naʻe fai ʻe Sīsuú, ka ʻe lava ke tau tokoniʻi ʻa e faʻahinga kotoa kuo fakakuihi honau ʻatamaí ʻe he ʻotua ʻo e fokotuʻutuʻu ko ʻení, kau ai ʻa e kau kui fakaesinó, ke nau mahinoʻi ʻa e moʻoni ʻo e Folofola ʻa e ʻOtuá. (2 Kol. 4:4) Naʻe fakamoʻui ʻe Sīsū ʻa e ongo tangata ofi ki Sielikō koeʻuhí naʻe “ueʻi ia ʻe he fakaʻofaʻiá.” (Māt. 20:34) Kapau te tau fakahāhā ʻa e mahuʻingaʻia tatau ʻi he kau kuí, ʻe lava ke tau maʻu ʻa e monū ʻo hono tokoniʻi ha niʻihi ke nau ako fekauʻaki mo Sihova, ʻa e toko taha te ne fakangata tuʻuloa ʻa e kuí.